¹ Bahem asa jal gweblan, sap ee angkam enlala joblo-top makane bolte-bolte zi mo kim ale gulzimꞌin– men kirekam emsa de yasik tabin hip de zini zenaka boltere da gwibirinke.
² Sap men kirekam Alap jematna emsa zere en hap inik gwibiꞌira, ee hen kirekame emsa anakan dwam gwibiridaꞌan, “Zen dikire Bian en hon lowehe gwek.” Zep ee an men kiye– wenam tol mo bianna, zen de wenam tola insa dawem tangankam anakan kara gul gwenna, “Bap zen aha zisi ang gweblan– zi hip de gon sremnakye.” Ëe hen kirekame emsa kara ta gwibiꞌin, sap ee mese Kristussu anakan gu-gubluk, “Jematna an Ere en hap dena.”
³ Hwena ee ama emsa anakan ngalap gwibiridaꞌan, “Kristus onak de etal gwesin nikon etan bap zen sap de ora san egwahan– men kirekam Hawa wanyana in mo ol derek san ang gwekye.”
⁴ Sap yasik tabin hip de zi de ebon mae onak yaing gwenkam, em bejen em desa jalse gwibiridan. Zen sap maka emsa anakan tawa dabiꞌin, “Yesus osan dep dena emki sren ang tan. Hen Alap mo Enho hap dena emki hen sren ang tan. Aha ol dawem san emki ang tan.” Kirekam de yasik ta gwibin zisi, em hwena aha-ere enlalakame dokwak la gwibirin. Zep sap esa ano wehakam de enaka boltere tan ola ansa hen esane gwer.
⁵ Yasik tabin hip de zini in man zenaka tim di gwibirin, “Ëe an teipsin-teipsin tanganna– Paulus onakonye.” Hwena kirekam hom.
⁶ Eiwa, ee home tewesik– dawemkam de zi tranak tonbiridan hap denaye. Hwena men kirekame Timotius hun oltreizim tine gwek, Alapsa de tame tan hap dena, ee mese te keisik.
⁷ Ëe kime Alap onakore ol dawemkam emsa tawa ta gwibik, ee home mae emsa gubirida gwek, “Ap te-alana ol gweblak, sap ee ama emsa tawa ta gwibiꞌin.” Ëe hwena dekam ama gwe gwek– san de ebon mae de babu gwen zi, anakare enlala naban, “Ëe sap asa zeno mae mo nwenak otdenak gwer. Zen sap sa eteipsil.” Hwena ee insa kirekam gwek, san ha dekam eno mae mo nwenak ama karek gwek? San ha home?
⁸ Ano tahalhana dekam aha lang nakore jemat-jemat ap hla nul gweblak– te-alasa de golblankamye. San ha esa asa enblal? – “Em ema karek gweka– asa de totoresa tawa ta gwibinkimye, aha lang nakore jemat-jemat mo te-alakamye.”
⁹ Ëe kime ebon mae de gwennak tahalha gwek, ee home emsa dohon-hon ta gwibik– te-ala hap de emsa abe tabinkimye. Hwena Makedonia kore aya-wal oso-walya kim ze yaing gwe-gwezak, zen zep ano tahalhana ap hla nul gweblak. Hen angkam mae ee molye wet gwesik. Men kirekame emsa abe tabir srem gwek, zen kire enkam asa ebon mae syal gwe-gwer.
¹⁰ Eiwa de Zini Kristus mo nwenake emsa gubiridaꞌan: Ëe kire enkam asa emsa gweibirida gwer, hendep Akayak de zini em lamkam mae asa molye anakan en gweblak, “Paulus hup ee kie te-alana olblak.”
¹¹ Ëe kime emsa kirekam gweibirida gwenan, san ha dekam home emsa kwasang gwibirida gwenan? Kirekam bejen. Alap Zena tawana: Ëe kirekam ebe mae hap de kwasang habe ki gwe gwenan!
¹² Zep ee kire enkam asa emsa gweibirida gwer– mae hap: Zini men zen zenaka anakan bolte-bolte da gwibirin, “Ëe an hen Paulus mo kime hatazak– emsa de syal gwibin hip,” zeno mae mo eksa dikim kyang tasibir-zimdin hip. Sap zen te-ala en hap syal ta gwenan.
¹³ Sap kirekam de zini, zen Kristus mo dam tasibin zisi hom. Zen yasik tabin hip de zi. Zen zep bolte-boltekam eboton gwe-gwenan, “Ëe an Kristus mo zer sonen zi.”
¹⁴ Zen mae hap kirekam egwe gwenan: Sap zeno mae mo teipsinni, dowal mo kigi, zen hen kirekam bolte-bolte gwe-gwenda, “Ëe an hen Alap mo dam taha nakore zi– Alap onakore ngatan naban.” Zep hen kirekam– dowal mo kigi mo zer sonen zi niye. Nen ba hap de desa tenggwanbirida gwen hap? – zen insa anakan zenaka boltere da gwibirinye, “Ëe an Kristus mo zer sonenna.” Hwena aumwa hap denak Alap sa zebe mae hap zere mae mo syal eini golzimdi.
¹⁵ (11:14)
¹⁶ In zebe etan emsa gubiridaꞌan: Bahem asa anakan enlala gweblan, “Paulus zen suratkam zenaka boltere taka. Zena hen enlala joblo-topna.” Hwena em de eiwa kirekam asa enlala gweblankam, ki emki dawemkam asa zer irin. Sap enlala joblo-top zini, em ema dawemkam lup ulin gwenan. Zep asa hen kirekam. Sap ee angkam ere mo gwensae boltere guꞌun.
¹⁷ Zep angkam ee enlala joblo-top zi mo kime ep ale gulzimꞌin. Sap diki Kristus mo dam tasin zini bejen kirekam zenaka boltere tan.
¹⁸ Ebon mae onak, zini beyana auhu-kama zi mo kim de zenaka boltere ta gwibinni. Zep ee anik hen zeno mae mo kim enaka boltere tak.
¹⁹ Em ee makare enlala joblo-top zisi dawemkame lup ulin gwenan, sap ena enlala blala!
²⁰ Em zebe anakare zisi lup ulin gwenan: Men zen emsa jap nul sonen da gwenan. Hen men zen eno mae mo kire-kirena alal danda gwenan. Hen totoresa de syal tan hap men zen emsa nenbirida gwenan. Hen men zen anakan emsa nenbirida gwenan, “Ëe an mamna. Em bete-tekna.” Hen men zen emsa mipna lwa da gwibir-zimnin. Em hwena kire zisi dawemkame lup ulin gwenan.
²¹ Angkam ee zebe saher gweꞌan: Ëe Timotius hun ama eiwa sin-sin ek, zebe emsa kirekam eibirida srem gwe-gwek! Zep angkam ee sap asa enaka boltere tal– enlala joblo-top zini in mo kimye.
²² San ha zen anakan zenaka boltere da gwibirin? – “Ëe an Ibrani wal.” Hwena ee an sap hen Ibrani wal. San ha zen hen anakan zenaka boltere da gwibirin? – “Ëe an Israel Bak mo ausu nakore zi.” Hwena ee hen dekorena. San zen Abraham mo auyan-tane wal? Ëe an hen zeno auyan-tane. Zep ee an hen Yahudi wal tangan.
²³ San zen man zenaka nenbirida gwenan? – “Ëe an Kristus mo nganak de syal ta gwen zi.” Ëe an hen zeno nganak de syal gwe-gwen zi– desa de kwei-kwik gunnu. Kirekam insa ale gulun, zen enlala joblo-topkame mas gul! Serkam de syal gwe-gwenkam ee mese desa kwei yuludak. Bwinak de gwenkam hen mese desa kwei yuludak. Kristus mo bose hap de asa tangolenkam hen mese serkam kwei yuludak. Ëe mese tin hip de alp gwesinni beya guk. Zen hom.
²⁴ Yahudi mo but srem gol-golak de mam-mamna mes asa aha-ere taha-tap nosoblak– Kristus hup de jal hap de dokot tekkam tangolen naye, men kirekam 39 enkam de lek tyankam nait gwibirinye.
²⁵ Roma mo irik ginnik de mam-mam wenya hen mes asa dan-ahan nosoblak– dop tekkam de tangolen naye. Asa mes kasokam aha-rokꞌnen niriblak. Hen bul yalak de ang gwe-gwenkam, hinak de keing gwen hap de alp gwesinni mese dan-ahan sok. Hwena dan-ahanna in kon, ahana zen dekam tangane hi ngirinnik de gwenna holo gwek– kam denaban yaklam denaban.
²⁶ Ëe tin hip de alp gwesik gwenna mese tangan beya gwek, sap ee ama aha lang san song gwe-gwek: Ho namwana man asa karek ta gwek. Asaskam de te-ala alal tanda gwen zini hen man tan hap asa alp dasik gwek. Yahudi zini tan hap asa kalang ne gweblak– hen sap Yahudi srem zi niye. Totore zi jal-jala hen tan hap asa alp dasik gwek– sap e yawal-yawalak, sap eiknik, sap hinak. Ahakore zi jal-jala hen man asa boton da gwek, “Ëe an eno Kristen bose wal.” Zen hwena asa dikim ze aningkim karek tan hap ki ahap da gwek.
²⁷ Tahalha tangankam de gwennak, ee dekame serkam tangan syal gwe-gwek. Hen kam nini home ta gwek. Usak hap ama tangan sabak gwe-gwek, hen ho-holena. Tembane sremkam hen holokame gwe gwek. Hen bot-bot langnak pakean sowehen sremkame gwe gwek. Ëe karekna desa mese kitak mamkam eisbik.
²⁸ Ahakore tahalhana ano aitbin sremna hen ki. Hwena deban ee ama mwin-mwankam ere mo nga syal gweblannak de jemat-jemat hap dohon-hon naka eis gwibirin.
²⁹ Kristussu de taibliblan nik de etan hli tan hap ealp gwesinni, ee dekam anakane eis gwibirin, “Zen bap zen tangan etan hli tan.” Zi de karek san dep Kristen zisi zertoranna, dekam hen ama tangan enho nakon anakan ngalap gwesibirida gwenan, “Zen bap zen tangan zeno ol san ang gwen.”
³⁰ Hwena yasik tabin hip de zini ki sap ebon mae onak anakan zenaka boltere da gwibirin, “Ëe an sosonna,” zep ee hwena a kirekam asa enaka boltere tal, “Ëe an sin-sin tanganna.”
³¹ Bian Yesus mo Bian Alap, zini men zeno bosesa hendep denaban boltere nul gwenan, zeno nwenake emsa gu sonebiridaꞌan. Ëe home emsa boton tabiꞌin:
³² Ëe kime ena Damsik kon heya gwek, dekam teipsin zini Aretas langna iwe irik giꞌinka. Hen ena iwe de mamna mes jana zi zemka gubiridaka– ena in mo wasnge te so gwe-gwen lilikin nikon de asa til gik gweblan hapye.
³³ Hwena zewe de ano Kristen bose walya dekam zep ena in mo kol son jendela nakon yu yala ban dokotkam asa e san dep sring di sonehak. Ëe dekam zebe zi jal-jala in kon heya gwek. Zep ee an eiwa sin-sinni.