Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Bulat kalulut aggai bagat Taikamanua lé akugalai kai galajet néné. Iaté lulunia tá itatakkí ka paatuatmai.

² Tá akuenung'aké kai galajet sipinalipput sibaraaké katuailaatta. Bulat tá kuobá mugalai ka pajoat elé kupabailok kai tiboiet Taikamanua. Tápoi bulat ka linat paatuat lé kupuukú kai galajet Taikamanua, siripot ka teú bagania. Oto iaté lulunia bulat kukakaroni kai nia baga, bulé nunilai kam kai bulat sibara ka linat paatuatmui leú et.

³ Oto ké tápei aimakokolou ka bagadda pagalaiat Katuareman Simaerú sinegéakenenmai nenda, kolou sarat siangan lé siailiaké katukataikat'an lé tá makokolou ka baga.

⁴ Aipoí nia nenda Bulungan Sanitu sikataí paraboat sipasikukup-kup'aké polak néné té, masitatabbó pupaatuananda sitaimatonem baga. Nia té masipasasailaji sia, bulé tá raitsó patot Katuareman Simaerú pagalaiat pulatsanan Kristus, kelé sara tularat putubuat Taikamanua.

⁵ Oto sipinaarepmai néné, tá katuareman pagalaiat tubumai. Tápoi katuareman pagalaiat tubut Jesus Kristus lé; masimuneng'aké ka kam, si Tuhan lé nia. Oto kai néné ka kai, bailiu paguguletmui kalulut Kristus.

⁶ Aipoí bulat tubut Taikamanua lé poí amasikua kisé, "Kau iputoro pató ka simagep-gep." Samba Taikamanua leú te masibabaraaké pató ka bagat paatuatta, imapató paatuatta, ioi takeruji pulatsanan Taikamanua siputotoro ka matat Kristus.

⁷ Tápoi oniakenen pukayoat puketsanan simalainge néné, akukauan lé kai nia ka tubumai sitá katupunan néné, iaté tubu sibara ka abut polak. Oto sené toilá ka Taikamanua lé kabaraiat pubeunanan geget Katuareman Simaerú néné; tá sibara ka kai.

⁸ Bulat araokkip'an kai rasaggangi kai; tápoi tá atulaptip kai. Aipaingongan kai taiagaimai peruketmai, tápoi tá akukua kai, oto paan leú.

⁹ Maigi sia sisaggangi kai, tápoi tá amusara kai. Kenanen marei-rei rapabóboki kai pat kalapui, tápoi tá amatei kai.

¹⁰ Senen tetre lé iagai tubumai ka kai kamamatei, kelé kamateiat Kristus, bulé puririmanuania leú matoilá ka tubumai.

¹¹ Ka sanganantat purimanuaiatmai, sarat itaiko lé kai kamateiat, kalulut Jesus, bulé tupatoilá puririmanuan Jesus ka tubumai simaanaget néné.

¹² Néné masikua ka tubumai, bulat ainunú-nú kai kamateiat, tápoi bulat maangká bagamai kalulut ka tubumui ka kam, aian itataddaaké ipugalai purimanuaiat.

¹³ Ka Buko Sipunenan, ai atusurat'aké kisé, "Kalulut tonem bagakku, panibokkungan." Oto ron putotonem baga kelé nenda leú te, kupaninibo kai ka kai, aipoí kukakatonemi kai nia baga.

¹⁴ Bulat seget kopet tonem bagamai, kelé kipa aisuruaké Tuhan Jesus, Taikamanua ka kamateiat, kisedda leú te isuruaké kai ka kai Taikamanua sambat Jesus; iageti taroakénangan sita sambatta ka matat Jesus.

¹⁵ Sangamberinia néné, sibailiu puuktunganmui lé. Aipoí ké memei maigi sia masinanam katet bagat Taikamanua, memei maiigi leú te sia sipasikukua surá ka tubut Taikamanua, oto bailiu tuumun'aké Taikamanua.

¹⁶ Iaté lulunia tá ipepé ka paatuatmai. Kenanen baí kai néné siripot ka pusirimanuaat memei lé makakataí, tápoi ka paatuatmai geti ka baga, riu-riu lé itubauaké senen gogoi.

¹⁷ Kelé pugejaat baga sitaimakopé néné, siorikmai ka oggak siteté néné poí, masibaraaké lé ka kai puuktungan sabeu samba simatom. Aipoí puuktungan nenda peilé bulat maabeu, belé peilé ka tubut pugejaat baga nenda.

¹⁸ Ka kai poí tá aikupuleletsei kai apa simatotoilá, tápoi sitaimatotoilá lé. Tá matotom nia ka sia nenda simatotoilá, sitaimatotoilá nenda lé matom teret buru-burú.

2 Korintus

Video 2 Korintus 4

Ikuti Kami:

KONTAK | PARTISIPASI | DONASI