Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E bakto Atalya ngagali ja’ Ahaziya, pottrana, la seda, laju makon sopaja sabalana Ahaziya epate’e kabbi.
2 Yowas, pottrana Ahaziya para’ epateyana keya abareng ban tra-pottrana Ahaziya se laen, tape salamet, sabab etolong Yoseba, iya areya pottra bine’na Rato Yoram, taretanna Ahaziya. Yowas ban anjuna egiba pas eerrep e dhalem settong kamar katedhungan e Padalemman Socce.
3 Nem taon abidda Yoseba meyara kana’ jareya e dhalem Padalemman Socce saabidda Atalya jumenneng rato.
4 E taon se kapeng petto’, para parwira pangawal pribadhina rato ban para pangawalla karaton edikane Imam Yoyada ka Padalemman Socce. E jadhiya reng-oreng buru epakon asompa ajalannagiya rancanana. Imam jareya noduwagi Yowas, pottrana Rato Ahaziya ka reng-oreng jareya,
5 laju apareng dhabu kantha reya, "Mon ba’na atugas e are Sabat, sapartellonna ba’na kodu ajaga e karaton,
6 sapartellonna ajaga e Labang Saketheng Sur, ban karena ajaga e labang saketheng e budhiyanna wal-pangawal laenna.
7 Regu se dhadhuwa’ se la ta’ atugas e are Sabat, sopaja ajaga e Padalemman Socce sambi neggu’ peddhang se la eonos kaangguy ajaga Rato Yowas. Rato jareya meyosa dha’emma’a bai kodu jaga terros. Pa’-sapa’a se nyemma’e ba’na kodu pate’e."
8 (11:7)
9 Para parwira jareya’ atoro’ka papakonna Yoyada buru, reng-oreng baba’anna se kodu atugas ban se la ta’ atugas e are Sabat jareya epakompol laju egiba ka Yoyada.
10 Para parwira jareya bi’ Yoyada eparenge bak-tombak ban meng-tameng kaagunganna Rato Daud se esempen e Padalemman Socce.
11 Saellana jareya para pangawal buru, sambi neggu’ peddhang se la eonos manjeng e kennengnganna bang-sebang e sakalenglengnga Padalemman Socce alindhungana ratona.
12 Saellana jareya bi’ Yoyada Yowas ebakta ka lowar, e serana laju eparenge makotha, ketab Hokomma Allah epassra’agi ka kana’ jareya. Yowas epajumenneng rato, ban parkara jareya laju eomommagi ka ra’yat. Reng-oreng padha akopa’ ban asorak, "Hidup rato!"
13 Rato Atalya meyarsa soragga para pangawal ban ra’yat jareya, laju duli meyos ka Padalemman Socce, e jadhiya bannya’ oreng abung-garibbung.
14 Atalya ngoladi rato se anyar jareya ngadek e labangnga Padalemman Socce kennengnganna panobadanna rato menorot kabiyasa’anna, ekalenglenge ra-parwira ban reng-oreng tokang topena tarompet. Ra’yat padha asorak kaperagan kabbi, dineng tarompedda padha epamonye. Atalya nyebbit rasoganna, panggaliyanna ketter, sambi aera’, "Kiyanat! Kiyanat!"
15 Bi’ Yoyada Atalya ta’ eparengngagi epate’e e sabingkerra Padalemman Socce, daddi salerana laju adhabu ka para parwirana, "Kassa’ rato jareya giba kalowar lebat e barisanna pangawal; sapa’a bai se aehteyar nolonga rato jareya pate’e."
16 Atalya epega’ laju egiba ka karaton. E jadhiya rato jareya epate’e e adha’anna Labang Saketheng Jaran.
17 Imam Yoyada makon Rato Yowas ban ra’yat agabay parjanjiyan ban PANGERAN se essena nyebbuttagi ja’ rato jareya ban ra’yadda daddiya ommadda PANGERAN. Laen dhari jareya rato epakon abadhi parjanjiyan ban ra’yat keya.
18 Saellana jareya ra’yat laju nyerbu magujur kowel Ba’al. ba-mezba ban ca-arcana epaancor, dineng Matan, imamma Ba’al epate’e e adha’anna ba-mezbana. Yoyada makon wal-pangawal ajaga Padalemman Socce,
19 saellana jareya asareng ban para parwira, para pangawal pribadhina rato ban para pangawalla karaton sarta sakabbinna ra’yat laju ngarak Rato Yowas dhari Padalemman Socce ka karaton. Yowas maso’ lebat Labang Saketheng Pangawal, pas alenggi e korse karaja’an.
20 Ra’yat padha perak kabbi, kottha taremtem, ban Atalya la epate’e.
21 E bakto jumenneng rato Yehuda jareya yuswana Yowas buru pettong taon.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA