Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ I bas sada wari nina terpuk nabi-nabi e man Elisa, "Idahndu maka rumah ingan kami tading enda kitiksa man kami kerina ajar-ajarndu.

² Emaka berelah kami lawes ku Jordan nabah kayu, gelah banci ipajekken kami rumah man ingan kami tading." "Banci," nina Elisa ngaloi.

³ Sekalak i bas ia nari mindo gelah ikut min Elisa; nggit Elisa,

⁴ emaka ras ia berkat kerina. Kenca seh i Jordan mulai me ia erdahin.

⁵ Sanga nabahi kayu e, sekalak i bas ia nari rempet ndabuh kapakna ku bas lau. "Uga nari kuban e Tuan?" nina man Elisa. "Kupinjam kal ndai kapak e!"

⁶ "I ja ndai ndabuhna?" nina Elisa nungkun. Ituduhkenna man Elisa ingan kapak e ndabuh. Kenca bage ikeret Elisa sada ciken, ibenterkenna ku bas lau e, emaka minter bombang ibahanna kapak ndai.

⁷ "Angkat ndarat," nina Elisa. Tungkuk kalak ndai, ibuatna kapak e.

⁸ Raja Siria erperang ras Israel. Arih-arih raja e ras kepala-kepala tenterana, janah itentukenna me sada ingan man inganna erkemah.

⁹ Tapi itenahken Elisa berita man raja Israel persingetisa gelah ula ideherina ingan e, erkiteken kalak Siria nggo nggempangi i je.

¹⁰ Emaka ipersingeti raja Israel kalak si ringan i bas ingan e, emaka erjaga-jaga ia kerina. Bagenda me jadi piga-piga kali.

¹¹ Erkiteken si e merawa kal ate raja Siria; idilona kepala tenterana e ngadap man bana, jenari isungkunina, "Siapai i bas kam si mihak raja Israel?"

¹² Sekalak i bas ia nari ngaloi, "Labo lit o, Tuanku raja. Tapi Nabi Elisa nge si nurikenca man raja Israel kai si ikatakenndu alu erbuni-buni gia i bas kamarndu."

¹³ "Darami i ja ia," nina raja Siria mereken perentah, "gelah kutangkap ia." Kenca ikataken man bana maka Elisa sangana i Dotan,

¹⁴ minter isuruhna ku je nterem tentera rikut ras melala kuda ras gereta perang. Nggo berngi kalak enda ndai seh i bas kuta e, emaka minter ikepungna.

¹⁵ Pepagina lampas, keke suruh-suruhen Elisa. Ndarat ia i rumah nari, idahna tentera Siria e ras kudana bage pe gereta perangna ngkepung kuta e. Mulih ia ndahi Elisa janah nina, "Nggo kita bene, Tuan! Kai nari banci siban?"

¹⁶ "Ula kam mbiar," nina Elisa ngaloi. "Sabap teremen si ras kita asa si ras kalak ah."

¹⁷ Kenca bage ertoto Elisa nina, "O TUHAN, bukalah matana gelah idahna!" Ibegiken TUHAN pertotonna e, janah asum itare suruh-suruhen Elisa ku das, idahna reben uruk-uruk e dem alu kuda ras gereta perang si ernala bagi api ngkeleweti Elisa.

¹⁸ Asum kalak Siria e reh nerangsa ertoto Elisa, "O TUHAN, pepentanglah kalak ah!" Ibegiken TUHAN pertoton Elisa emaka IpepentangNa kalak ndai kerina.

¹⁹ Kenca bage idahi Elisa ia kerina janah nina, "Papak kap kam e; labo enda kuta si idaramindu. Mari ikutken aku gelah kubabai kam ku kalak si man daramenndu." Jenari ibabai Elisa kalak ndai ku Samaria.

²⁰ Kenca kalak enda bengket ku bas kota Samaria, minter Elisa ertoto. Nina, "Bukalah matana kerina, TUHAN, gelah erpengidah ka ia." Ibegiken TUHAN pertoton Elisa emaka mamang kal atena, sabap idahna ia i bas kota Samaria.

²¹ Kenca iidah raja Israel kalak Siria e, isungkunna Elisa nina, "Uga, kubunuh ia kerina, bapa? Kubunuh ia kerina?"

²² "Ula," nina Elisa ngaloi. "Kalak si itabanndu i bas peperangen gia ma labo ibunuhndu? Bere man ras bere minemlah ia, jenari pelepas ia mulih ku rajana."

²³ Emaka ibahan raja Israel man-man si mbelin man kalak Siria e kerina; janah kenca ia man ras minem kerina, isuruh raja Israel ia mulih ku raja Siria. Mulai i bas paksa e nari ingadiken kalak Siria merangi negeri Israel.

²⁴ Piga-piga paksa kenca si e ipepulung Benhadat, raja Siria, kerina tenterana guna ngelawan Israel, emaka ikepungna kota Samaria.

²⁵ Erkiteken kota e nggo ikepung, seh kal serana muat pangan i je, emaka erga sada takal kalde pe nggo seh waluh puluh duit pirak. Janah dua ons kotoren merpati ergana lima duit pirak.

²⁶ Sekali jadi erdalan-dalan me raja Israel arah datas tembok kota. Tupung si e lit sekalak diberu nderkuh nina, "Sampatilah aku, o raja!"

²⁷ Ngaloi raja, "Adi la kam isampati TUHAN, aku pe labo tersampati aku kam. Lit kin akapndu gandumku ntah lau anggurku?

²⁸ Kai kin persoalenndu e?" Ngaloi diberu e, "Dua mberngi diberu si enda ngataken maka ipan kami anakku, janah kenca bage anakna ka ipan kami pepagina.

²⁹ Emaka itanggerken kami anakku si dilaki, jenari ipan kami. Pepagina kukataken man bana maka anakna ka ipan kami. Tapi nggo ibunikenna anakna e!"

³⁰ Megi si enda, icaingken raja pakenna perban megogo atena. Janah kalak si ndeher ku tembok e ngidah maka raja make uis guni arah bas jubahna tanda erceda ate.

³¹ Nina raja ersumpah, "Dibatalah si munuh aku adi la kin retap sendah takal Elisa!"

³² Kenca e isuruhna sekalak suruh-suruhen ngelegi Elisa. Tupung si e Elisa sangana i rumah ras piga-piga kalak pertua si ndahi ia. Ope denga seh suruh-suruhen raja ndai nina Elisa man pertua-pertua e, "Pemunuh e sangana nuruh sekalak jelma nampul takalku! Adi nggo kari ia seh, tutup pintu janah ula bere ia bengket; raja la ndauh arah pudina."

³³ Dung kenca kal ibelaskenna kata enda reh me raja, janah nina, "TUHAN jine kap si erbahan kesusahen enda. Kai denga gunana kutimai PenampatNa?"

2 Raja-raja

Video 2 Raja-raja 6

Ikuti Kami:

KONTAK | PARTISIPASI | DONASI