Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E taon se kapeng tello lekor pamarenta’anna Yowas pottrana Ahaziya e Yehuda, Yowahas pottrana Yehu jumenneng rato Isra’il, ban marenta e Samaria petto bellas taon abidda.
2 Akantha Rato Yerobeyam se marenta sabellunna, Rato Yowahas abadhi dusa keya ka PANGERAN sarta andaddiyagi oreng Isra’il alako dusa keya. Rato jareya tadha’ ambuna se alako jahat.
3 Daddi PANGERAN duka ka Isra’il sampe’ Isra’il epanneng li-baliyan epakala bi’ Hazael rato Siria sarta Benhadad pottrana.
4 Yowahas laju adu’a ka PANGERAN, ban PANGERAN meyarsa du’ana jareya, sabab PANGERAN ngoladi saapa kejjemma rato Siria se nganeyaja oreng Isra’il.
5 Bi’ PANGERAN oreng Isra’il eparenge pamimpin se mabebas Isra’il dhari kakobasa’anna Siria, daddi bangsa Isra’il laju odhi’ taremtem pole akantha dha’-adha’na.
6 Sanajjan kantha jareya oreng Isra’il tadha’ ambuna se agabay dusa se emolae bi’ Rato Yerobeyam. Reng-oreng jareya terros ngalakone sa-dusa jareya; sarta’anna arcana Dewi Asyera epanneng paggun badha e Samaria.
7 Angkadan perrangnga Isra’il la epatompes bi’ rato Siria, sampe’ Rato Yowahas pera’ kaagungan pasukan jaran saeket oreng, kareta perrang sapolo meggi’ ban parjurit sapolo ebu oreng.
8 Careta laenna parkara Rato Yowahas ban sakabbinna kapahlawananna ecathet e dhalem ketab Sajarana To-rato Isra’il.
9 Yowahas seda pas esareyagi e Samaria, laju egante bi’ pottrana se asmana Yowas.
10 E taon se kapeng tello polo petto’ pamarenta’anna Rato Yowas e Yehuda, Yowas pottrana Yowahas jumenneng rato Isra’il, marenta e Samaria nem bellas taon abidda.
11 Rato reya dusa keya ka PANGERAN sabab nero kajahadanna Rato Yerobeyam se daddi lantaranna oreng Isra’il agabay dusa.
12 Careta laenna parkara Yowas, tamaso’ caretana kapahlawananna e dhalem paperrangan ban Amaziya rato Yehuda, ecathet e dhalem ketab Sajarana To-rato Isra’il.
13 Yowas seda, esareyagi e pasareyanna to-rato e Samaria, laju egante pottrana se asmana Yerobeyam
14 E settong bakto Nabbi Elisa songkan sara, Rato Yowas meyos parlo nyapoda. E bakto ngoladi Elisa la para’ seda’a, rato laju molar sambi adhabu, "Rama, rama kaula! Panjennengngan oreng raja se abillai Isra’il!"
15 "Ngereng mondhut gandhiba sareng panana!" dhabuna Elisa ka Yowas. Yowas mondhut gandhiba ban pana jareya,
16 bi’ Elisa laju epakon asadhiya epakon manna. Rato laju asadhiya, dineng Elisa laju nompangngagi astana e attassa astana rato.
17 Saellana jareya menorot se edhabuwagi nabbi jareya, rato laju mokka’ candhela se ngadhep ka Siria. "Ngereng ocol pana gapaneka!" dhabuna Elisa. Saellana pana jareya eocol bi’ rato, nabbi jareya aera’, "Junandalem panana PANGERAN. Kalaban pana gapaneka PANGERAN badhi makala’a Siria. Junandalem badhi aperranga sareng oreng Siria e Afek kantos junandalem makala bangsa gapaneka."
18 Elisa makon Yowas mondhut na-panana se laen; na-pana jareya epakon pokollagi ka tana. Rato mokol tana jareya tello kale, laju ambu.
19 Elisa duka, laju adhabu, "Masthena junandalem mokol lema kale otaba nem kale, daddi junandalem kengeng maancor bangsa Siria. Namong samangken junandalem namong makala’a bangsa gapaneka tello kale."
20 Ta’ saapa abidda dhari jareya Elisa seda laju esareyagi. E bakto jareya garombolan-garombolan Mo’ab biyasana nyerrang nagara Isra’il sataon sakaleyan.
21 E settong bakto, teppa’na badha reng-oreng ngoburragiya oreng mate, o-tao laju badha garombolan Mo’ab dhateng ka jadhiya. Reng-oreng jareya nangale’e, laju buru. Jinaza se ekoburragiya jareya eontallagi ka pasareyanna Elisa. E bakto jinaza jareya nyedding ka lang-tolangnga Elisa laju odhi’ pole, terros manjeng.
22 Saabidda pamarenta’anna Yowas, oreng Isra’il etendhes bi’ Hazael rato Siria.
23 Tape PANGERAN neser ka ommadda sarta eparenge sapora. Ommat jareya etolonge sopaja ta’ sampe’a mosna, polana parjanjiyanna bi’ Ibrahim, Ishak ban Yakub. Sampe’ sateya ta’ tao Pangeran reya adinggallagi ommadda.
24 Saellana jareya Hazael rato Siria seda, laju egante pottrana Benhadad.
25 Yowas rato Isra’il makala Benhadad sampe’ tello kale, sarta arebbu’ pole tha-kottha se erebbu’ Benhadad e jaman pamarenta’anna Rato Yowahas ramana Yowas.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA