Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ma 'orasi ne'ena, ngoi 'o Paulus tomau tinisitotara naneda moi. Ngoi ne'ena 'o nyawa yongose 'ato 'ai singina 'ima'ai nako pomasidaarino de de ngini, ma nako pomakakurutoka ge'ena tinikuata. Aa, de ma Kristus gee 'awi singina 'ima-ma'ai de 'isure-sure 'awi kuasa,

² ngoi toga'asoko tosidemogaroku, 'uwa niodiai ngoi salingou tinikuata nako gee dua ngoi toboa. Sababu ngoi 'ai singinaka takikuata 'o nyawa-nyawa gee yongose 'ato ngomi miomanarama ma dumutu ka 'o dunia ma mau-mau.

³ Ma goungu ngomi ne'ena ka 'o nyawa biasa, ma ngomi mimariwo ma titi ko 'o dunianowa.

⁴ Ngomi miomanarama ge'ena de ma Jo'oungu ma Dutu 'awi kuasa gee matero ka mia dae. De ge'enau ngomi miosibiakoroka 'o sagala guata de 'o kaributu.

⁵ Miaisangoka 'o nyawa manga singina 'ikuru-kurutie gee yomau yatatoko 'o nyawa ma Jo'oungu ma Dutu winako. Ngomi miangali 'o nyawa manga di-dibangi la 'ona widomoteke ma Kristus.

⁶ De nako ngini ma gou-goungu niosingounokau, ngomi mimadudu-duangou miakihukumu 'o nyawa 'iodumu gee koyosingou-ngounuwa.

⁷ Ngini salingou niasahe 'okia naga gee 'iti-tiai. Nako moi yamaoku 'ato 'ona ge'ena ma Kristus 'awi rongamoi, salingou yosi-singina de yasahe 'ato ngomi mita ma Kristus 'awi rongamoi.

⁸ Ngoi koimaekuwa ngaro kaifoloi tosiie 'o kuasa gee ma Jou mikula-kulano. Ngano 'o kuasa ge'ena ma dumutu konisitorouwa, ma 'ena nisimomiki.

⁹ Ngoi tooluku niamaoku tinsimodo-modongo de 'ai surati.

¹⁰ 'O nyawa yongose 'ato, "'O Paulus 'awi suratioka ge'ena posironga wonakuatoka de mita de ma ku-kumatioka, ma nako 'una ngoneka waino, 'awi kumati koi'iwa de 'awi demo-demo ma ngale koi'iwa!"

¹¹ 'O nyawa koge'ena-'ena salingou yanako 'ato nako ngomi naga nginioka, ge'ena to ngomi 'amia manarama 'imatero ma sala de kokia naga gee mialefokau 'amia suratioka.

¹² Ma raiokau ngomi komiomoroinuwa mimasitero de komimasidotodoimuwa de 'o nyawa-nyawa gee yoma-maoku 'ona yodaduie. 'Ona posironga yohaga-hagaka! 'Ona ka 'onau ma sirete yomasitantuu, de yomasidelega moteke to 'onau ma sirete manga ro-rasa.

¹³ Ngomi ko koge'enawa. Ngomi nako mia singina 'iamoko, ge'ena naga ka de ma batingi. Ngomi miomanarama naga mia manarama duga gee ma Jo'oungu ma Dutu wosita-tantuuokau. De ngini mita to ngomi 'ami manarama ma dodaka.

¹⁴ So gee ngomi miaika nginika de mio'asa 'o Habari ma Owa ma ngale ma Kristus, ma gou-goungu ngomi komiaparenuwa 'amia manarama ma batingi.

¹⁵ Ngomi komimaiewa de 'o nyawa 'iregu manga manarama gee ko to ngomiwa mia manarama. So ngomi tatapu ka gee ma Jo'oungu ma Dutu wosita-tantuuoka ma ngale ngomi. De miomau ngini kaifoloi monga niongaku ma Kristusika la ngomi 'idadi miadiai 'o manarama gee 'ifoloiosi 'iamoko naga nginioka.

¹⁶ De koge'ena, ngomi 'idadi mita miositotara 'o Habari ma Owa ge'ena 'o daeraa 'iregu-reguka gee koidadiwa mimasiie-ie de 'o manarama gee 'o nyawa 'iregu yadi-diai naga manga manarama ma ngiioka.

¹⁷ Naga 'o Buku 'Itebi-tebinoka 'isilefoku, "'O nyawa gee yomau yosiie 'o kianikia, ge'ena salingou gee 'okia naga ma Jou wodiaiokau."

¹⁸ 'O nyawa gee ma Jo'oungu ma Dutu wakisiare-arene, 'ona ge'ena yadaene yakihoromati. Ma 'o nyawa gee ka 'ona ma sirete yomaie-ie, ge'ena ko'uwa.

2 Korintus

Video 2 Korintus 10

Ikuti Kami:

KONTAK | PARTISIPASI | DONASI