¹ Em orep mese esyal-syal gwek– Yerusalemk de Kristen zisi de te-alakam mas gwibiridan hapye. Zep suratnak awe ee ba hap de etan ebe mae hap ola blal gulzimdin hip?
² Em dwan mes em-am esyal-syal gwek. Zep ee mese eno mae mo bosena propinsi Makedoniak awe anakan mam gul gwizimk, “Propinsi Akayak de zini, ena Korintusk, zen orep mes nonol tahunkam tahalha zisi de mas gwibiridan hap ehohle gwek.” Em insa kirekam esyal-syal gwek, aha jemat-jematna dekam zep hen edwam gwek– enlala syal-syalkam de hen mas gwibiridan hapye.
³ Zen zep asa nonol zi dan-aharena insa asa de ebon mae osan ngeirblizan hap lup gul soner– anakare enlala naban, “Ëe mese aha zisi anakan gubirida gwek, ‘Zen mes tangan ehohle gwek.’ Hwena ee de deban mae goleyaing gwe zankam, babe ehohle gwen sremnak emsa hlauludazan.”
⁴ Sap ee de Makedonia kore zi niban ehohle gwen sremnak emsa hlauluda zankam, ki hwena ee serkam asa anakare hap saher gwer, “Ëe ba habe waba hap kirekam boltere ta gwibik?” Ena dekam hen esa esaher gwer.
⁵ Zen in zebe enlala gwek– zi dan-aharena in de asa ngeirbiridazan hapye, em dikim dawem enkam te-alasa tagal ta gun hup, mensa ena egu-guk gwekke. Sap ee de hamal ta gunnuk emsa hlauluda zankam airis tangan. Dekam isrip-sri naban esa te-ala yawala insa eirzim. Hwena hamal tan sremnak de ee yaing gwe zankam, ki sa hwena nwe-mase gwer, “Zen ein tagam dazimꞌin.”
⁶ Gulk sun de ol blaoranna ansa bahem eititi gwibin: “Betekkam de eiyas tanna, dekam betekkam esa hen eini tara. Beyakam de eiyas tanna, dekam beyakam esa tara.”
⁷ Zep dawemna, diki ere mae mo enhonak em anakan dam gulsuk gwen, “Ëe ki en asa golzim.” Embwan gwibin niban bahem gol gwizimdin. Hen anakare enlala naban bahem, “Ëe an eine golzimꞌin.” Diki isrip-sri naban emki gol gwizimdin. Sap Alap isrip-sri naban de gol gwizimdin zisi man kwasang gwibirida gwenda.
⁸ Sap Alap mo sosonna ki– dekam de etan ebe mae hap tingare heꞌho gwibin nika gol gwizimdin hip denaye. Zen dekam tangan esa enlala beya gwen sremkam kae-kaena esek ulse gwer.
⁹ Sap Alap mo olak man lwak, “Alap tahalha zi hip totoresa gol gwizimnira hen kae gwe-gwibir-zimnira– men kirekam zini gandum danna men-san an-sankam hling disik gwenanke. Alap mo syal dawemna in hendep denaban sa lwa gwer.”
¹⁰ Zep hen kirekam, kae-kae gwen hap de syala in, zen obwaga dansa de eiyas gin makan lwaꞌan. Alap men Zen desa de eiyas gin hip gol gwizimnira, hendep tarankam tembanena hen sowe henkam gol gwizimnira, zep eiwa eno mae mo kae-kae gwen hap de syala insa dan nik de mamkam ten makan sa ep beya gul gwizimdi.
¹¹ Alap dekam sa ebe mae hap mamkam heꞌho gwibin nika gol gwizimdi, hendep zep esa beyakam kae eibirida gwer. Hen desa de aha zi hlaunkum, dekam beya nik sa Alap hap dawemna nol gweblal.
¹² Sap em insa Kristen bose uk mo tahalhana hla kulzimꞌin, hwena dekam beya nik sa hen Alap hap dawemna nol gweblal.
¹³ Sap em kime mas eibiridaꞌak, dekam sa emsa anakan dam dasibir, “Eiwa, Korintusk de zini in zeno mae mo eini mes bil gwek.” Dekam Yerusalemk de wenya Alap mo bosena sa anakan teip nulsuk gweblal, “Heꞌho Bian, zini in ek enkam hom Kristus hup de ol dawem san ang tak. Hwena zen eiwa i-san i-san nei gwibirin, hendep zep dawemkam ano mae mo tahalhana ap hla nulzimk– aha zisi men kirekam hen mas neibirida gwenanke.”
¹⁴ Zen dekam sa hen Alapsa kwasang naban ebe mae hap anakan abe da gwer, “Eiwa, Alap, Em ema tangan ere mo kwasang-kwasangna zebe mae hap mam gulzimki. Zep Emki heꞌho gwibin nika zebe mae hap etan gol gwizimdin.”
¹⁵ Hen dikire tingan Alap mo bosena teip nulsuk gweblak, sap Zen mes hendep de engaya gwen hap dena nebe mae hap totoresa golzimki. Zep eiwa wehasa hom– Zebon onakore heꞌho gwibin niye!