Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Le’baki anjo Nasuromi Batara Na’bi Natan mange angngagangi sibuntulu’ Daud. A’lampami Natan mae ri ia na nakana, "Nia’ rua tau ammantang lalang ri se’reang kota; anjo se’rea kalumanynyangi nampa anjo se’reanga pole kasi-asi.
2 Anjo lapung kalumanynyanga jai olo’-olo’ parakana siagang gimbala’na,
3 nampa anjo kasi-asia poro sikayuji bawang ana’ gimbala’na naballia. Anjo ana’ gimbalaka naparakai sa’genna a’jari lompo lalang balla’na siagang ngaseng ana’-ana’na. Anjo ana’ gimbalaka nasarei kanre battu ri kanrena anjo taua, ba’lalo je’ne’ inung battu ri cangkiri’na, siagang attinroi lalang ri riwaanna; bodona kana, napareki sangkamma ana’ baine kalenna.
4 Ri se’reang allo nibattui ri toana anjo lapung tau kalumanynyang. Taerokai anjo lapung tau kalumanynyanga ampolongi gimbala’na yareka sapi kalenna sollanna nipalluangi anjo toananna. Mingka naallei ana’ gimbala’na anjo lapung tau kasi-asia, nampa napalluang toananna."
5 Nalangngere’na Daud anjo carita kammaya, a’jari teaimi sipato’ larrona mae ri panggaukanna anjo lapung tau kalumanynyanga siagang nakanamo, "Palla’ sikali anjo tau kalumanynyanga! Lanri Batara, anjo taua musti nasambei anjo ana’ gimbalaka a’lappi appa’ siagang musti nihukkung matei!"
6 (12:5)
7 Nakanamo Natan ri Daud, "Ikattemi anjo taua karaeng! Siagang iaminne kananNa Batara, iamintu Allata’alaNa Israel, ‘Ikau le’ba’ mako Kuangka’ a’jari karaeng mae ri Israel siagang Kupasalamakko battu ri Saul.
8 Kakaraenganna Saul siagang sikamma bainenna Kupassareangi mae ri kau, ba’lalo Kuangka’ mako a’jari karaeng mae ri Israel siagang Yehuda. Ebara’ angkana tanggannakkapi anjo sikammaya, ma’nassa laKusareko pole sangkammaya anjo jaina.
9 Angngapa natena nujampangi parenta-parentaKu? Angngapa nanugaukang anjo kaja’dallang kammaya? Nusuro bunoi Uria lalang pa’bundukang; nulappassangi nibuno ri tu Amon, siagang nualleangi bainenna!
10 Lanri tena numappilangngeri ri Nakke siagang lanri nuallena bainenna Uria, jari lalang tunggala’ jari-jarinu tuli lania’ lamate nibuno.
11 Assumpa’ angkanaya laKupitujuiko bala, iamintu battua ri kaluarga kalennu. LaKuallei sikamma bainennu ri dallekang matannu siagang Kupassareangi mae ri tau maraenga assikatinroanga siagang ke’nanga ri tangngana alloa.
12 Nugaukang cokko-cokkomi dosaya, mingka iNakke laKupa’butti panggammarakKu lalang kasingarang, ri dallekanna sikontu tu Israel.’"
13 Nampa nakanamo Daud ri Natan, "Dorakama’ mae ri Batara." Appialimi Natan angkana, "Le’ba’ maki’ Napammopporang Batara; jari tena kilamate karaeng.
14 Mingka lanri kihinana Batara battu ri anjo panggaukanta, anjo ana’ bura’neta beru lassuka lamatei."
15 Le’baki anjo ammotere’mi Natan mae ri balla’na. Anjo ana’ bura’nena Daud nilassukanga ri Batsyeba jandana Uria, tu’guru’ garrimmi lanri ero’Na Batara.
16 Nampa appala’ doammo Daud mae ri Batara sollanna akkulle ammolle ri garrinna anjo anaka. Appuasai siagang tunggala’ bangngi attinro sipattang bujuru’ ri dapara’ bili’na.
17 Nampa battumo sikamma tumalompona balla’ kakaraenganga mae ri ia na nanyonyo’ sollanna ero’ ambangung nai’. Mingka taerokai angnganre siagang ke’nanga.
18 Sidaminggu ribokoanganna matemi anjo anaka, siagang malla’mi sikamma ata-atanna Daud ampauangi. Nakana ke’nanga, "Ilalang tallasa’na ija anjo anaka, taerokai karaenga ampilangngeri punna a’bicaraki’ mae ri ia. La’biangampa kamma-kamma anne lalang matenamo ana’ bura’nena! Gassingka lingui nampa napa’risi kalenna!"
19 Nacini’na Daud a’bici’-bici’ anjo sikamma ata-atanna, napahammi angkanaya matemi anjo anaka. Nampa akkuta’nammi mae ri ke’nanga angkana, "Apaka matemi anjo anaka?" Appialimi ke’nanga angkana, "Matemi karaeng."
20 Jari ambangummi nai’ Daud battu ri daparaka, nampa a’je’ne’ siagang najangkai baji’ uu’na, kammayatompa nasambei pakeanna. Le’baki anjo a’lampami assambayang ri Balla’Na Batara. Le’baki anjo ammotere’mi mae ri balla’ kakaraenganga, siagang assuro patalami kanre, nampa angnganre.
21 Nacini’na anjo kammaya, nakanamo sikamma ata-atanna ri ia, "Tena napahangi ikambe karaeng. Ri wattunna attallasa’ ija anjo anaka appuasaki’ siagang angngarrukki’, mingka lalang matenamo ambangungki’ nai’ nampa angnganre!"
22 Appialimi Daud angkana, "Iyo, memang appuasa’ siagang angngarruka’ lalang attallasa’na ija anjo anaka lanri kupikkiriki angkanaya: Gassingka lamangngamaseangi Batara mae ri nakke siagang Naerokangi attallasa’ anjo anaka.
23 Mingka kamma-kamma anne, lalang matenamo, apa matu-matungku tulusu’ appuasa? Maka akkullea’ ampattallasa’ poleangi? Sallang la’lampa tonga’ mae ri anjo tampa’ napammantangia, mingka kamma-kamma anne tenamo nalammotere’ mae ri nakke."
24 Nampa nasaleorimo Daud pa’mai’na Batsyeba bainenna, nampa assikatinroang. Allassukammi Batsyeba sitau ana’ bura’ne nisarea areng Salomo ri Daud. Nikamaseangi ri Batara anjo anaka
25 siagang Nasuroi Na’bi Natan assarei areng Yedija anjo anaka, lanri nikamaseangi ri Batara.
26 Lalanna anjo wattua a’bundu’ iji Yoab assiewa kota Raba, iamintu ibukotana Amon, siagang a’birimmi naalle anjo kotaya.
27 Nampa akkirimmi tunisuro mange ri Daud siagang allaporoki angkana, "Kamma-kamma anne kubundukimi Raba, siagang kuallemi tampa’ passadiang je’ne’na.
28 Kamma-kamma anne, kuminasai nakipa’rappungang tantara tassesaya, nampa kipimping maju a’bundu’ untu’ angngallei anjo kotaya. Lanri kammana anjo tenamo nalanakana sallang taua angkana inakke angngallei anjo kotaya."
29 Napasse’remi Daud sikontu tantarana, nampa maju ambunduki Raba, namajuimi nampa nabeta.
30 Naallemi Daud songko’ kakaraenganga battu ri ulunna karaenna ke’nanga nampa napake kalenna ri ulunna. Anjo songko’ kakaraenganga battala’na nia’ kira-kira 35 kilo siagang nibelo-beloi paramata ga’ga. Sanna’ todong jaina naerang Daud barang-barang nirampasaka battu ri anjo kotaya.
31 Pantaranganna anjo nierammi pandudu’na, siagang nisuroi angngerang garagaji, bingkung bassi, pangkulu’ bassi, nampa nipajama ke’nanga ri tampa’ papparekang batu bataya. Kamma tomminjo nagaukang mae ri pandudu’na kota-kota Amon maraengannaya. Le’baki anjo ammotere’mi Daud siagang sikontu tantarana mange ri Yerusalem.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA