Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Si tuhuna labo perlu kusuratken kerna penampat si isehken man kalak Kristen si sangana i bas kekurangen e.
2 Kueteh maka ersuruh nge ukurndu guna nampati, janah kupujiken pe kam i tengah-tengah kalak Makedoni enda. Kukataken man bana, "Senina-senina si i propinsi Akaya tahun nderbih kin nggo sikap nampati." Janah erkiteken ketutusenndu e teremen i bas ia nggo keke ukurna.
3 Aminna pe bage isuruh kami ka nge senina-senina enda, gelah kai si nggo ipujiken kami kerna kam la sia-sia. Dage bagi si nggo kukataken e, sikap dage kam.
4 Adi lang, maka adi reh kalak Makedoni ras aku janah idapeti kami kam la sikap, tentu mela iakap kami, apai denga ka kam -- sabap tek kal kami man bandu.
5 Emaka perlu kuakap mindo kempak senina-seninanta enda berkat leben asa aku ndahi kam gelah isikapkenna leben perkuah ate si nggo ipadankenndu e. Adi nggo pagi leben sikap perkuah atendu e, bekas ukurndu meriah kap e, labo erkiteken terpaksa.
6 Inget lah maka kalak si sitik ngerdangken benih, sitik ka iperanina; kalak si melala ngerdangken benih, melala ka iperanina.
7 Sekalak-sekalak iberekennalah sue ras si nggo itetapkenna i bas ukurna; ula alu pusuh jungut-jungut tah pe bagi si terpaksa, sabap Dibata engkelengi kalak si mere alu ukur meriah.
8 Dibata ngasup mereken man bandu kasakai PemereNa alu sampur. Alu bage kerina keperlun guna dirindu i bas kai pe icukupi, seh maka sampur pe guna banci kam ndahiken dahin-dahin si mehuli si apai pe.
9 Kerna kalak si bage lit tersurat i bas Pustaka Si Badia, "Nggo iambur-amburna pemerena man si musil, kiniulinna e tahan seh rasa lalap."
10 Dibata si nikapken benih man kalak si merdang bage pe nakan si man pangan. Ia pe si nikapken benih si iperlukenndu. Ia ka nge si peturah benih e dingen si mereken ulih si erlipat ganda i bas kiniulinndu e nari.
11 Dibata erbahanca kam bayak i bas kai pe, seh maka kam melumbar mere katawari pe, janah nterem kalak ngataken bujur man Dibata erkiteken pemerendu si ialokenna bekas pendahin kami.
12 Sabap penampat si ipersembahkenndu e labo saja encukupi keperlun kalak Kristen si lit i bas kekurangen, tapi pe sampur jadi pengataken bujur man Dibata.
13 Kam ngaku maka patuh kam nandangi Berita Si Mehuli kerna Kristus. Pengakunndu e payo adi teridah kam menang i bas soal nampati. Janah erkiteken penampatndu e, nterem me pagi kalak muji Dibata. Tole pe ipujina Dibata erkiteken persadanndu si enteguh e, si teridah man bana ras man kerina kalak Kristen si deban.
14 Itotokenna pe kam alu dem keleng ate, nginget lias ate Dibata si la tersipati si seh man bandu.
15 Bujur ninta man Dibata kerna PemereNa si la terkataken nari uga ulina.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA