Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ E settong are badha randhana settong nabbi nyabis ka Elisa, laju mator, "Pa’, lake kaula ampon seda! Sampeyan ampon ngagali ja’ lake kaula ganeka ta’at ka Allah, namong gadhuwan otang ka oreng. Samangken oreng ka’issa’ dhateng ka compo’ mondhuda ana’ kaula se dhadhuwa’ ebadhiya dunor, menangka bajaranna otangnga lake kaula."

² "Baramma sengko’ se nolonga ba’na?" dhabuna Elisa. "Ba’na andhi’ apa e bengkona?" "Ta’ gadhuwan pa-ponapa," atorra babine’ jareya, "namong mennya’ jaitun sabutol kene’."

³ Dhabuna Elisa, "Kassa’ ba’na ngenjam butol kosong ka ga-tatanggana; ngenjam sanya’-bannya’na.

⁴ Saellana jareya ba’na ban na’-ana’na maso’ ka dhalem bengkona, labangnga totop. Mennya’ e butol se kene’ jareya selen ka tol-butol se ollena ngenjam jareya. Se la possa’ palaen."

⁵ Babine’ jareya mole ka bengkona. Saellana notop labangnga bengkona ban na’-ana’na, butol kene’na se aesse mennya’ jaitun gella’ ekala’, mennya’na laju eselen ka tol-butol se egiba na’-ana’na.

⁶ Saellana tol-butol jareya possa’ kabbi, randha jareya menta butol settong aggi’. "Ampon tadha’," ca’na ana’na se settong. Mennya’ jareya pas ta’ agili pole.

⁷ Saellana jareya randha buru nyabis ka Nabbi Elisa pole. Elisa adhabu, "Juwal mennya’ jareya ollena pessena pamajar otangnga, lebbina ekenneng kagabay baragadda odhi’na ba’na ban ana’na se kadhuwa."

⁸ E Sunem badha oreng babine’ se sogi. E settong are e bakto Elisa meyos ka Sunem, bi’ babine’ jareya eonjang epadha’ara e bengkona. Molae dhari jareya sabban meyos ka Sunem Elisa adha’ar e bengkona babine’ jareya.

⁹ Ca’na babine’ jareya ka lakena, "Sengko’ yakin, oreng lake’ se seggut nyepper dha’ enna’ rowa abdina Allah onggu.

¹⁰ Mara, ra, gabayyagi kamar ne’-kene’ e loteng, pagenna’ ban ranjangnga, meja, korse ban damarra, sopaja oreng jareya bisa kelem e dhinna’ mon teppa’na alenggi dha’ enna’."

¹¹ E settong are Elisa meyos ka Sunem pole. Saellana ongga ka kamarra,

¹² laju makon Gehazi, barengnga, ngolok babine’ gella’. Saellana babine’ jareya dhateng,

¹³ Elisa adhabu ka Gehazi, "Tanya’agi ka ebu jareya baramma carana sengko’ se malessa kabecce’anna ka sengko’ ban ba’na. Pola sengko’ me’ nyabisa ka rato otaba ka panglimana angkadan perrang tor-matora kaangguy kaparlowanna." Saodda babine’ jareya, "Kaula apolong sareng la-bala kaula, ta’ kakorangan pa-ponapa."

¹⁴ Dhabuna Elisa ka Gehazi, "Mon kantha jareya, apa se bisa elakone sengko’ mon terro malessa kabecce’anna?" Saodda Gehazi, "Babine’ ka’dhissa’ ta’ gadhuwan pottra, mangkana se lake’ ampon seppo."

¹⁵ "Soro dha’ enna’ babine’ jareya," dhabuna Elisa. Babine’ jareya nyander pas manjeng e bang-labang.

¹⁶ Dhabuna Elisa ka babine’ jareya, "Taon dhateng, baja teya, ba’na bakal ngembana ana’ lalake’." "Ampon ja’ cek-lecek, pa’," ca’na babine’ jareya. "Panjennengngan gu ta’ abdina Allah!"

¹⁷ Tape dhabuna Elisa jareya teppa’ onggu. Taon dhatengnga, ra-kera baja kantha jareya, babine’ gella’ rembi’ lalake’.

¹⁸ Saellana kana’ jareya la raja, e settong are e mosem anye entar ka eppa’na se badha e teggal ban reng-oreng se anye.

¹⁹ O-tao kana’ jareya acerreng ka eppa’na, "Adhu! Cethak kaula sake’!" "Giba ka ebuna," ca’na eppa’na kana’ jareya ka sala settong dhari barengnga.

²⁰ Bi’ barengnga kana’ jareya egiba ka ebuna, bi’ ebuna ereba. E baja asar kana’ jareya mate.

²¹ Bi’ ebuna egiba ka loteng, ka kamarra Elisa, pas epatedhung e ranjangnga. Saellana jareya pas kalowar, labangnga etotop,

²² laju ngolok lakena. Oca’na, "Ngologgagi bareng settong soro ngeba hemar dha’ enna’. Sengko’ kodu duli nyabis ka Nabbi Elisa, tape duliya abali."

²³ "Arapa me’ kodu entar sateya?" ca’na lakena. "Are teya banne are Sabat ban banne are raja Bulan Anyar." "Ta’ arapa," saodda se bine’.

²⁴ Saellana masang pa-kapana hemarra, babine’ jareya ngoca’ ka barengnga, "Mara paceppet pajalanna hemarra, ja’ korange kaceppedanna, kajabana mon bi’ sengko’ esoro."

²⁵ Daddi babine’ jareya mangkat ka kalenggiyanna Elisa e Gunong Karmel. Dhari jauna Elisa la ngoladi babine’ jareya entar ka jadhiya. Elisa adhabu ka Gehazi, "Tenggu, wa, babine’ dhari Sunem rowa entar dha’ enna’!

²⁶ Duli amba’, pas tanya’agi baramma kabadha’anna sabalana." "Sae sadaja," ca’na babine’ jareya ka Gehazi.

²⁷ Tape sanapa’na ka adha’anna Elisa, babine’ jareya laju asojud neggu’i padana Elisa. Gehazi nyorowa babine’ jareya ondur, tape Elisa adhabu, "Ella, dina! Katonna oreng reya ce’ sossana. Tape PANGERAN ta’ apareng oneng pa-apa ka sengko’!"

²⁸ Babine’ jareya ngoca’, "Kaula ta’ nyo’on ana’ ka panjennengngan. Kaula ampon mator sopaja panjennengngan ta’ apareng pangarep se kosong ka kaula."

²⁹ Elisa atole ka Gehazi pas adhabu, "Duliyan! Kala’agi tang tongket pas entar ka bengkona babine’ reya. Ja’ bu-ambuwan kaangguy nyapa reng-oreng se tatemmo ban ba’na e lorong. Mon badha oreng nyapa ba’na, ja’ wang-mowang bakto nyaodana. Mon la napa’, duli saba’ tongket jareya ka badanna kana’ rowa."

³⁰ Ca’na babine’ gella’ ka Elisa, "Bit asmaepon PANGERAN se odhi’, sareng bit nyabaepon panjennengngan, kaula ta’ adinggallagiya panjennengngan!" Daddi Elisa mangkat ban babine’ jareya ka bengkona.

³¹ Gehazi mangkat kaadha’ nyaba’a tongkedda Elisa ka badanna kana’ rowa, tape tadha’ monye otaba dha-tandha laen ja’ kana’ jareya odhi’. Daddi Gehazi abali entar ka Elisa pas ngoca’, "Kana’ ka’issa’ ta’ jaga."

³² Sanapa’na ka bengkona babine’ gella’, Elisa maso’ kadibi’an ka kamarra pas ngoladi mayyidda kana’ jareya e katedhunganna.

³³ Elisa nganceng labangnga kamar jareya pas adu’a ka PANGERAN.

³⁴ Saellana jareya Elisa pas napang e attassa badanna kana’ jareya. Padha’aranna, socana ban astana eparapet ka colo’na, matana ban tanangnga kana’ jareya. Lantaran jareya, badanna kana’ jareya pas anga’.

³⁵ Elisa ngadek pas alomampa jar-ganjir e dhalem kamar jareya, saellana jareya pas napang pole e attassa badanna kana’ jareya. Dhi-budhina kana’ jareya aassim pettong kale, pas mella’.

³⁶ Elisa makon Gehazi ngolok ebuna kana’ jareya. E bakto babine’ jareya maso’, Elisa adhabu, "Areya’ ana’na ba’na."

³⁷ Babine’ jareya asojud e adha’na Elisa, pas ngala’ ana’na terros egiba ka lowar.

³⁸ E settong bakto sanagara ecapo’ laep. Daddi Elisa laju abali ka Gilgal. Teppa’na morok bi-nabbi, salerana makon sarengnga ngala’ polo’ se raja laju epakon ala-ola se eangka’agiya ka reng-oreng se badha e jadhiya.

³⁹ Sala settong dhari nabbi se badha e jadhiya meyos ka teggal nyare ngan-gangan, laju manggi ka’-bungka’an akantha bungkana labu alas. Buwana epetthek sabannya’na, laju ebakta gubar. Maske ta’ ngagali buwana apa jareya, tape terros ethok-ketthok laju epamaso’ ka dhalem polo’na.

⁴⁰ Saellana massa’ laju egi-bagi ka bi-nabbi jareya. Tape gi’ buru ecepcep, reng-oreng jareya padha aera’ ka Elisa, "Pa’, ka’dhinto racon!" Daddi padha tadha’ se kasokana adha’ar.

⁴¹ Elisa makon oreng ngala’ teppong sakone’; teppong jareya laju etaburragi ka essena polo’ jareya. Saellana jareya laju adhabu, "Kassa’ gi-bagi pole." Ban kakanan jareya laju ta’ ambabajane pole.

⁴² E laen arena pole badha oreng lalake’ dhari Ba’al-Salisa. Oreng jareya ngeba gandum se gi’ buru eanye ban roti dhu polo se ekagabay dhari gandum hasella se anye dha’-adha’na ban gandum anyar hasella taon jareya. Elisa makon sarengnga magi roti jareya ka bi-nabbi gella’,

⁴³ tape sarengnga jareya mator, "Ta’ kera cokop badhi saratos oreng!" Dhabuna Elisa, "La gi-bagi, ra, me’ olle edha’ar, sabab PANGERAN adhabu ja’ reng-oreng reya bakal adha’ara, ban saellana adha’ar gi’ bakal badha’a karena."

⁴⁴ Daddi bi’ sarengnga kakanan jareya ebagi, ban kabbi padha adha’ar. Saellana mare adha’ar gi’ badha karena akantha se la edhabuwagi PANGERAN.

2 Raja-raja

Video 2 Raja-raja 4

Ikuti Kami:

KONTAK | PARTISIPASI | DONASI