Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 I kami e měkẹ̌koạ munara ini kai ual᷊ingu karal᷊ondon naungu Mawu Ruata. Kai ual᷊ingu ene hakịu i kami e tawe ikasasuen tiněnna.
2 I kami e tawe tumatol᷊e kakakoạ u munarang kararěndung kụ makạmamea. I kami e mạdiri měmunara kụ mẹ̌pakẹu kapande ipangakal᷊ẹ̌ arau měmaleleng hengetangu Mawu. I kami e mẹ̌tangkiang Mawu ringangu naung burěsi kerẹewe kapulun'E. Ual᷊ingu ene, i kami mělẹ̌harapẹ̌ u kěbị taumata e měngẹ̌ngarěgangbeng i kami e mapia su ral᷊ungu kawawurẹ̌sin naunge.
3 Kereu Injilẹ̌ kụ ilẹ̌habar'i kami e wědang l᷊aing ta kinahěnganeng, ute kate i sire apang mětẹ̌timona kawawinasa e tawe nakạhěngang.
4 Mahang duata měngẹ̌ngawasa dunia ini e něhěmbung tiněnnan sire apan tawe měmpangangimang. Kai i sie měnẹ̌nahaghe si sire tadeạu i sire tawe makasilo tualagu Injilẹ̌ e mạanung kasěllah'i Kristus, nakoạ kere awẹ u Ruata.
5 Habarẹ̌ kụ ilẹ̌humpạ i kami e wal᷊inewe wěke mạanung kami hala e. Habarẹ̌ ene kai mạanung Yesus Kristus; u i Sie kawe Mawu; kụ i kami e kai mẹ̌tatangkiang si kamene ual᷊ingu i Sie.
6 Mawu Ruata e kawe něhengetang, "Apasarangko tualagẹ̌ e wọu marěndung e," Duata ene lai napasěpụ u tualagẹ̌ e su ral᷊ungu naung i kitẹ e tadeạu tiněnnang kitẹ e matualagẹ̌ sarang makahěngang kawawantugu Ruata kụ suměnnang su ghating Kristus.
7 Kaiso arětạ marohkẹ̌ e kereng kawantuge ene, kai mạdal᷊uhe su watangeng i kami tạ arěgane ini kụ asal᷊e wọu ěntana. Ual᷊ingu ene nal᷊ahẹ e u kasěllahu kawasa ene kai su Mawu Ruata, wal᷊inewe si kami.
8 I kami e lẹ̌aloěng bọu patikụ beọ e, kaiso i kami e tawe nasěsẹ. I kami e niwingọ e, kaiso tawe kinasueěngu tiněnna.
9 Lawọ dụdokạ si kami e kai tawe mawawala i kami hala. Dingangu manilaing i kami taghal᷊ẹ̌ pẹ̌pahangeng sarang i kami pakaěnsu, kaiso i kami e tawe mate.
10 Sěntiniạ i kami makạpěndang kapapohongu Mawu Yesus su watangeng i kami, tadeạu pẹ̌bawiah'E mal᷊aing mariadi mal᷊ahẹ su watangeng i kami.
11 Karěngụeweng i kami měbẹ̌biahẹ̌ e, i kami měngkate hanesẹ̌ gụgěnggangu pateěng ual᷊ingu i Yesus, tadeạu ual᷊ingu kawe kerene ute pẹ̌bawiah'i Yesus mal᷊aing iapakal᷊ahẹ su watangeng i kami e mẹ̌tate ini.
12 Ini e mělẹ̌lahẹu su watangeng i kami papate e kai kapẹ̌kẹ̌karadiahange, kaiso i kami e kai lụluasẹ̌ batụu pẹ̌bawiahẹ̌ e kai kapěkẹ̌karadiahange su watangeng i kamene.
13 Su ral᷊ungu Winohẹ Susi e kẹ̌kaěbakeng bawera kere ini, "Iạ e mạngimang, kụ kai ual᷊ingu ene iạ měbẹ̌bisara." Kụ, mal᷊aing ual᷊ingu pěngangansang u pangangimang kerene, i kami e měbẹ̌bisara watụ u i kami e mạngimang.
14 I kami e mẹ̌ngiaking u Ruata kụ seng napẹ̌biahu Mawu Yesus kạpia, mal᷊aing sarung mapẹ̌biah'i kami e ringang i Yesus, kụ mẹ̌bawa si kitẹ e sol᷊ong těngon'E.
15 Patikụ ene ute kai waug'i kamene. Batụu kakạl᷊awọe taumata makapěndang kakěndagu Ruata, mal᷊aing kakạl᷊awọe kal᷊iomanengu tatarimakasẹ ilẹ̌humpạ su Ruata; ual᷊ingu kerene tangu Mawu Ruata e niapakawantugẹ̌.
16 Kai ual᷊ingu ene hakịu i kami e tawe lumaěnsu. Manilaing tuhụ mạbadang seng kakạsalobare, kai wọu sěmběkang pangangimang, i kami e hanesẹ̌ tẹ̌tal᷊imbuhuang apang kal᷊aěllo.
17 Dingangu kasasusawe tawe sěngapa kawěhạ e ini kinahombangeng i kami, kětạengbeng pẹ̌kadodọ tempo, kai sarung makaual᷊i karal᷊unsemahẹ̌ tạ sihinge ringangu kakalẹ̌ si kami. Karal᷊unsemahẹ̌ ene limemboweng kasěllahe marau kereu isukạ su kasasusa ene.
18 U i kami e tawe mẹ̌sasasěmpị apang ikẹ̌kasilo e, kaiso kai apan ta ikasilo. Apang ikẹ̌kasilo e kětạengbeng sěngkatempo e rarage, arawe apan ta ikasilo e kai kakalẹ̌ sarang karěngụe.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA