Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Narapi’mi wattunna ero’ Batara angngangkaki Elia nai’ ri suruga lalang ri anging barubua. Anjo wattua a’lampami Elia siagang Elisa battu ri Gilgal,
2 nampa ri tangngana aganga nakanamo Elia mae ri Elisa, "Ammantangko anrinni. Nasuroa’ Batara a’lampa mange ri Betel." Mingka appialimi Elisa angkana, "Lanri Batara mattallasaka siagang lanri nyawata bapa’, tena nakuero’ ambokoiki’." Jari siagammi ke’nanga ampatulusuki lampana sa’genna mange ri Betel.
3 Nia’ siapa are na’bi ammantang anjoreng a’lampa mange ambuntuli Elisa siagang akkuta’nang angkana, "Nuassenji angkanaya anne alloa la’lampai bapa’nu ambokoiko lanri laniangkaki ri Batara?" Appialimi Elisa angkana, "Iyo, kuassenji. Mingka teami nibicarai anjo passalaka."
4 Nampa nakanamo Elia ri Elisa, "Ammantang mako anrinni, Nasuroa’ Batara a’lampa mange ri Yerikho." Mingka appialimi Elisa angkana, "Lanri Batara mattallasaka siagang lanri nyawata bapa’, tena nakuero’ ambokoiki’." Jari siagammi ke’nanga ampatulusuki lampana mange ri Yerikho.
5 Nia’ siapa are na’bi ammantang anjoreng a’lampa mange ambuntuli Elisa siagang akkuta’nang angkana, "Nuassenji angkanaya anne alloa la’lampai bapa’nu ambokoiko lanri laniangkaki ri Allata’ala?" Appialimi Elisa angkana, "Iyo, kuassenji. Mingka teami nibicarai anjo passalaka."
6 Nampa nakanamo Elia ri Elisa, "Ammantang mako anrinni. Nasuroa’ Batara a’lampa mange ri Binanga Yordan." Mingka appialimi Elisa angkana, "Lanri Batara mattallasaka siagang lanri nyawata bapa’, tena nakuero’ ambokoiki’." Jari siagammi ke’nanga ampatulusuki lampana mange ri Binanga Yordan,
7 siagang nia’ limampulo na’bi ampinawangi ke’nanga. Nampa ammantammo Elia siagang Elisa ri biring binangaya, nampa anjo limampuloa na’bi ammentengi tena siapa bellana battu ri anjo tampaka.
8 Nala’gasimi jubana Elia, nampa nagulung siagang napatunrung ri tompo’na je’neka ri anjo binangaya. Nata’bage ruamo anjo je’neka, sa’genna akkullemo Elia siagang Elisa a’jappa ri dapara’na kalotoroka anjo binangaya.
9 Battuna anta’leang, nakanamo Elia ri Elisa, "Pala’mi apa nukaerokia ri nakke lalang tenanapa Naangkaka’ Batara siagang kubokoiko!" Appialimi Elisa angkana, "Kipassareammi mae ri nakke kakoasanta bapa’, sollangku akkulle ansambeangki’."
10 Appialimi Elia angkana, "Edede, anjo sukkara’ dudui, mingka punna nucinikka’ ri wattungku niangka’ ri Batara, anjo pappala’nu laniturukiangko. Punna tena nucinikka’, tena nanituruki anjo pappala’nu."
11 Lalang a’jappana ke’nanga, tuli sipa’bicarana. Ti’ring nia’mo se’re kareta a’rinra nibeso’ ri ruang kayu jarang a’rinra battu ampasisa’laki ke’nanga sipa’rua, nampa niangka’ Elia nai’ ri suruga ri anging barubu.
12 Naciniki Elisa anjo kammaya nampa akkio’ angkana, "Elia, bapakku! Bapakku! Pajagana Israel malompoa! Tenami bapakku!" Jari lanynya’mi Elia battu ri paccini’na Elisa. Si’nami nyawana Elisa na nakekke’ jubana a’jari rua.
13 Nampa narappung jubana Elia tu’guruka. Le’baki anjo ammotere’mi nampa ammenteng ri birinna Binanga Yordan,
14 nampa napatunrung anjo jubana Elia ri tompo’na je’neka nanakana, "Kemae Batara, anjo Allata’alana Elia?" Le’baki napatunrung anjo jubaya ri tompo’na je’neka, ta’bage ruami anjo je’neka nampa a’jappa anta’leang.
15 Anjo limampuloa na’bi naciniki anjo apa kajarianga, nampa nakana ke’nanga, "A’lette’mi koasana Elia mae ri Elisa!" Battumi ke’nanga mange ri Elisa nampa su’ju’ ke’nanga ri dallekanna
16 nampa nakana ke’nanga, "Ikambe niakki’ limampulo tau, sangnging tau kassa’ ngaseng. Lanri kammana anjo umba ki’lampa mange amboyai Elia bapa’nu. Gassingka nierangi ri RohNa Batara mange ri monconga yareka mange ri ka’bunga nampa niboli’ anjoreng." Appialimi Elisa angkana, "Tea’ mako!"
17 Mingka tuli nipassana ri ke’nanga sa’genna ammiomo Elisa. Jari a’lampami anjo limampuloa na’bi mange amboyai Elia tallungallo, mingka tena nabuntuluki ke’nanga Elia.
18 Nampa ammotere’ ke’nanga mange ri Elisa niaka attayang ri Yerikho. Nakanamo Elisa ri ke’nanga, "Sai le’ba’ mako kupauang angkanaya tea’ mako a’lampai?"
19 Nia’ siapa are tau ri Yerikho battu mange ri Elisa na nakana, "Bapa’, sangkamma kicini’ kalenta, anne kotaya bajiki, mingka je’ne’na tabajikai siagang nalari cera’ baine tiananga punna nainungi."
20 Nakanamo Elisa, "Angngalleko mangko’ beru, nampa nubonei ce’la." Jari naerammi ke’nanga anjo apa napalaka Elisa.
21 Nampa a’lampamo Elisa mange ri timbuseng je’neka na napasambila anjo ce’laya antama ri je’neka siagang nakana, "Kammaminne kananNa Batara, ‘Kupa’jari tangkasaki anne je’neka sollanna tenamo napassabakki kamateanga siagang nalari cera’ baine tiananga!’"
22 Appakkaramula anjo wattua baji’mi anjo je’neka situru’ kana napaua Elisa.
23 Le’baki anjo a’lampami Elisa battu ri Yerikho mange ri Betel. Ri tangngana aganga nia’mo siapa are ana’-ana’ assulu’ battu ri kotaya ancau-caui. Akkio’-kioki ke’nanga angkana, "He, ulu pe’da’, ulu pe’da’, a’lampako anrinni!"
24 Assailemi Elisa na naciniki ke’nanga siagang nasumpai ke’nanga lanri arenNa Batara. Anjo memang wattua nia’mo ruang kayu macang gana assulu’ battu lalang ri romanga nampa nakae-kae kalenna patampulo anrua tau battu ri anjo ana’-anaka.
25 Napannarrusuki lampana Elisa mange ri Moncong Karmel, nampa ammotere’ mange ri Samaria.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA