Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Piga-piga kalak Arab minpin sada serangen jenari ibunuhna kerina anak Jehoram, si dilaki seakatan Ahasia anakna si nguda. Emaka itangkuhken kalak Jerusalem Ahasia jadi raja nggantiken bapana.
2 Ahasia jadi raja sanga umurna dua pulu dua tahun, dingen merentah i Jerusalem sada tahun dekahna. Ahasia pe iikutkenna ka perbahanen keluarga Raja Ahap, sabap nandena si Atalia anak Raja Ahap kempu Raja Omri i Israel nari. Nandena ngajarken ia erbahan jahat.
3 (2Taw 22:2)
4 Ibahanna dosa man TUHAN, sabap kenca mate bapana anggota keluarga Raja Ahap si debanna jadi penasehatna, janah eme si ncilakaken ia.
5 Erkiteken nasehat kalak enda ndai, itemanina Joram raja Israel i bas sada perang ngelawan Hasael, raja Siria. Tentera e erperang i kota Ramot daerah Gileat janah luka Joram i bas perang e.
6 Mulih ia ku kota Jesreel nimai luka-lukana malem janah Ahasia raja Juda reh ku jah ndahi ia.
7 Ibahan Dibata maka i bas ndahi Joram eme mabasa Ahasia ndabuh. Sanga Ahasia i jah, ia ras Joram ijumpai sekalak dilaki gelarna Jehu anak Nimsi. Jehu ipilih TUHAN guna kesusuren Ahap.
8 Sanga Jehu maba ukumen man kesusuren Ahap e, rembang ia jumpa ras sada peminpin kalak Juda, dingen anak senina Ahasia si nemani Ahasia sanga ia ndahi Joram e. Ibunuh Jehu kerina.
9 Kenca bage Ahasia pe idarami, janah idat cebuni i Samaria. Ibaba kalak ia man Jehu emaka ibunuh Jehu. Tapi ikuburken bangkena lako mereken kehamaten man ninina Raja Josapat, si nggo erdahin guna TUHAN asa gegehna lit. Lanai lit tading i bas keluarga Ahasia si ngasup jadi raja i bas kerajan e.
10 Kenca ieteh nande Raja Ahasia maka anakna nggo mate ibunuh, minter iperentahkenna kerina anggota keluarga raja Juda ibunuh.
11 Lit turang Ahasia pedauh nande, eme Jehoseba. Jehoseba erjabu ras sekalak imam gelarna Joyada. Alu erbuni-buni iselamatken Jehoseba sekalak anak Ahasia, eme Joas. Ibuatna Joas i tengah-tengah anak raja si deban nari si nandangi ibunuh, jenari ibunikenna Joas ras sekalak diberu si ngepkepsa i bas sada kamar i bas Rumah Pertoton. Alu muniken ia, ipulahina Joas i bas kematen i bas tan Atalia nari.
12 Lit enem tahun ia cebuni i je, janah kidekah si e Atalia merentah jadi ratu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA