Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Hiskia jadi raja tupung umur dua pulu lima tahun, jenari merentah ia i Jerusalem lit dekahna dua pulu siwah tahun. Gelar nandena Abija, anak si Sakaria.
2 Iusihna perbahanen nini-ninina Raja Daud. Ilakokenna kai si ngena ate TUHAN.
3 I bas bulan si pemena i bas tahun si pemena kenca Hiskia jadi raja, italangina mulihi pintu-pintu gerbang Rumah Pertoton dingen ipekenana.
4 Ipepulungna sada terpuk imam-imam ras kalak Lewi i bas kesain arah Timur Rumah Pertoton
5 jenari nina, "Kam kalak Lewi, arus ipebadiakenndu dirindu dingen pebadiaken Rumah Pertoton TUHAN, Dibata nini-ninindu. Agui i bas Rumah Pertoton e nari kerina si erbahanca Rumah Pertoton e lanai bersih rikutken aturen agama.
6 Nini-nininta la patuh man TUHAN Dibatanta, dingen ilakokenna kai si la ngena AteNa. Itadingken nini-nininta TUHAN Dibata jenari itundalkenna InganNa tading e.
7 Itutupna pintun-pintun Rumah Pertoton, dingen ipelepasna lampu-lampu si lit i je nimpet, janah lanai itutungna si merim-merim ntah pe lanai ipersembahkenna persembahen tutungen i bas Rumah Pertoton Dibata Israel.
8 Erkiteken si e TUHAN nggo nembeh man Juda ras man Jerusalem. Janah kai si ibahan Dibata e erbahanca kerina kalak sengget dingen mbiar. Si enda ietehndu kal alu payo.
9 Bapa-bapanta nggo ibunuh i bas perang. Bage pe ndeharanta dingen anak-anakta nggo ibaba jadi tabanen.
10 Genduari nggo kutetapken erbahan perpadanen ras TUHAN, Dibata Israel, gelah ulanai Ia nembeh kempak kita.
11 O anak-anakku, genduari ulanai pedekah-dekah. Kam me si nggo ipilih TUHAN nutung si merim-merim man BaNa dingen mabai bangsa enda nembah man BaNa."
12 Enda me kalak Lewi si pulung tupung si e: I bas terpuk Kohat nari eme Mahat anak Amasia ras Joel anak Asaria. I bas terpuk Merari nari eme Kis anak Abdi ras Asaria anak Jehalelel. I bas terpuk Gerson nari eme Joah anak Simna ras Eden anak Joah. I bas terpuk Elisapan nari eme Simri ras Jewel. I bas terpuk Asap nari eme Sakaria ras Matania. I bas terpuk Heman nari eme Jehuel ras Simei. I bas terpuk Jedutun nari eme Semaya ras Ussiel.
13 (2Taw 29:12)
14 (2Taw 29:12)
15 Kalak si pepulung enda senina suku Lewi dingen kerina ia mbersihken dirina rikutken aturen agama. Kenca bage sue ras si nggo iperentahken raja, ibenaken kalak ndai mbersihken Rumah Pertoton e rikutken aturen agama sue ras Undang-undang TUHAN.
16 Imam e bengket ku bas Rumah Pertoton guna mbersihkenca jenari ibabana ndarat ku bas kesain Rumah Pertoton kerina si la bersih rikutken aturen agama. Kerina barang-barang si la bersih e ibaba suku Lewi e ku darat kota ku Baluren Kidron.
17 Dahin e ibenaken i bas wari si pemena i bas bulan si pemena, dingen i bas wari si pewaluhken kerina dahin e nggo dung, subuk dalan bengket ku bas Rumah Pertoton e. Kenca bage kalak enda terus erdahin waluh wari nari, seh ngayak wari pesepuluh enemken i bas bulan e, lako nikapken Rumah Pertoton e guna ingan ersembah.
18 Kalak Lewi erbahan laporen kempak Raja Hiskia, "Kami nggo dung mbersihken kerina Rumah Pertoton e. Batar-batar persembahen tutungen, meja ingan roti ipersembahken man TUHAN ras kerina perkekasna ikut ibersiheken kami.
19 Kerina perkekas si nggo ibuat Raja Ahas i bas paksa-paksa ia lanai patuh man Dibata i bas jaman pemerentahenna, e pe nggo iulihken kami. Dingen kerina e nggo ipebadiaken kami mulihken. Perkekas-perkekas e kerina genduari lit i lebe batar-batar TUHAN."
20 Alu lanai nimai terdekahen minter ipepulung Raja Hiskia kalak si terkemuka i bas kota e jenari ras-ras ia bengket ku bas Rumah Pertoton e.
21 Guna persembahen penangtangen dosa-dosa keluarga raja dingen dosa kalak Juda bage pe guna pebadiaken Rumah Pertoton e ibuat kalak ndai pitu jenggi lembu, pitu biri-biri, pitu anak biri-biri, bage pe pitu kambing. Isuruh raja imam-imam kesusuren Harun mpersembahken asuh-asuhen e i babo batar-batar.
22 Si pemenana igeleh imam-imam e, eme jenggi-jenggi lembu, kenca bage maka biri-biri, jenari anak biri-biri. Dareh tiap persembahen ipirpirken ku babo batar-batar e.
23 Kedungenna ibabana kambing e ku adep-adepen raja dingen kempak perpulungen. Itamaken kalak e tanna i babo kambing e.
24 Kenca bage igeleh imam-imam kambing e jenari iamburkenna darehna ku babo batar-batar jadi sada persembahen guna nangtangi dosa kerina bangsa e, erkiteken nggo iperentahken raja erbahan persembahen tutungen dingen persembahen penangtangi dosa guna kerina kalak Israel.
25 Iikutken raja perentah si nggo ibereken TUHAN man Raja Daud nai arah Gat, nabi raja e, bage pe arah Nabi Natan; itamakenna kalak Lewi i bas Rumah Pertoton guna ngkuit kulcapi ras ceracak,
26 eme alat-alat musik bagi si ipake Raja Daud nai. Imam-imam pe tedis i je guna ngembus terompet.
27 Iperentahken Raja Hiskia gelah persembahen tutungen e ipersembahken; jenari kenca persembahen nggo ibenaken, perpulungen rende ngendeken ende-enden pujin man TUHAN. Sanga bage terompet iembus, dingen alat-alat musik si debanna pe imainken.
28 Kerina kalak si i je ikut ersembah, si rende terus ngendeken ende-enden dingen pemain musik pe terus main musik seh ngayak kerina persembahen e nggo keri meseng.
29 Kenca bage raja ras kerina jelma si nterem erjimpuh nembah Dibata.
30 Raja ras peminpin-peminpin bangsa e mindo gelah iendeken kalak Lewi man TUHAN ende-enden pujin si ikarang Daud ras Nabi Asap. Emaka kerina kalak e rende alu keriahen si mbelin janahna erjimpuh nembah Dibata.
31 Nina Hiskia kempak perpulungen e, "Genduari erkiteken nggo kam bersih rikutken aturen agama, babalah persembahen pengataken bujur man TUHAN." Iikutkenna kai si ikataken raja. Emaka piga-piga i bas perpulungen e nari arah ukurna ersuruh maba asuh-asuhen lako ipersembahken jadi persembahen tutungen.
32 Ibaba kalak e pitu puluh jenggi lembu, seratus biri-biri dingen dua ratus anak biri-biri jadi persembahen tutungen man TUHAN.
33 Ibabana ka pe 600 jenggi lembu dingen 3.000 biri-biri jadi persembahen guna ipan perpulungen e.
34 Erkiteken langa cukup imam-imam si nggo bersih lako nggeleh kerina asuh-asuhen e, emaka isampati kalak Lewi ia sabap patuhen kalak Lewi ngikuti peraturen kebersihen rikutken aturen agama asangken imam-imam. Kalak Lewi tetap nampati seh maka nggo cukup imam-imam si bersih.
35 Tambah persembahen-persembahen tutungen e, imam-imam e pe mpersembahken tabeh-tabeh persembahen pengataken bujur si ipan jelma si nterem. Anggur si ipersembahken radu ras persembahen tutungen e pe imam-imam e ka nge ngamburkenca. Bage me kebaktin i bas Rumah Pertoton e ibenaken ka mulihi.
36 Raja Hiskia ras rayatna ermeriah ukur sabap nggo isampati Dibata ia ngelakoken kerina dahin e bage pedasna.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA