Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Amasia jadi raja sanga umurna nggo dua pulu lima tahun, jenari ia merentah i Jerusalem lit dua pulu siwah tahun dekahna. Nandena eme Jehoadin i Jerusalem nari.
2 Ilakokenna kai si ngena ate TUHAN tapi la alu ukur bulat.
3 Kenca nggo tetap kuasana minter iukumna pegawai si nggo munuh bapana.
4 Tapi labo anak-anak si nggo munuh bapana e si iukumna, sue ras si iperentahken TUHAN i bas Undang-undang Musa nina, "Orang tua la ibunuh erkiteken kejahaten si ilakoken anak-anakna, bage pe anak-anak la ibunuh erkiteken kejahaten si ibahan orang tuana; sekalak jelma iukum mate erkiteken kejahaten si ibahanna jine."
5 Ijadiken Amasia tentera kerina dilaki i bas suku Juda ras Benyamin nari, rikutken terpukna sekalak-sekalak. Jenari iangkatna puanglima guna si seribu kalak ras guna si seratus kalak. Kerina kalak si umurna dua puluh tahun ku das atan ku bas tentera e, janah lit teremna 300.000 kalak. Kerina tentera pilihen, ngasup erperang, pentar mpergunaken ampang-ampang ras lembing.
6 Seakatan si e isewa Amasia ka 100.000 kalak tentera i Israel nari alu sewa 3.400 kilo pirak.
7 Tapi lit sekalak nabi ndahi ia nina, "O Raja ula baba tentera Israel e berkat ras kam. TUHAN labo ras kerina kalak Eperaim e.
8 Iakapndu tentera Israel e nambahi gegehndu i bas pertempuren, tapi Dibata si erkuasa erbahanca kalak menang ntah talu, emaka IpelepasNa musuh-musuhndu naluken kam."
9 Isungkun Amasia nabi e nina, "Tapi uga kerna pirak si nggo kugalarken man kalak ah ndai?" Nina nabi e, "Banci kap ibereken TUHAN man bandu lebih asangken si e."
10 Emaka isuruh Amasia tentera si nggo isewana e lawes; ipemulihna ia ku kutana. Erkiteken si e mulih kalak enda, tapi seh kal atena segatna ngenen kalak Juda.
11 Itetapken Amasia ukurna emaka ipinpinna tenterana ku Baluren Sira. I je iperangna dingen ibunuhna sepuluh ribu tentera bangsa Edom
12 jenari itangkapna ka tole lit 10.000 kalak nari. Ibabana si sepuluh ribu e ku tepi embang i kota Sela, jenari igulangkenna kerina, seh maka mate meripuk kerina kena batu i teruh.
13 Tapi tentera Israel si ilarang Amasia ikut erperang ras ia e, iperangna kota-kota Juda kelang-kelang Samaria ras Bet Horon. Ibunuh kalak enda telu ribu kalak dilaki jenari ibuatna melala barang rampasen.
14 Kenca Amasia mulih i bas peperangen ngelawan bangsa Edom e nari, ibabana gana-gana bangsa Edom mulih, ipajekkenna gana-gana e, isembahna dingen itutungna si merim-merim man gana-gana e.
15 Erkiteken si e nembeh TUHAN, emaka IsuruhNa sekalak nabi ndahi Amasia. Nina nabi e, "Ngkai maka isembahndu dibata-dibata bangsa si deban, dibata-dibata si la ngasup mulahi bangsana i bas kuasandu nari?"
16 "Ndigan nai ibahan kami kam jadi penasehat raja? Sinik! Adi lang kubunuh kam!" nina Amasia. Emaka sinik nabi e tapi sempat denga ia ngerana nina, "Genduari nggo kueteh maka kam la banci lang ikernepken Dibata, erkiteken perbahanenndu e janah la iperdiatekenndu nasehatku."
17 Amasia, raja Juda ersekongkol ras penasehat-penasehatna lako ngelawan Israel. Emaka isuruhna kalak nehken berita man Jehoas, raja Israel, eme anak Jehoahas kempu Jehu nina, "Mari reh kam maka kita jumpa."
18 Emaka itenahken Jehoas jabapna nina, "Sekali jadi, dukut duri i deleng-deleng Libanon nehken berita enda man batang cemara nina, 'Berelah anakndu iempoi anakku.' Tapi mentas arah e sada rubia-rubia kerangen emaka iperjatina dukut duri ndai.
19 Genduari Amasia, meganjang ukurndu perban nggo italukenndu bangsa Edom, tapi madin kam la pada ndarat i rumah nari. Man kadendu ndarami persoalen si maba kiniseran man bandu ras man rayatndu?"
20 Tapi la ibegiken Amasia si ikataken nabi e man bana. Peraten Dibata kap gelah Amasia italuken, sabap nggo isembahna patung berhala bangsa Edom.
21 Emaka lawes Jehoas raja Israel ku pertempuren lako ngelawan Amasia raja Juda. Jumpa kalak enda i Bet Semes i daerah Juda.
22 Talu tentera bangsa Juda, emaka lompaten ia ku rumahna sekalak-sekalak.
23 Itangkap Jehoas si Amasia jenari ibabana ku Jerusalem. I je iruntuhkenna benteng kota e menaken i Pintu Gerbang Eperaim nari seh ku Pintu Gerbang Suki, si gedangna lit kira-kira dua ratus meter.
24 Iangkutna ku Samaria kerina emas ras pirak si lit i bas Rumah Pertoton, perkakas Rumah Pertoton dingen barang-barang istana si ijaga kesusuren Obet Edom. Kalak si jadi tabanen pe ibabana rassa.
25 Amasia raja Juda dekahen nggeluh sepulu lima tahun asangken Raja Jehoas.
26 Kerina si debanna si ilakoken Amasia, mula-mula pemerentahenna nari seh ku kedungenna, isuratken i bas kitap Sejarah Raja-raja Juda ras Israel.
27 Kenca nggo ia mbrontak ngelawan TUHAN, lalap lit kalak si ersekongkol ngelawan ia i Jerusalem. Dungna lompat ia ku kota Lakis tapi iikutken musuh-musuhna ia ku jah jenari ibunuhna.
28 Alu kuda, ibaba bangkena ku Jerusalem emaka ikuburken ia i bas kuburen raja-raja i Kota Daud.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA