Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sikontutojenna tenamo naparallu kutulisi’ mae ri kau ngaseng lalang sura’ anjo passala’ sumbangang nikiringa mae ri Umma’Na Allata’ala niaka ri Yudea.

² Kuassengi angkanaya nungai annulunga; na anne le’ba’mi kucarita mae ri taua ri butta Makedonia. Le’ba’mi kupau kalompoang pa’maikku mae ri ke’nanga angkanaya battu ri taung allaloaji nasadiamo sari’battanga ri butta Akhaya assare sumbangang. Na iaminjo sumanga’nu ampakalompo tongi sumanga’na ke’nanga.

³ Kamma-kamma anne kusuromi Titus siagang anjo rua sari’battanga battu mae ri kau ngaseng. Sollanna akkulle a’butti anjo kalompoang pa’mai’ le’baka nacarita ikambe teai poro carita bawang. Jari, paralluko sadia, nasaba’ le’ba’mi kupau ri ke’nanga angkanaya sadia ngaseng mako.

⁴ Kubata-batai gassingka nia’ todong tu battu ri butta Makedonia amminawang ri nakke punna battua’ mae ri kau sallang. Na punna narapikangko tena nusadia, teaimi sipato’ siri’-siri’na ikambe. Nasaba’ le’ba’mi nipau angkanaya sanna’ akkullenu nipatappa’! Nampa ikau pole lasanna’ todong siri’-siri’nu.

⁵ Iaminjo saba’na naparallu kusuro a’lampa riolo anjo ke’nanga mae ri kau, angngurusuki anjo sumbangang le’baka nupa’janjiang. Kammami anjo kugaukang sollanna punna battua’ sallang, sadiami anjo sumbangannu. Lanri kammana, a’nassami angkanaya tena nabattala’ passangalinna te’nei pa’mai’nu ampassareangi anjo sumbanganga.

⁶ U’rangi laloi! Angkanaya inai-nai a’lamung sike’de’, sike’de’ tonji wassele’ lanagappa. Mingka inai a’lamung jai, lajai tongi wassele’ nagappa.

⁷ Parallui taua massing assare siagang te’ne pa’mai’na. Teako assarei siagang bata-bata yareka battala’ pa’mai’. Nasaba’ nikarimangngi ri Allata’ala tau te’nea pa’mai’na assare.

⁸ Makoasai Allata’ala assareko barakka’ allumpa-lumpa, sollanna tena nukakurangang ri apa-apa nuparalluanga. Ba’lalo lakala’biangko, sollannu akkulle a’gau’ baji’ siagang appare’ amala’.

⁹ Ri passala’na Allata’ala nia’ tattulisi’ lalang ri Kittaka angkanaya, "Appakio’-kioroki mae ri tu kasi-asia; mannannungangi kabajikang pa’mai’Na."

¹⁰ Allata’ala ampasadiai bine napakioroka taua siagang kanre niparalluia. Ia tommi ampasadiai siagang ampa’jari jai anjo bine le’baka nupakioro’, sa’genna katambang todong wassele’na anjo apa le’baka nupa’lammorang.

¹¹ Lanri kammana, laganna’ mako ri sikontu kaparalluannu, sa’gennu tuli akkulle malammoro’ assare. Na anjo passarenu ngaseng, napa’bage-bageanga ikambe, la’jari passabakkammi najai tau lappala’ sukkuru’ mae ri Allata’ala.

¹² Nasaba’ anne gau’ baji’ nugaukanga, tena naporo lappa’ganna’ bawang mae ri kakuranganna Umma’Na Allata’ala. Passangalinna la’jari tongi passabakkang najai tau lappala’ sukkuru’ mae ri Allata’ala.

¹³ Na battu ri iami anjo kabajikang nupappicinikanga, najaimo tu Karisteng ri Yudea lamammuji mae ri Allata’ala. Lanri nacini’na ke’nanga antekamma jarre’nu mae ri Kabara’ Baji’ nupinawanga, iamintu ri sesena Almasi. Kammayatompa mammujimi ke’nanga ri Allata’ala lanri lammoro’na pa’mai’nu ambage-bagei ke’nanga siagang tau maraenga, apa-apa niaka ri kau.

¹⁴ Na lanapappala’ doangangko siagang pa’mai’ mangngarimangngi mae ri kau, lanri sanna’ baji’Na Allata’ala mae ri kau.

¹⁵ Paralluki’ appala’ sukkuru’ mae ri Allata’ala, lanri teai sipato’ lompona anjo passareNa!

2 Korintus

Video 2 Korintus 9

Ikuti Kami:

KONTAK | PARTISIPASI | DONASI