Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali bae batuanginya resi aku ane komi mampaponsanika sa’e pamporayang ngkomi. Apa aku kunsani re’e yami kabuya ndaya ngkomi mangansawang yunu ngkita to i Pue Allah Puenya, wali nempo aku taa mangantulisika komi sura si’i mangkonong palaong to etu, komi tiroo rani mangika. See naka re’e gombongku resi tau ri Makedonia mangabarong komi, manganto’o, “Yunu ngkita to tau i mPue nja’u kota Korintus, sira yako to’u liu buya yami raya nsira rani mangansawang.” Ewa wetu kuto’oka sira. Wali kareba mangkonong kasanang ngkomi mangansawang etu, kareba etu mampakaroso raya ntau ri Makedonia see naka kaborosinya sira to rani seja mangansawang.
2 (9:1)
3 Pei bae kojo batuanginya resi aku komi monso pu’u mangika palaong to etu apa aku taa rani gombongku mangabarong komi etu damawali tare batuanginya. See naka aku mangampokau pua’i ngkita yau damangansawang komi see ane rata temponya aku rata seja damangoko sora ngkomi, sora etu room yami napasilonga ngkomi, singkonong ewa to roomo kuto’oka tau.
4 Apa ane bara re’e tau Makedonia to damangalulu aku yau resi komi, pei komi tawa mampasilonga sora etu ri tempo danakarata mami, ane ewa see, gete, mea kami! Apa kami mansarumaka komi pasi mangabarong mangkonong komi, see naka ane taa mawali komi mangika palaong to roomo rato’o etu mea kami, taa manto’o komi.
5 Wali see naka aku mamporapika resi pua’i ngkita see sira matiruyu yau resi komi pei mangansawang mampasilonga sora to roomo naparajanjika ngkomi to komi damangawai. Apa ane rapasilonga yami sora etu panewa rata aku, ane ewa see, manasa sora etu nuwai ngkomi yako ri kabuya ndaya ngkomi. Pei ane rata aku panewa sora etu rapasilonga, sa’e bara mampobuuka rapakasaaka.
6 Wali mangansora sa’e maya raporapaka ewa tau to mamuya. Apa ane bae pae to napomuya ntau etu, bae seja pae to danapota. Pei ane kodi pae to napomuya, kodi seja pae to danapota. Wali ewa see seja tempo kita mangansora sa’e.
7 Wali si’i wo’u mangkonong mangansora sa’e. To tao-tao kita mangawai sora to singkonong pei songka ngkita samba’a pei samba’a. Anu kita buya rayanta mangawai, ne’e apa saba mangepe rapakasaaka. Apa bae kojo batuanginya resi i Pue Allah ane tau ndende rayanya see naka ia mangawai ri kabuya ndayanya.
8 Pasi i Pue Allah, Ia re’e kuasa mampaponsanika komi kanotoNya to yabi wo’u pei to naparluu ngkomi. Ewa wetu inikaNya see komi sangkani gana kojo samparia to danupake ngkomi. Naka pei Ia mangika ewa wetu see komi gana kojo to danupake ngkomi damangika samparia ngaya mpalaong to matao.
9 Wali ewa si’i semo to ratulis ri raya ntuntu i mPue Allah mangkonong tau to manoto, to’onya, “Ia bae kanoto ndayanya mangansora tau to masiasi, see naka malagi sira to mangarata soranya etu. Pasi lengkonya to singkonong pei i Pue Allah etu bae batuanginya rataka ri singkasaenya.” Ewa wetu to ratulis ri raya ntuntu i mPue Allah tempo owi.
10 Wali i Pue Allah semo to mangawaika resi tau to mampomuya anu to danapomuya etu. Pasi Ia seja to mangika see anu to rapomuya etu mawali pangkoni. Wali Ia seja to damangawaika komi samparia to danusoraka sa’e. Pasi kanjo’u-njo’u tiduga-dugang anu to nawaika i mPue Allah komi etu, see kanjo’u-njo’u tiduga-dugang wua mpalaong ngkomi to singkonong pei Ia.
11 Pasi i Pue Allah damangawaika komi mpangayangaya sora to mawali kasugi see komi maya sangkani manoto kojo mangansora sa’e. Pasi yako sora ngkomi to danapakarata mami resi tau i mPue ri Yudea, see naka boros tau to damanganto’oka i Pue Allah, “Tarima matao.”
12 Wali monso pu’u sora to nuwai ngkomi damangansawang tau etu, sora etu damangabanang anu to taa gana resi sira to i Pue Allah Puenya nja’u Yudea.Wali palaong etu matao, pei re’e wo’u to damawali. Apa yako sora to nuwai ngkomi etu, see naka kanjo’u-njo’u kaboro-boros tau to damanganto’oka i Pue Allah, “Tarima matao.”
13 Wali palaong to nuika ngkomi etu damampakanasaka resi sa’e monso pu’u komi mampolaika kareba matao mangkonong i Kerisitu. Wali see naka tau damangabarong i Pue Allah, apa sira mangangkita lengko ngkomi to mampongakung mangaya kareba matao, lengkomu etu singkonong kojo pei gombomu. Pasi sira seja damangabarong i Pue Allah apa saba kanoto ndaya ngkomi mangansora sira pasi mangansora samparia tau to yusa.
14 Wali tau i mPue to nja’u Yudea damampokaikaika komi pasi damawongko seja raya nsira resi komi apa saba bae kojo kanoto i mPue Allah to re’e resi komi. Wali gete, boros to matao to damawali saba yako pansawang ngkomi resi yunu ngkita.
15 Pasi palaong to etu mampatiendoka aku mangkonong sora to bae wo’u batuanginya to nawaika i mPue Allah kita. Wali masipato kita manganto’oka i Pue Allah tarima matao apa saba sora to Ia roomo mangawaika kita etu. Pei kamonsonya tare gombo nto lino to maya mampakanasa ewa wimba kabaenya sora etu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA