Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri se’reang allo anjo na’bi-na’bi naajaraka Elisa, akkunrarengi ri ia. Nakana ke’nanga, "Anne pammantanganta sanna’ seppa’na.
2 Kipa’biammi a’lampa ikambe a’lampa anna’bang poko’ kayu ri birinna Binanga Yordan, nampa nibangung pammantanganta anjoreng." Appialimi Elisa angkana, "Baji’mi."
3 Kalase’renna battu ri ke’nanga ampassa-passai sollanna amminawang Elisa siagang ke’nanga. Situjumi Elisa,
4 nampa a’lampamo ke’nanga siagang. Ri battunamo ke’nanga ri biring Binanga Yordan, appakkaramulami ke’nanga anna’bang poko’ kayu.
5 Ti’ring ta’lappasa’mi mata pangkulu’na kalase’renna ke’nanga natu’guru’ naung ri je’neka. Ammarrammi anjo taua na nakana ri Elisa, "O Bapa’, anjo pangkuluka, pangkulu’ niinrang!"
6 Akkuta’nammi Elisa angkana, "Kemaei tu’guru’?" Nipicinikiammi ri anjo taua tampa’ katu’guranna anjo pangkuluka. Nampa annatta’ Elisa sipolong kayu siagang napasambila antama’ ri anjo tampaka. Nammumbamo nai’ ri tompo’na je’neka anjo pangkuluka.
7 Nakanamo Elisa, "Allei!" Naallemi anjo taua anjo pangkuluka.
8 Ri se’reang wattu a’bunduki tu Siria a’bali tu Israel. Le’ba’na sipa’bicara siagang sikamma perwira tantarana, napattantumi karaeng Siria angkana kemae ke’nanga musti appare’ kema.
9 Mingka akkirimmi Elisa kabara’ mange ri karaeng Israel untu’ ampakaingaki sollanna tena na’lampa ke’nanga mange anjoreng ri tampaka, lanri biasana tu Siria anjorengi angngalle oloang.
10 Jari napakainga’mi karaeng Israel sikamma tau niaka a’reppese’ ammantang anjoreng sollanna sadia-sadia. Kammami anjo pissiapa arei Elisa ampakaingaki karaenga.
11 Sanna’mi birisi’na karaeng Siria ri anjo passalaka, sa’genna nakio’ sikamma perwira tantarana nampa akkuta’nang angkana, "Ma’nassa nia’ tau ri katte a’bali’ballang. Inai anjo taua? Paui!"
12 Nia’mo kalase’renna anjo perwiraya appiali angkana, "Tena manna sitau appakamma karaeng. Mingka Na’bi Elisa passabakkanna! Iami ampabattui mae ri karaeng Israel apa kipaua, manna pole nalalang ri kamara’ katinroanta kipau."
13 Naparentakammi karaenga angkana, "Salidiki angkana kemae pammantanganna, sollanna akkulle kujakkala’." Nipauammi ri taua angkana niaki Elisa ri Dotan.
14 Nampa nakirimmo karaeng Siria mange anjoreng se’re pasukang lompo nirurungang ri jarang siagang kareta pa’bundukang. Ri wattunna bangngimo battumi ke’nanga anjoreng ri kotaya nampa nakurung.
15 Ammukona, ri bari’basa’ dudua ri wattunna ambangung siagang assulu’ palayanna Elisa, nacini’mi tantara Siria angkurungi anjo kotaya, sangka’ siagang jarang na kareta pa’bundukanna ke’nanga. Jari ammotere’mi mange ri Elisa angkana, "Ballasa’ maki’ bapa’! Apa musti nigaukang?"
16 Appialimi Elisa angkana, "Teako mallakki. Ia niaka angngagangki’ la’bi jaiangngangi naanjo ke’nanga."
17 Nampa appala’ doang Elisa angkana, "O Batara, dasi-dasi natassungke matanna palayangku sollanna akkulle accini’!" Niturukiammi pappala’na Elisa, sa’genna ri wattunna assaile palayanna, nacini’mi anjo monconga rassi siagang jarang na kareta a’rinra angkulilingi Elisa.
18 Ri wattunna maju anjo tu Siria, appala’ doangi Elisa angkana, "O, Batara, Kipa’jari buta laloi anne taua ngaseng." Niturukiammi ri Batara anjo pappala’na Elisa, sa’genna a’jari buta kabusu’ ke’nanga.
19 Battumi Elisa mae ri ke’nanga nampa nakana, "Sala oloang ngasengko antu. Anne kotaya teai kota nuboyaiya." Nampa nirurungang ri Elisa ke’nanga mange ri Samaria.
20 Ri wattunna napantamakki ke’nanga anjo kotaya, appala’ doammi Elisa angkana, "O, Batara, Kisungkei matanna ke’nanga sollanna akkulle accini’ ke’nanga." Niturukiammi pappala’ doanna Elisa; nasungkemi matanna ngaseng anjo taua sa’genna lannasa’ nacini’na angkanaya niaki ke’nanga ri kota Samaria.
21 Ri wattunna nacini’ karaeng Israel anjo tu Siria, akkuta’nammi ri Elisa angkana, "Elisa, apaka musti kubunoi anne taua ngaseng?"
22 Appialimi Elisa angkana, "Teaki’! Ba’lalo tantara kijakkalaka lalang pa’bundukanga natakkullea kibuno, la’biangampa anne. Kisarei ke’nanga kanre siagang je’ne’ inung, nampa kilappassang ammotere’ ke’nanga mange ri karaenna."
23 Jari appare’mi karaenga passua’-suarrang lompo untu’ ke’nanga. Baku’na anjo wattua ammarimi tu Siria ambunduki pa’rasangang Israel.
24 Siapa are wattu ribokoanganna, battumi Benhadad, karaeng Siria, angngerangi sikontu tantarana untu’ ambunduki tu Israel. Nakurummi ke’nanga kota Samaria,
25 sa’genna naallemo cipuru’ lompo tau lalanga ri anjo kotaya; manna se’re ulu keledai niballimi 80 doe’ pera’, siagang ruaya ons tai bodobangkeng niballimi lima doe’ pera’.
26 Ri se’reang wattu, sitabanna a’jappa karaenga rate ri tembo’na kotaya, nia’mo sitau baine akkio’ angkana, "Karaeng, kitulunga’!"
27 Appialimi karaenga angkana, "Punna tena Natulungko Batara, antekamma olona nainakke lantulungko? Tena gandungku siagang tena je’ne’ anggoro’!
28 Apa kasukkarrannu?" Appialimi anjo bainea angkana, "Anne agangku napangaruia’ angkanrei siagang rolong anakku, nampa ammukona ana’na kukanre siagang.
29 Lanri kammana anjo kupallumi anakku nampa nakanre ikambe. Ammukona ri wattu kupala’na sollanna nipallu ana’na, nacokkoi anjo ana’na!"
30 Nalangngere’na karaenga anjo passalaka, nakekke’mi pakeanna napakamma si’na nyawana. Sikamma tau niaka ammenteng ri ampi’na anjo temboka akkullei nacini’ angkanaya anjo baju lalanna kaeng karung.
31 A’gorami karaenga angkana, "Anne alloa musti mate memangi Elisa. Lappassamma’ Nahukkung Allata’ala manna pole antekamma battala’na punna tena nakubunoi Elisa!"
32 Nampa nasuromo karaenga se’re tau a’jappa riolo mange ri balla’na Elisa. Anjo wattua niaki Elisa ri balla’, siagang siapa are tau toa-toana pa’rasanganga sitabang a’manaikang anjoreng. Lalang tenanapa nabattu anjo surona karaenga, nakanamo Elisa mae ri anjo sikamma tau toa-toana pa’rasanganga, "Parhatikangi! Anjo pabuno-bunoa assuroi tau battu mae untu’ ambunoa’. Punna battu sinampe’ anjo taua, tongkoki pakke’buka siagang teako pa’biangi antama’. Ri bokona laniaki kalenna karaenga."
33 Tenapa napuppusu’ bicaranna Elisa, battumi karaenga anjoreng na nakana, "Anne kasusaanga Batara ampabattui mae ri katte! Jari apapi matu-matungku manrannuang ri pannulunNa?"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA