Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 La napa’ baktona PANGERAN ngangka’a Eliya ka sowarga kalaban parantara’anna kaleng busbus. E bakto jareya Eliya ban Elisa la mangkat dhari Gilgal,
2 e tengnga lorong Eliya adhabu ka Elisa, "Ba’na neng e dhinna’. Sengko’ eotos PANGERAN ka Betel." Saodda Elisa, "Bit asmaepon PANGERAN se odhi’ sareng bit nyabaepon panjennengngan, abdina ta’ adinggallagiya panjennengngan." Daddi se kadhuwa jareya abareng terros sampe’ gan Betel.
3 Badha bi-nabbi se alenggi e jadhiya padha manggi’i Elisa pas atanya, "Sampeyan ba’ onenga e are mangken sampeyan edinggallagiya lorana amarga lorana sampeyan ganeka epaongga sareng PANGERAN?" "Enggi, kaula oneng," saodda Elisa. "Tape ampon, parkara ganeka ta’ osa abu-dhabu."
4 Saellana jareya Eliya adhabu ka Elisa, "Ba’na neng e dhinna’; sengko’ epakon PANGERAN ka Yerikho." Tape Elisa nyaot, "Bit asmaepon PANGERAN se odhi’ sareng bit nyabaepon panjennengngan, abdina ta’ adinggallagiya panjennengngan." Daddi se kadhuwa jareya abareng terros sampe’ ka Yerikho.
5 Badha bi-nabbi se alenggi e jadhiya padha manggi’i Elisa pas mareksane, "Sampeyan ba’ onenga e are mangken lorana sampeyan bakal epaongga’a sareng PANGERAN sarta adinggallagiya sampeyan?" "Enggi, kaula oneng," saodda Elisa. "Tape ampon, parkara ganeka ta’ osa kabu-dhabu."
6 Saellana jareya Eliya adhabu ka Elisa, "Ba’na neng e dhinna’; sengko’ epakon PANGERAN entar ka Songay Yordan." Tape Elisa nyaot, "Bit asmaepon PANGERAN se odhi’ sareng bit nyabaepon panjennengngan, abdina ta’ adinggallagiya panjennengngan." Se kadhuwa jareya nerrossagi parjalananna sampe’ ka Songay Yordan,
7 etoro’ bunte’ bi-nabbi se bannya’na saeket oreng. Eliya ban Elisa pas ambu e penggirra songay, dineng nabbi se saeket oreng rowa ngadek ta’ saapa jauna dhari jadhiya.
8 Eliya pas mokka’ jubana, juba jareya esebeddagi ka aengnga songay gella’. Aeng songay jareya pas seba’ madhuwa, daddi Eliya ban Elisa pas bisa alomampa e dhasarra songay se kerreng jareya.
9 Saellana napa’ ka temorra songay jareya, Eliya adhabu ka Elisa, "Mara ngoca’ apa se epenta’a ba’na ka sengko’ sabellunna sengko’ epaongga bi’ Pangeran adina’agi ba’na." Saodda Elisa, "Kobasana panjennengngan sangkollagi ka abdina, me’ olle abdina kengeng agante panjennengngan."
10 Saodda Eliya, "Pya, jareya ce’ malaradda." "Tape mon ba’na nangale’e sengko’ e bakto sengko’ epaongga bi’ Pangeran, parnyo’onanna ba’na bakal ekabbulana. Tape mon ba’na ta’ nangale, parnyo’onanna ba’na bakal etolaga."
11 Sambi alomampa, se kadhuwa jareya terros abu-dhabu. O-tao badha kareta se kalowar apoy se etarek jaran se kalowar apoy keya; kareta jareya nyellor e antarana se kadhuwa, daddi Eliya ban Elisa sampe’ tapesa. Eliya pas egiba kaleng busbus, eangka’ ka sowarga.
12 Elisa nangale’e jareya pas aera’ ka Eliya, "Eliya, rama kaula! Rama kaula! Palindhungnga Isra’il se parjuga! Samangken panjennengngan ampon tadha’!" Eliya pas elang, ta’ etangale’e pole bi’ Elisa. Elisa sossa panggaliyanna; jubana pas esebbit madhuwa,
13 saellana jareya pas nolong jubana Eliya se gaggar, sarta laju ngadek e penggirra Songay Yordan,
14 jubana Eliya gella’ esebeddagi ka aeng songay sambi adhabu, "Badha e dhimma PANGERAN, Allahna Eliya rowa?" Saellana jubana Eliya gella’ esebeddagi ka aeng songay gella’, aengnga meyak madhuwa, Elisa pas alengka songay jareya, lebat e dhasarra.
15 Nabbi e Yerikho se saeket oreng bannya’na rowa ngoladi Elisa, laju adhabu, "Kobasana Eliya la ngalle ka Elisa!" Reng-oreng jareya nyabis ka Elisa pas asojud e adha’anna,
16 laju mator, "Kaula sakanca e ka’iya badha saeket oreng, padha wat-kowat. Tore ja’ nyareya lorana sampeyan. Kadiya sareng Errohna PANGERAN lorana sampeyan ganeka ebakta ka gunong otaba ka cora, pas edinggallagi e ka’dhissa’." "Ampon, ta’ osa!" saodda Elisa.
17 Tape bi-nabbi jareya terros maksa sampe’ Elisa saroju’. Daddi nabbi se saeket oreng jareya mangkat nyare Eliya sampe’ tello are abidda, tape ta’ etemmo.
18 Saellana jareya kabbi padha abali ka Elisa se anante’ e Yerikho. "Kaula gu ta’ pon ngoca’ ja’ ta’ osa entar nyare?" dhabuna Elisa ka bi-nabbi jareya.
19 Badha reng-oreng dhari Yerikho nyabis ka Elisa laju mator, "Panjennengngan ampon ngoladi dibi’ kottha ka’dhinto sae, namong aengnga juba’, daddi sababba babine’an se ababerra’ kalabuwan."
20 "Kassa’ ngala’agi kobugan se gi’ anyar," dhabuna Elisa, "esse’e buja." Reng-oreng jareya ajalannagi se edhabuwagi Elisa.
21 Elisa pas meyos ka somber, buja gella’ etaburragi ka aengnga sambi adhabu, "Areya’ dhabuna PANGERAN, ‘Sengko’ mamorneya aeng reya sopaja ta’ daddi sababba oreng mate ban kalabuwan!’"
22 Molae dhari jareya aeng gella’ pas morne, cocok ban dhabuna Elisa.
23 Saellana jareya Elisa meyos dhari Yerikho ka Betel. E tengnga lorong badha na’-kana’ lalake’an se kalowar dhari kottha padha ya-nyeya Elisa. "He buthak, buthak, ondur dhari dhinna’!" ca’na na’-kana’ lalake’an jareya.
24 Elisa atole pas mandeng ka na’-kana’ jareya laju abasto na’-kana’ jareya bit asmana PANGERAN. E bakto jareya keya laju badha baruwang dhadhuwa’ kalowar dhari alas. Dhari na’-kana’ lalake’an gella’ badha pa’ polo dhuwa’ oreng se ebit-sebbit bi’ baruwang jareya.
25 Elisa nerrossagi parjalananna ka Gunong Karmel, pas abali ka Samaria.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA