Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri taung makarua ammarentana Yoas ana’na Yoahas ri Israel, iaminjo wattua na’jari Karaeng Amazia ana’na Yoas ri Yehuda.
2 Anjo wattua ruampulo allima taung umuru’na, siagang ruampuloi assalapang taung sallona ammarenta ri Yerusalem. Amma’na tu battu ri Yerusalem niarenga Yoadan.
3 Anjo Amazia nagaukangi apa napakassannanga pa’mai’Na Batara, mingka tenapa nasangkamma Daud boe-boena. Sangkamma todong manggena,
4 tena todong nanaruntungi tampa’-tampa’ panynyombanga ri rewataya, sa’genna tuli assarena koro’bang siagang tuli attununa dupa ra’yaka anjoreng.
5 Tena nasallo ri wattu jarre’namo kakoasanna, nahukkung matemi Amazia sikamma pagawe le’baka ambunoi manggena.
6 Mingka sikamma ana’na anjo pagawea lanri naturukinna parentaNa Batara niaka tattulisi’ lalang ri Kitta’na Musa angkanaya, "Teako hukkung matei tau toaya lanri kaja’dallang nagaukanga ana’-ana’na, siagang teako hukkung matei ana’-anaka lanri kaja’dallang nagaukanga tau toana ke’nanga. Ia nakkulle nihukkung mate se’rea tau punna passala’ panggaukang kaja’dallang kalenna."
7 Lalang se’reang pa’bundukang nia’ 10.000 tantara Edom le’ba’ nabuno Amazia ri lappara’ ka’bung niarenga Asin, siagang naempoi kota niarenga Sela. Anjo kotaya nasambei arenna nampa naareng kota Yokteel. Sa’genna kamma-kamma anne tuli niarenna Yokteel anjo kotaya.
8 Nampa nia’mo tunisurona Amazia mange ri Yoas karaeng Israel untu’ ampa’ngarai a’bundu’.
9 Mingka appikatumi pappiali Karaeng Yoas kamma anne, "Nia’ se’re wattu sallang nakkiring kabara’ katinting rompoka ri Pa’bulukanna Libanon mae ri poko’ camaraya angkana, ‘He poko’ camara, passareangi ana’ tulolonnu mae ri anakku untu’ a’jari bainenna.’ Mingka ribokoanganna nia’mo ammalo anjoreng sikayu olo’-olo’ battu ri romanga angngonjo’-onjokangi anjo katinting rompoka.
10 Ikau Amazia, a’jari tampomako, lanri le’ba’namo nubeta tu Edom. Jari, sai jaimi anjo pammetannu? Bajikangngang boli’mi ri balla’ anjo pammetannu! Apa matu-matunnu a’boya pa’bettesang lanri ero’nu bawang ancilakai kalennu siagang ra’ya’nu?"
11 Mingka Amazia karaeng Yehuda tanajampangiai anjo kana-kananna Yoas karaeng Israel. Lanri kammana anjo, a’lampami Karaeng Yoas siagang ana’ buana mange ri Bet-Semes ri Yehuda nampa a’bundu’ siagang Amazia anjoreng.
12 Nibetai tantara Yehuda siagang larimi sikontu tantarana ammotere’ massing mae ri balla’na.
13 Nijakkala’mi Amazia ri Yoas, nampa a’lampa Yoas mange ri Yerusalem anruntungi tembo’na anjo kotaya kira-kira 200 metere’ la’buna, appakkaramula battu ri Pakke’bu’ Lompo Efraim sa’genna mange ri Pakke’bu’ Lompo Panyingkulu’.
14 Sikontu bulaeng, pera’ siagang pakkakasa’ nabuntuluka lalang ri Balla’Na Batara, kammayatompa sikontu pa’barang-barangang niaka ri balla’ karaenga siagang siapa are jaina tunitahang, niengkaki ri Yoas mange ri Samaria.
15 Pau-pau maraengannaya ri passala’na Karaeng Yoas, kammayami kabaranianna angngewai Amazia karaeng Yehuda niaki nicata’ lalang ri kitta’"Riwaya’na sikamma karaeng Israel."
16 Matei na nitarawang Yoas ri pa’jerakkanna sikamma karaenga ri Samaria. Nampa ana’na niarenga Yerobeam II ansambeangi a’jari karaeng.
17 Ri wattunna matemo Yoas karaeng Israel, attallasa’ iji Amazia 15 taung sallona.
18 Ri Yerusalem nia’ pasikongkolang tau eroka ambunoi Amazia. Jari larimi mange ri Lakhis, mingka niondangi ri musu-musunna sa’genna mange anjoreng nampa nibuno. Maya’na niengkaki siagang jarang mange ri Yerusalem, nampa nitarawang ri pa’jerakkanna sikamma karaenga ri Kota Daud. Jari nilanti’mi Uzia ri ra’ya’ Yehuda a’jari karaenna ke’nanga. Anne Uzia ana’ bura’nena Amazia. Anjo wattua nampami 16 taung umuru’na Usia. Pau-pau maraengannaya ri passala’na Karaeng Amazia niaki nicata’ lalang ri kitta’"Riwaya’na sikamma karaeng Yehuda."
19 (14:18)
20 (14:18)
21 (14:18)
22 Ri matenamo manggena, naallemi ammotere’ Uzia kota Elat nampa nabangung ammotere’.
23 Ri taung makasampulo allima ammarentana Amazia ana’na Yoas ri Yehuda, iaminjo wattua na’jari Karaeng Yerobeam II ana’na Yoas ri Israel siagang ammarentai ri Samaria 41 taung sallona.
24 Dorakai mae ri Batara lanri naturukinna kaja’dallanna Yerobeam I le’baka angngerangi tu Israel mae ri gau’ dosaya.
25 Iaminne Yerobeam II angngalle kabusuki ammotere’ sikontu daerana Israel, appakkaramula battu ri oloang mangea ri Hamat bageang wara’ sa’genna mange ri Tamparang Matea ri bageang timboro’. Anjo sikammaya situruki siagang janjinNa Batara, Allata’alana Israel, tete ri atanNa, iamintu Na’bi Yunus ana’na Amitai tu Gat-Hefer.
26 Naciniki Batara antekamma sessana tu Israel, nampa tena manna sitau antulungi ke’nanga.
27 Tena pattujunNa Batara ero’ angngancuruki Israel sa’genna satunggu-tungguna. Lanri kammana anjo Natulummi ke’nanga tete ri Karaeng Yerobeam
28 Pau-pau maraengannaya ri passala’na Karaeng Yerobeam II, ri passala’na kabaranianna lalang ri siapa area pa’bundukang siagang antekamma batena angngallei ammotere’ Damsyik siagang Hamat battu ri Yehuda untu’ tu Israel, yangasenna niaki nicata’ lalang ri kitta’"Riwaya’na sikamma karaeng Israel."
29 Matemi Yerobeam II siagang nitarawangi ri pa’jerakkanna sikamma karaenga. Nampa Zakharia ana’na ansambeangi a’jari karaeng.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA