Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E settong bakto PANGERAN madhateng laep e nagara Isra’il pettong taon abidda. Sabellunna jareya Elisa la marenge oneng parkara jareya ka babine’ dhari Sunem se ana’na epaodhi’ pole rowa. Laen dhari jareya Elisa makon babine’ jareya sabalana ngalle ka nagara laen.
2 Babine’ jareya ajalannagi apa se epakonnagi Elisa, sarta laju mangkat ka nagara Filistin ennengnga e jadhiya.
3 Saellana bakto se pettong taon jareya la lebat, babine’ buru laju abali ka Isra’il. E Isra’il laju nyabis ka rato abareng ban ana’na, nyo’on sopaja bengko ban teggalla epabali ka aba’na.
4 E bakto jareya Gehazi barengnga Elisa, bi’ rato epakon nyareta’agi kaajiban-kaajiban se la elampa’agi Elisa.
5 Teppa’na Gehazi nyareta’agi baramma Elisa se maodhi’ pole na’-kana’ se la mate, babine’ dhari Sunem jareya napa’ ka karaton ngadhep ka rato, ngatorragiya parnyo’onanna. Atorra Gehazi, "Guste se molja, ka’dhinto babine’ se ecareta’agi abdidalem buru ban ka’dhinto pottrana se epaodhi’ pole sareng Elisa!"
6 Rato laju mareksane ka babine’ jareya ban babine’ jareya laju nyareta’agi parkara ana’na jareya. Saellana jareya rato adikane ponggabana makon sopaja dhi’-andhi’na babine’ jareya epabali kabbi, tamaso’ argana hasella gal-teggalla saabidda badha e nagara manca pettong taon.
7 E settong bakto Elisa meyos ka Damsyik. Kabendherran Rato Benhadad teppa’na songkan abak sara. E bakto meyarsa ja’ Elisa badha e Damsyik,
8 rato laju adhabu ka Hazael, ponggabana, "Kassa’ nabbi rowa ngeba’agi hadiya pas nyo’on tolong sopaja nabbi jareya nyo’on petodu ka PANGERAN apa sengko’ reya barasa apa enja’."
9 Hazael ngala’ onta pa’ polo meggi’ ebuwa’i samacemma hasella kottha Damsyik, laju mangkat nyabis ka Elisa. Sanapa’na ka kalenggiyanna Elisa, Hazael mator, "Abdiepon panjennengngan, Rato Benhadad, ngotos abdina atanya ponapa salerana bakal saeya ponapa bunten."
10 Dhabuna Elisa, "Dhabuna PANGERAN ka sengko’ ratona ba’na bakal seda’a. Tape atorragi bai ja’ salerana bakal saeya."
11 Saellana jareya Elisa mandeng mancoreng ka Hazael sampe’ Hazael ta’ nyaman neng-enneng. O-tao Elisa laju molar.
12 "Aponapa panjennengngan me’ molar?" ca’na Hazael. "Sabab sengko’ tao kajahadan apa se bakal elakowagiya ba’na ka ommat Isra’il," dhabuna Elisa. "Ba’na ngobbara tha-kotthana se ebintenge, mate’e ngangodhadanna se paleng becce’, ban nyekkel ji’-babaji’ sarta morak tabu’na babine’an se ngandhung."
13 "Abdina ka’dhinto oreng se tadha’ artena," saodda Hazael, "kadi ponapa se gadhuwana kobasa kantos sapaneka rajana?" "PANGERAN la noduwagi ka sengko’ ja’ ba’na daddiya rato Siria," dhabuna Elisa.
14 E bakto Hazael abali ka karaton, Benhadad mareksane, "Apa dhabuna Elisa?" "Ca’epon, junandalem badhi saeya," atorra Hazael.
15 Tape kalagguwanna Hazael ngala’ sapo’, ecabbur ka dhalem aeng sarta laju etekkeddagi ka raena rato sampe’ rato jareya seda. Hazael laju daddi rato Siria agante Benhadad.
16 Yehoram pottrana Yosafat jumenneng rato Yehuda e bakto Rato Yoram pottrana Ahab la olle lema taon se marenta Isra’il.
17 E bakto jareya Yehoram la tello polo dhuwa’ taon yuswana, ban marenta e Yerusalim ballung taon abidda.
18 Yehoram jareya akabin pottrana Ahab, akantha sabalana Ahab, rato reya ngalakone dusa keya ka PANGERAN akantha sa-dusana to-rato Isra’il laenna.
19 Tape PANGERAN ta’ kasokan ngancor Yehuda polana la ajanji ka Daud abdina, ja’ toronanna bakal pagguna daddi rato.
20 E dhalem pamarenta’anna Yehoram, Edom aberonta’ ka Yehuda ban maddek karaja’an dibi’.
21 Lantaran kadaddiyan jareya, Yehoram kalowar ban sakabbinna kareta perrangnga mangkat ka Za’ir. E jadhiya salerana ekeppong pasukan Edom, tape e baja malem narabas kepponganna moso abareng ban para panglimana pasukanna, dineng rit-parjuridda padha buru mole ka bengkona bang-sebang.
22 Molae dhari jareya Edom ta’ daddi baba parentana Yehuda pole. E bakto jareya keya kottha Libna aberonta’ keya.
23 Careta laenna parkara Yehoram ecathet e dhalem ketab Sajarana To-rato Yehuda.
24 Yehoram seda ban esareyagi e tana pasareyanna to-rato e Kottha Daud. Se agante jumenneng rato iya areya pottrana se anyama Ahaziya.
25 Ahaziya pottrana Yehoram jumenneng rato Yehuda e bakto Rato Yoram pottrana Ahab la olle dhubellas taon se marenta Isra’il.
26 E bakto jareya yuswana Ahaziya gi’ buru dhu lekor taon, ban se marenta e Yerusalim sataon abidda. Ebuna asmana Atalya, pottrana Rato Ahab, bajana Omri rato Isra’il.
27 Dhari rajina, Ahaziya daddi sabala’an ban balana Rato Ahab. Daddi Ahaziya laju alako dusa keya ka PANGERAN akantha se elakowagi sabalana Ahab.
28 Rato Ahaziya noro’ aperrang ban Hazael, Rato Siria, abareng ban Yoram rato Isra’il. Se aperrang jareya neng e Ramot, dhaera Gileyad. Yoram loka e dhalem paperrangan jareya,
29 laju abali ka kottha Yizre’el erabada, Ahaziya meyos ka jadhiya nyapot Yoram.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA