Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 I bas tahun petelu pulu enemken pemerentahen Raja Asa i Juda, reh Raja Baasa i Israel nari nerang Juda. Emaka ibenaken Baasa erbahan benteng kota Rama guna meltepken dalan ndarat i Juda nari.
2 Erkiteken si e ibuat Asa pirak ras emas i bas perbendaharan Rumah Pertoton ras i bas perbendaharan istana nari, jenari ikiremna ku Damaskus man Benhadad raja Siria, alu tenah enda,
3 "Sibahanlah sada perjanjin maka kita sisampat-sampaten, bali ras bapanta nai. Enda pirak ras emas jadi hadiah man bandu. Genduari peltepkenlah perjanjinndu ras Baasa, raja Israel, gelah terpaksa itarikna mundur tenterana i bas daerahku nari."
4 Benhadad setuju kerna usul e. Emaka ikiremna komendan ras tenterana merang kota-kota Israel. Italukenna Ion, Dan, Abel Bet Maaka, ras kerina kota Naptali ingan lumbung-lumbung perbekalen.
5 Kenca ibegi Raja Baasa si nggo jadi, ingadikenna erbahan benteng kota Rama jenari itadingkenna dahin e.
6 Kenca bage ipepulung Asa kerina kalak i Juda nari jenari isuruhna ngelegi batu ras kayu si ipergunaken Baasa i Rama, jenari ipakena e guna erbahan benteng kota i Geba ras Mispa.
7 Tupung e lawes Nabi Hanani ndahi Raja Asa nina, "Erkiteken ernalem kam man raja Siria tapi la kam ernalem man TUHAN Dibatandu, emaka tentera Israel nggo pulah.
8 Tentu ingetndu denga maka seh kal mbarenda teremna tentera Sudan ras tentera Libia. Bage pe la kurang buena gereta perang ras tenterana si erkuda. Tapi erkiteken kam ernalem man TUHAN, IbahanNa kam menang naluken kalak e.
9 Iperdiateken TUHAN kerina doni enda, gelah IberekenNa gegeh man kalak si setia man BaNa. Nggo ilakokenndu perbahanen si bodoh. Emaka mulai genduari nari kam lalap erperang."
10 Megi si enda merawa kal ate Raja Asa kempak Nabi Hanani, emaka iperentahkenna ngiket nabi e alu rante. I bas paksa eme Asa mulai kejam man piga-piga rayatna.
11 Kerina si jadi sanga pemerentahen Asa mula-mula nari seh kedungenna isuratken i bas Sejarah raja-raja Juda ras Israel.
12 I bas tahun petelu pulu siwahken kenca Asa jadi raja, lumpuh ia erkiteken penakit si lit i bas nahena seh kal kelekna. Tapi amin bage pe labo ia mindo penampat man TUHAN, ipindona penampat man guru-guru.
13 Dua tahun kenca si e mate ia,
14 jenari ikuburken i bas kuburen batu si nggo ipahatna guna dirina jine i Kota Daud. Itamaken kalak rempah-rempah ras minak wangi sanga nikapken badanna lako ikuburken, jenari ipasangna api pinugun si galang kerna ceda ate kematenna e.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA