Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kenca dua tahun dekahna Jehoas anak Jehoahas jadi raja Israel, jadi raja ka Amasia anak Joas i Juda.
2 Tupung e umurna dua pulu lima tahun, janah dekahna ia erkuasa i Jerusalem lit dua pulu siwah tahun. Nandena Jehoadin i Jerusalem nari.
3 Ilakokenna si ngena ate TUHAN, tapi ia la bali ras ninina Raja Daud; pengelakona bali ras pengelako bapana Joas.
4 La iruntuhkenna ingan-ingan ersembah kalak perbegu, emaka terus kalak mpersembahken persembahen gelehen ras nutung kumenen i bas ingan e.
5 Kenca nggo nteguh kekuasanna, ibunuhna pegawai-pegawai si munuh bapana.
6 Amin bage pe anak-anakna labo ibunuhna tapi iikutkenna si nggo iperentahken i bas Undang-undang Musa, "Ula bunuh orang tua erkiteken kejahaten si ilakoken anak-anakna, bage pe ula bunuh anak-anak erkiteken kejahaten si ilakoken orang tuana. Erkiteken kejahaten si ilakokenna saja ngenca maka sekalak jelma banci ibunuh."
7 Amasia munuh sepuluh ribu tentera kalak Edom i Baluren Sira. I bas sada pertempuren idatna Kota Sela, jenari isambarina gelarna jadi Jokteel. Gelar eme ipake ngayak genduari.
8 Kenca bage isuruh Amasia piga-piga kalak persuruhen ndahi Jehoas raja Israel, gelah erperang ia ras.
9 Tapi itenahken Raja Jehoas mulihken balasenna nina, "Sekali jadi lit rambah si erduri i Deleng Libanon nenahken berita ku kayu cemara nina: 'O, cemara berekenlah anakndu singuda-nguda man anakku jadi ndeharana.' Tapi mentas i je sada rubia meliar jenari iperjakina rambah duri ndai.
10 Genduari o Amasia, nggo italukenndu bangsa Edom, emaka meganjang kal ukurndu. Cukuplah min iakapndu kerna gelarndu si terberita janah tadinglah kam i rumah. Ngkai maka ilegindu kesusahen? Si e maba kecedandu ngenca ras rayatndu."
11 Tapi la nggit Amasia megikenca. Emaka berkat Raja Jehoas ras tenterana, iperangna Amasia i Bet Semes i negeri Juda.
12 Talu tentera Amasia, emaka kerina tenterana kiamen ku rumahna sekalak-sekalak.
13 Amasia itaban Jehoas, janah terus ia ku Jerusalem, iruntuhkenna tembok kota mulai i pintu Gerbang Eperaim nari terus ku pintu Gerbang Suki-suki, dauhna menam lit 200 meter.
14 Ibuatna kerina pirak ras emas si ijumpaina, kerina perkekas rumah pertoton ras kerina perbendeharan istana iangkutna mulih ku Samaria. Kalak tabanen pe ikut ibabana.
15 Kerina si debanna si nilakoken Jehoas subuk perbahanenna si nuduhken kinimbisanna i bas perang ngelawan Raja Amasia i Juda nari, isuratken i bas kitap Sejarah Raja-raja Israel.
16 Jehoas mate janah ikuburken i kuburen raja-raja i Samaria, emaka anakna Jerobeam II nggantiken ia jadi raja.
17 Raja Amasia i Juda nari lit sepulu lima tahun nari dekahna nggeluh kenca kematen Raja Jehoas Israel nari.
18 Kerina si debanna si ilakoken Amasia isuratken i bas kitap Sejarah Raja-raja Juda.
19 Lit kalak erpekat i Jerusalem munuh Amasia; erkiteken si e lompat ia ku Kota Lakis, tapi iikutken musuh-musuhna, ibunuhna ia.
20 Maitna ibaba mulih ku Jerusalem tare kuda, jenari ikuburken i kuburen raja-raja i Kota Daud.
21 Kenca bage rayatna nangkuhken anakna Usia, umur sepulu enem tahun, jadi raja Israel.
22 Kenca mate bapana, ibuat Usia mulihken Kota Elat, emaka ipehulina mulihken kota e.
23 Kenca sepulu lima tahun dekahna Amasia anak Joas jadi raja Juda, Jerobeam II anak Jehoas pe jadi raja i Israel. Dekahna ia erkuasa i Samaria lit empat pulu sada tahun.
24 Ia erdosa man TUHAN, erkiteken ikutkenna usihen si la mehuli si ibahan Raja Jerobeam I anak Nebat, si mabai Israel erdosa.
25 Italukenna mulihi kerina daerah si gelgel jadi kerajangen Israel, mulai Dalan Hamat nari i Utara terus ku Lawit Mate i Selatan. Enda me si nggo ipadanken TUHAN, Dibata kalak Israel, arah suruh-suruhenna nabi Juna anak Amittai, i Gat Heper nari.
26 Idah TUHAN uga pagitna kiniseran kalak Israel, sada kal pe la lit si nampati bangsa e.
27 Erkiteken TUHAN labo ersura-sura ngkernepken Israel seh bene rasa lalap, emaka IsampatiNa arah Raja Jerobeam II.
28 Kerina si debanna si ilakoken Jerobeam II, kinimbisanna i bas perang, kuga ia pepulihken Damaskus ras Hamat ku Israel, kerina si e isuratken i bas kitap Sejarah Raja-raja Israel.
29 Jerobeam mate, jenari ikuburken i kuburen raja-raja. Emaka anakna Sakaria nggantiken ia jadi raja.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA