¹ Ëe, Paulus, ama emsa titi tabiꞌin: Asa de husus gweblan zi sin bahem ang ta gwen. Ëe ama sak: Ebon mae onakon ahakon man asa nenblak, “Paulus in Korintusk awe de gwenkam, zen ol drak-drakkam hom nesa tonbirida gweka. Hwena langa nakon de suratkam nesa tawa tabinkim, dekam en ol drak-drakkam nesa gu sonebirida gwenda.” Zen in zebe angkam Kristus onakore enlala sae-saekam hen kwasang-kwasangkam
² emsa gu sonebiridaꞌan: Men zen kirekam asa nenblak, bahem desa salbirida gwen. Ki eiwa asa ol drak-drakkam emsa tonbiridazal– men kirekame suratnak ale gul gwenanke. Hen zen dekam esa asa tame lal, “Paulus, hare eiwa, jal-jala kake.” Zen man hen asa nenblak, “Paulus auhu-kama enlala naban syal gwe-gwenda.”
³ Sap eiwa, nen auhu-kamanake lowehe gwenan. Nen zebe dowal mo kigi naban ereija gweꞌan. Hwena ee auhu-kama zi mo enlala blalkam home zereijaꞌan.
⁴ Sap nen okamanak awe Kristus mo jana nabare zi mo kime lowehe gwenan. Hen neno mae mo janana, auhu-kamanak de janasa hom. Neno mae mo janana, zen ngatan zi mo lang nakorena. Nen dekame dowal mo kigi mo iti ena timbwas lablanda gwenan, hen yasik tabin hip de zi mo tawa tabinsi dekame timbwas ul gwenan.
⁵ Sap yasik tabin zini in bolte-boltekam anakare olkam aha zisi tru-tru nulbirida gwenan, “Kristen zini in hon bahem ang ta gwen. Ki em molye Alapsa tame lak.” Hwena zeno mae mo tawa tabinsi nen ema timbwas ul gwizimnin– ngatan zi mo lang nakore janana inkam. Hen zini men zen botonkam de tawa tabin sin ang ta gweꞌan, nen ema etan desa Kristus osan dep lahyohal gweꞌan.
⁶ Hen em kime Kristus onak dawemkam etal gwesiꞌik, hwena dekon men zen etan aha ora san ang taꞌak, ee asa desa Alap mo Enho nakore sosonkam karek tabirzir.
⁷ Zi de ebon mae onak zenaka anakan kira tanna, “Ëe an hen Paulus makarena– Kristus mo zer sonenna, emsa de hen tawa ta gwibin hip,” zep zen dwan hen maka zere mo kirekam de gun nukon anakan dam gulsuku, “Paulus hen Kristus mo zer sonen nakake, zep ee babe husus gweblan olsa gubiridan.”
⁸ Ëe eiwa ama sap etan-etankam enaka gu gweblaꞌan, “Bian mes asa zere mo nganak de syal gwe-gwen hap zer soneka,” hwena ee molye ere mo kirekam de ola insa saher gwibik. Sap asa Bian eno mae mo ei nika de timbwas gulzimdin hip hom zer soneka. Hwena eno mae mo eisi dikim mam gulzimdin hip zer soneka.
⁹ Hwena asa anakan bahem enlala gwe-gweblan, “Paulus zere mo surat-suratkam asa airin-airin ta gwibiꞌira.”
¹⁰ Sap ahakon man asa nen gweblanan, “Paulus mo surat-suratna sosonna hen ol drak-drakkam dena. Hwena zen de hatankam zeno ola soson naka hom. Dekam hom mae ol drak-drakkam nesa tonbirida gwenda.”
¹¹ Men zen kirekam asa enlala ne gweblaꞌan, ee angkam bira! Zen aen de hata zankam sa asa tame dal, “Hare eiwa, Paulus ol drak-drakkam de jalse gwibiridanna hen tawa nakake– suratnak men kirekam hen ale gul gwendaye.”
¹² Eiwa, men zen anakan zenaka boltere da gwibirin, “Ëe hen Paulus kiye,” hwena ee home ki dwam gweꞌan– zeno mae mo kim de anakan enaka boltere tan hap, “Ëe an hen deban mae apdenak.” Zen man tim nul gweꞌan, “Serkam de zenaka boltere tan zini, zen eiwa mamna.” Zen zep zere mae mo hliknak de biti gwen en wenyaka anakan boltere da gwibiꞌin, “Em an ere makarena.” Hwena kirekam de egwe gwen zini, zen enlala joblo-topna.
¹³ Hwena men zen abe hap dakastilbliꞌan– desa de boltere gul gwen hap, ee desa en asa boltere gul gwer: Ngana men desa Alap Zena abe hap zerblaka, desa en asa boltere ta gwer. Hen desa kime syal gweblak, ee dekam zebe ebon mae onak ol dawemna golhatak. Hwena aha mo ngana bejene bola-bolakam anakan gublun, “Zen ano nga.”
¹⁴ Ëe de nonol ebon mae onak ol dawemna insa golhatazan sremkam, ki eiwa ee botonkam amaka enaka boltere taꞌan. Hwena ee mese nonol golhatazak.
¹⁵ Zep ee amaka ere mo syal gweblan nganak denaka boltere tabiꞌin. Hwena aha zi mo nganak de wenya molye. Hen ee ama emsa dwam gwibiridaꞌan: Eno mae mo ei nik de mam gweꞌak, zen dekam sa aha zi emsa de kirekam hlauluda gwenkam beyakam eKristen gwe song gwer.
¹⁶ Kirekam de lwankam ee amaka aha lang san dep etan ayang guꞌun– desan de etan ol dawemna insa eiyas gil song gwen hap. Dekam aha zi bejen bola-bolakam asa anakan gublun, “Zen ano syal gweblan ngasa al taꞌara.”
¹⁷ Sap nere mae mo syalsa de enlala gwibinni, zen diki men kirekam Alap mo olak lwak, kirekam de enlala gwibin. Sap zewe a kirekam mo lwakye, “Zini diki Bian ensa zen boltere ta gwen. Zenaka bap zen.”
¹⁸ Zep zi de zenaka boltere tanna, kirekam hom dakastiꞌin. Diki Bian Zen gublun, “Em dawemkame ere mo nganak syal gweka,” zen ki mes eiwa sam gwesili.