Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tiang pade laksaneang pegawẽan niki lantaran kemurahan Allah. Keranaq nike tiang pade ndẽq telang semanget.

² Tiang pade ndẽq kadu care saq nyeboq-nyeboq saq merilaq. Tiang pade ndẽq mẽlẽ licik begawẽan atao palsuang Manik Allah. Sebalikne tiang pade ngelayanin Allah siq atẽ saq murni menurut pekayunan-Ne. Keranaq nike, tiang pade ijinang selapuq dengan nilai diriq tiang pade lẽq dalem atẽ nurani ie pade lẽq arepan Allah.

³ Lamun Kabar Solah saq tiang pade beriteang nike masih ndẽqman tepahamin ẽndah, make cume dengan-dengan saq kenyeke nuju keancuran doang saq ndẽq paham,

⁴ nike dengan-dengan saq ndẽq percaye, saq pikiranne sampun tebuteang siq penguase jahat jaman mangkin niki, sehingge ie pade ndẽq serioq cahaye Kabar Solah mengenai kemuliean Almasih, saq jari gambaran Allah.

⁵ Berite saq tiang pade sampẽang nike ndẽqne berite mengenai tiang mẽsaq. Berite nike berite mengenai Deside Isa Almasih; bahwe Ie Tuhan; dait tiang pade hambe-hambe side pade lantaran Almasih.

⁶ Allah saq bemanik, "Lẽman peteng tiwoq cahaye." Allah nike ẽndah saq niwoqang cahaye nike lẽq dalem atẽnte, adẽq terang pikirante jari pahamin kemuliean Allah saq besinar lẽq penjarupan Almasih.

⁷ Laguq harte rohani saq solah nike tiang pade toloq lẽq dalem gerabah, nike diriq tiang mẽsaq. Siq care nike nyate bahwe keagungan kuase nike asalne lẽman Allah dait ndẽqne lẽman tiang pade.

⁸ Tiang pade tetindes lẽq dalem selapuq hal, laguq tiang pade ndẽq kejepit. Tiang pade bingung, laguq ndẽq jangke putus ase.

⁹ Tiang pade teaniaye, laguq tiang pade ndẽq teadẽqang mẽsaq-mẽsaq. Dait timaq tiang pade kereng tetimpak jangke geriq, laguq tiang pade ndẽq matẽ.

¹⁰ Ninggal-Ne Almasih masih tetep beridap lẽq awak tiang pade, adẽq kehidupan-Ne ẽndah jari nyate lẽq awak tiang pade.

¹¹ Sengonẽq tiang pade idup, tetep tiang pade teancem siq kematẽan lantaran Deside Isa, adẽq siq care nike kehidupan Deside Isa ẽndah bau tenyatayang lẽq awak tiang pade saq iniq binase niki.

¹² Niki artine bahwe lẽq dalem diriq tiang pade, araq kematẽan saq berusahe nyematẽq tiang pade, laguq tiang pade seneng bahwe araq kehidupan saq kenyeke giat lẽq dalem diriqde.

¹³ Lẽq dalem Kitab Suci tetulis maraq niki, "Tiang percaye, keranaq nike tiang ngeraos". Siq semanget percaye saq maraq nike ẽndah, tiang pade ngeraos sẽngaq tiang pade percaye.

¹⁴ Tiang pade yakin bahwe Allah saq sampun ngidupang malik Deside Isa Almasih, gen ngidupang tiang pade ẽndah bareng Deside Isa, dait gadingang side pade kance tiang pade ojok arepan-Ne.

¹⁵ Selapuqne nike jari kepentingan side. Sẽngaq sayan luwẽq dengan nerimaq rahmat, sayan luwẽq ẽndah do'e syukur saq tesampẽang tipaq Allah; siq care nike Allah temulieang.

¹⁶ Keranaq nike tiang pade ndẽq telang harepan, timaq tiang pade secare lahiriah jari sayan lemah laguq secare rohani tiang pade tejariang baru sebilang jelo.

¹⁷ Dait penderitean saq dẽang niki saq tiang pade alamin sementare, gen ngasilang sopoq kemuliean saq belẽq dait kekel. Kemuliean nike belẽqan lamun tebanding siq penderitean nike.

¹⁸ Sẽngaq tiang pade ndẽq merhatiang hal-hal saq penggitan, laguq hal-hal saq ndẽq penggitan. Sẽngaq saq penggitan cume tahen sementare, laguq saq ndẽq penggitan nike kekel selaẽq-laẽqne.

2 Korintus

Video 2 Korintus 4

Ikuti Kami:

KONTAK | PARTISIPASI | DONASI