Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sanga Joyakim jadi raja negeri Juda iperang Raja Nebukadnesar i Babilon nari, janah telu tahun dekahna Joyakim ipaksa mungkuk i teruh perentahna. Kenca bage berontak ia.
2 Isuruh TUHAN gerombolan ersenjata kalak Babilon, Siria, Moap, ras kalak Amon ngelawan Joyakim guna ngkernepken negeri Juda, sue ras si nggo ikataken TUHAN gelgel nari arah suruh-SuruhenNa, nabi-nabi.
3 Si enda jadi arah perentah TUHAN, lako muangken kalak Juda i lebe-LebeNa nari erdandanken kerina dosa si nggo ilakoken Raja Manase,
4 terlebih-lebih pe erkiteken ibunuhina nterem kalak si la ersalah. TUHAN la nggit ngalemi salah Manase.
5 Kerina si debanna si ilakoken Joyakim isuratken i bas kitap Sejarah Raja-raja Juda.
6 Mate Joyakim, emaka anakna Joyakin nggantiken ia jadi raja.
7 Raja Mesir ras tenterana lanai pernah ndarat erperang erkiteken raja Babilon genduari nggo ngkuasai kerina daerah si gelgel e jadi sikerajangen Mesir, mulai i Lau Eprat nari terus ku perbalengen Mesir arah Utara.
8 Asum Joyakin jadi raja Juda, umurna sepulu waluh tahun. Irajaina kerajan Juda i Jerusalem nari telu bulan dekahna. Gelar nandena Nehusta, anak Elnatan i Jerusalem nari.
9 Erdosa Joyakin man TUHAN, bali ras kai si nggo ilakoken bapana.
10 Tupung pemerentahenna reh tentera Nebukadnesar i Babilon nari nerang Jerusalem ikepungna kota e.
11 Sanga tenterana ngkepung kota e, Nebukadnesar reh ku Jerusalem.
12 Emaka nerahken bana Raja Joyakin man kalak Babilon radu ras nandena, anak-anakna, pengulu tenterana, ras pegawai-pegawai istanana. Tupung e Nebukadnesar nggo waluh tahun jadi raja.
13 Kerina perkekas emas si ibahan Raja Salomo guna Rumah Pertoton, icedai Nebukadnesar. Kerina barang-barang si meherga i bas Rumah Pertoton ras i bas istana iangkutna ku Babil. Kerina enda jadi sue ras kai si nggo leben ikataken TUHAN.
14 Kalak Jerusalem ibabana tertaban, kerina kesusuren raja, ras kerina peminpin-peminpinna, teremna lit sepuluh ribu kalak. Tukang-tukang si beluh pe ikut ibabana subuk pande-pande besi. Kalak si musilna nari ngenca itadingkenna i Juda.
15 Nebukadnesar maba Joyakin ku Babil selaku tabanen, rikut ras nande Joyakin, kerina ndeharana, pegawai-pegawaina, ras peminpin-peminpin kalak Juda.
16 Kerina kalak penting ibuang Nebukadnesar ku Babilon, teremna lit pitu ribu kalak, bage pe seribu kalak tukang si beluh, subuk tukang-tukang besi, janah kerina paguh-paguh dagingna, ngasup ndalanken tugas jadi tentera.
17 Nebukadnesar ngangkat bapa nguda Joyakin Mattania, jadi raja Juda, jenari isambarina gelar Mattania jadi Sedekia.
18 Asum Sedekia jadi raja Juda, umurna dua pulu sada tahun. Irajaina kerajan Juda i Jerusalem nari sepulu sada tahun dekahna. Gelar nandena Hamutal, anak Jeremia i Kota Lipna nari.
19 Raja Sedekia erdosa man TUHAN, bali kal ras perbahanen Raja Joyakim.
20 Merawa kal TUHAN nandangi kalak Jerusalem ras Juda seh maka IbuangNa ia i lebe-LebeNa nari.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA