Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Jadi dob iidah si Atalya, inang ni si Ahasya, na dob matei anakni ai, marhosei ma ia anjaha ibunuh ma ganup ginompar ni raja ai.
2 Tapi ibuat si Joseba, boru ni Raja Joram, botou ni si Ahasya ma si Joas, anak ni si Ahasya, anjaha iluahon ma ia hun tongah-tongah ni anak ni raja ai, sagala sibunuhon hinan, anjaha inahkon ma ia hu kamar podoman rap pakon parorotni. Sonai ma iponopkon ia hun bani si Atalya, gabe seng saud hona bunuh ia.
3 Jadi rapkonsi ma ia marponop i rumah panumbahan ai, onom tahun dokahni, anjaha si Atalya do manrajai i tanoh ai.
4 Tapi papitutahunkon isuruh si Joyada ma na mangalopi pambobai ni bala, kopala ni sisaratus halak pakon kopala ni tentara pangawal, ihatahon ma sidea masuk hu Rumah ni Jahowa marayaksi, marpadan ma ia pakon sidea, anjaha ipabija ma sidea ibagas Rumah ni Jahowa, anjaha ipatuduhkon ma bani sidea anak ni raja ai.
5 Iparentahkon ma hu bani sidea, “On ma sibahenon nasiam, ʻSapartolu hun bani nasiam, siparjaga bani ari Sabat, maningon marjaga ibagas rumah ni raja in,
6 anjaha na sapartolu nari marjaga i lambung ni horbangan Sur, anjaha na sapartolu nari use, ai ma na i lambung ni horbangan ipudi ni tentara pangawal, sidea ma na marjaga i lambung ni rumah panumbahan, margantih-gantih,
7 rap pakon na dua bagian nari hun bani nasiam, ai ma na so martugas bani ari Sabat, maningon marjaga sidea i Rumah ni Jahowa, i lambung ni raja ai;
8 maningon inggotan nasiam do raja ai, ganup marsinjata ibagas tanganni bei, anjaha barang ise na manosak odoran ai, maningon marutang hosah. Maningon hasomanan nasiam do raja ai anggo luar barang masuk ia.ʼ”
9 Jadi ibahen pambobai ni sisaratus halak ma romban hu bani na pinarentahkon ni Malim Joyada, iarahkon bei ma hasomanni siparjaga bani ari Sabat rap pakon na so martugas bani ari Sabat, anjaha roh ma sidea marayak Malim Joyada.
10 Anjaha ipambere malim ai ma hu bani pambobai ni sisaratus halak tanja pakon gantar, na adong bani Raja Daud hinan, na sinimpan i Rumah ni Jahowa.
11 Anjaha jongjong ma pangawal ai, ganup pajolom-jolom sinjatani ibagas tanganni, hampit siamun ni rumah panumbahan ai ronsi hampit sambilou ni rumah panumbahan ai, i lambung ni anjapanjap ai pakon i lambung ni rumah ai, inggot raja ai.
12 Dob ai iarahkon ma anak ni raja ai hu darat, inahkon ma sortali ai hu atas ni uluni, anjaha ibere ma bani buku hasaksian ai. Sonai ma parpabangkit ni sidea bani gabe raja; iminaki sidea ma ia, martopap ma sidea anjaha mangolobkon bei, “Horas ma raja in!”
13 Jadi dob ibogei si Atalya sora olob-olob ni pangawal pakon halak simbuei ai, laho ma ia hu Rumah ni Jahowa, hu bani halak simbuei ai;
14 anjaha dob ipapangkei, tonggor ma, jongjong do raja ai i lambung ni tiang ai, domu bani hasomalan hinan anjaha pambobai ai pakon partarompet ai i lambung ni raja ai, anjaha ganup parnagori ai marmalas ni uhur, anjaha pahata tarompet. Jadi irigati si Atalya ma pakeianni anjaha dilo-dilo, “Tahi-tahi!”
15 Dob ai iparentahkon Malim Joyada ma hu bani pambobai ni sisaratus halak, pambobai ni bala ai, nini ma hu bani sidea, “Arahkon ma ia luar hun holangkolang ni odoran in, anjaha bunuh bani podang barang ise na mangirikkonsi! Ai domma ihatahon malim ai hinan, ʻSeng bulih matei ia i Rumah ni Jahowa.ʼ”
16 Jadi mangonai tangan ma sidea bani, sanggah mardalan ia hun dalan hamasukan ni huda hu rumah ni raja ai, ijai ma ia ibunuh.
17 Dob ai ibahen si Joyada ma sada padan i tongah-tongah ni Jahowa pakon raja ampa halak simbuei ai, paboa maningon bangsa ni Jahowa do sidea, sonai homa i tongah-tongah ni raja ai pakon halak simbuei.
18 Dob ai masuk ma ganup halak simbuei parnagori in hu rumah ni baal, anjaha iparreong sidea ma ai, iropuki sidea ma anjapanjapni pakon gana-ganani, anjaha ibunuh sidea ma si Mattan, malim ni baal ai, i lobei ni anjapanjap ai. Dob ai isuruh malim ai ma na manjaga i lobei ni Rumah ni Jahowa.
19 Dob ai iarahkon ma pambobai ni sisaratus halak, pangawal pakon ganup halak simbuei na i nagori in; ibobahon sidea ma raja ai tuad hun Rumah ni Jahowa, mardalan manlopusi horbangan ni sipangawal, laho hu rumah ni raja ai, anjaha hundul ma ia bani paratas harajaon.
20 Jadi marmalas ni uhur ma ganup bangsa parnagori in; anjaha sonang do huta ai, dob matei tarbunuh si Atalya marhitei podang ibagas rumah ni raja ai.
21 (12-1) Marumur pitu tahun do si Joas, sanggah na bangkit raja ia.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA