Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri wattunna naasseng Atalya angkanaya matemi ana’na, iamintu Karaeng Ahazia, naparentakammi sollanna nibuno kabusu’ sikontu kaluargana Ahazia.
2 Yoas iamintu ana’na Ahazia sike’de’ tommami nipasibuno kabusu’ siagang ana’-ana’ bura’nena karaenga maraengannaya; mingka ta’lappasaki lanri nipasalamaki ri purina bainena niarenga Yoseba. Nierangi Yoas siagang amma’ susuna mange nicokko lalang ri se’reang bili’ katinroang ri Balla’Na Batara.
3 Annang taungi sallona naparakai Yoseba anjo anaka lalang ri Balla’na Batara ri wattunna Atalya ammarenta salaku karaeng baine.
4 Ri taung makatuju, sikamma perwira pangawala’ kalenna karaeng bainea kammayatompa sikamma pangawala’na balla’ karaenga nikioki ri Imang Yoyada untu’ assibuntulu’ siagang ia lalang ri Balla’Na Batara. Anjoreng nasuroi ke’nanga assumpa untu’ anggaukangi rancanana. Napappicinikangi Yoas, ana’ bura’nena Karaeng Ahazia, mae ri ke’nanga,
5 siagang naparentakang mae ri ke’nanga angkana, "Punna tugasa’ ngasengko ri allo Pammari-marianga, bage tallunnu battu ri kau musti a’jagako ri balla’ karaenga,
6 bage tallunnu maraenga a’jagako ri Pakke’bu’ Lompo Sur, nampa la’binnaya a’jagako ri pakke’bu’ lompo ri bokona sikamma pangawala’ maraenga.
7 Ruaya regu lappasa’ tugasaka ri allo Pammari-marianga, musti a’jagai ri Balla’Na Batara siagang pa’dang le’ba’ ta’bi’bu’ untu’ anjagai Karaeng Yoas. Musti nujagai manna pole a’lampa kemae, siagang sikamma tau eroka a’reppese’ mae ri kau ngaseng, musti nubunoi."
8 (11:7)
9 Naturukimi sikamma anjo perwiraya anjo parentana Yoyada siagang naerammi ke’nanga ana’ buana mae ri ia, iamintu sikamma musti tugasaka siagang lappasa’ tugasaka ri anjo allo Pammari-marianga.
10 Napassareammi Yoyada mae ri ke’nanga iamintu anjo perwira-perwiraya, poke-pokea siagang pakkakasa’ pannangkisi’na Karaeng Daud, niaka niboli’ lalang ri Balla’na Batara.
11 Nampa sikamma pangawalaka massing angngallemi tampa’ ri tammulilina bageang ri dallekanna anjo Balla’Na Batara, massing le’ba’ ta’bi’bu’ pa’danna, untu’ anjagai karaenga.
12 Le’baki anjo nierammi Yoas assulu’ ri Yoyada, nampa napataba ri ulunna Yoas songko’ kakaraenganga, siagang napassareang mae ri ia kitta’ HukkunNa Allata’ala. Nilanti’mi Yoas a’jari karaeng, nampa nipa’la’bang anjo passalaka mae ri sikontu ra’yaka. Attempa lima kabusu’mi ke’nanga siagang akkio’ rannu angkana, "La’bui umuru’na karaenga!"
13 Nalangngereki Atalya anjo sa’ra rannuna sikamma pangawalaka siagang ra’yaka. Akkaro-karomi a’lampa mange ri Balla’Na Batara, iamintu ri tampa’na tau jaia a’rappung.
14 Nacini’mi anjo karaeng berua ammenteng ri pakke’bu’ antamaya ri Balla’Na Batara ri napattampakkia nilanti’, nitammulili ri perwira-perwiraya siagang patui’ tarompeka. Sikontu ra’yaka akkio’ rannu kabusuki nampa nipasa’raya tojeng tarompeka. Lussa’mi nasa’ring nyawana Atalya nanakekke’ pakeanna, siagang a’gora angkana, "Pasingkongkolang! Pasikongkolang!"
15 Tena napa’biangi Yoyada nibuno anjo Atalya ri ampi’na Balla’Na Batara. Jari nakanamo ri sikamma perwiraya, "Erangi assulu’ battu ri barisanna pangawalaka siagang bunoi inai-nai ero’ ampasalamaki."
16 Nijakkala’mi Atalya ri ke’nanga, nampa naerang mange ri balla’ karaenga. Anjorengi nibuno ri dallekanna Pakke’bu’ Lompo Jaranga.
17 Nasuroi Imang Yoyada Karaeng Yoas siagang ra’yaka appare’ parjanjiang siagang Batara angkanaya la’jari ke’nanga Umma’Na Batara. Nasuro tongi karaenga appare’ parjanjiang siagang ra’yaka.
18 Le’baki anjo appada-padami ra’yaka a’bakka mange anruntungi balla’ panynyombanga ri Baal. Tampa’ pakkoro’bangnganna siagang patung-patunna niancuru’ kabusuki. Nampa imanna Baalka iamintu Matan, nibunoi ri dallekanna sikamma anjo tampa’-tampa’ pakkoro’bangnganga. Nasaremi Yoyada tugasa’ pangawalaka untu’ anjagai Balla’Na Batara,
19 nampa kalenna siagang sikamma perwiraya, sikamma pangawala’ kalenna karaenga, sikamma pangawala’na balla’ karaenga kammayatompa sikontu ra’yaka narurungammi Karaeng Yoas battu ri Balla’Na Batara sa’genna mange ri balla’ karaenga. Antama’mi Yoas battu ri Pakke’bu’ Lompo Pangawala’, nampa ammempo rate ri empoang kakaraenganga.
20 Rannu ngasemmi nyawana sikontu ra’yaka. Nasannammo kotaya siagang le’ba’ tommi nibuno Atalya.
21 Tuju taung umuru’na Yoas ri wattunna a’jari karaeng Yehuda.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA