Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Aku, Paulus, mindo man bandu, aku si ikataken kalak melemuk adi ngerana petala-tala ras kam, tapi pang merawa adi sangana pedauh-dauh. I bas gelar Kristus si melias dingen lemah lembut kupindo man bandu.

² Adi reh pagi aku, ula pagi aku terpaksa merawa i lebe-lebendu; sabap tek aku maka pang nge aku merawa nandangi piga-piga kalak i bas kam si erpengakap maka kami nggeluh rikutken biak manusia si ndekah denga.

³ Tuhu maka kami manusia biasa nge, tapi labo kami erjuang rikutken biak manusia si ndekah.

⁴ Senjata si ipake kami biakna labo bali ras senjata si ipake kalak, tapi senjata Dibata si erkuasa, si ngasup ngeruntuhken benteng-benteng, eme kepantasen perukuren manusia.

⁵ Iruntuhken kami kerina tembok kesombongen si ipajekken guna ngambati manusia nandai Dibata. Itaban kami kerina perukuren manusia, jenari ibaba kami gelah patuh man Kristus.

⁶ Janah adi kepatuhenndu nggo bulat tuhu-tuhu, kami nggo sikap guna ngukum kerina kinilapatuhen.

⁷ Nehenlah kai si lit i lebe-lebendu. Adi lit kalak erpengakap maka ia me suruh-suruhen Kristus, iukurkenna ka lah min maka kami pe suruh-suruhen Kristus ka nge bali ras ia.

⁸ Adi teridah maka meganjangsa aku ngerana kerna kuasa si ibereken Tuhan man kami -- si gunana pegegehi kam, labo ngeruntuhkenca -- labo pagi aku juru.

⁹ Ula iakapndu maka kupebiar-biar kam alu surat-suratku e.

¹⁰ Sabap lit si ngatakenca, "Surat-surat Paulus tegas dingen meser kal, tapi asum ia i tengah-tengahta, labo ia erdolat, janah carana ngerana pe labo terpake."

¹¹ Kalak si ngerana bage arus ietehna maka labo lit lainna ranan kami si isuratken kami ras perbahanen kami asum kami lit i tengah-tengahndu.

¹² Tuhu, labo kami pang mpeseri dingen mbandingken diri kami ras kalak si mujiken bana man kalak si deban e. Dirina jine ipakena jadi sibar-sibarna janah ibanding-bandingkenna dirina sapih-sapih ia. Perbahanen si bage bodoh tuhu-tuhu!

¹³ Si imegahken kami labo daerah si la ersibar belangna, tapi rikutken daerah si nggo ibagi-bagiken Dibata man kami. I bas si e ikut pe kam.

¹⁴ Erdandanken kam pe bengket ku bas daerah si man dahin kami, labo kami ngelanggar batas sabap kami kap si perlebe ndahi kam maba Berita Si Mehuli kerna Kristus.

¹⁵ Bage pe labo imegahken kami kerna pendahin kalak si deban si labo bengket ku bas lingkungen si nggo itetapken Dibata man kami. Tapi ngarap kami gelah kinitekenndu reh belinna, janah e erbahanca maka reh belinna pendahin kami i tengah-tengahndu, tapi tuhu la ndarat i bas daerah si nggo itetapken Dibata man kami.

¹⁶ Kenca bage maka banci iberitaken kami Berita Si Mehuli ku daerah-daerah si terdauhen asa kam, sabap la ate kami ermegah kerna pendahin kalak si deban si nggo idahina i bas daerah e.

¹⁷ Bagi lit tersurat i bas Pustaka Si Badia, "Kalak si ermegah ate, megahlah akapna kerna Tuhan."

¹⁸ Sabap labo kalak si muji dirina si terbukti kalak si tutus, tapi si ipujiken Tuhan nge.

2 Korintus

Video 2 Korintus 10

Ikuti Kami:

KONTAK | PARTISIPASI | DONASI