¹ Ano walas, ee mae habe ebe mae hap ale gulzimꞌin: Em ekakim kareknak altil srem gwek. Hwena aha mae nik de kareknak zarankam, desa de mas gweblan hap de Zini ki. Zen Bian Alap mo alp nakon zauꞌura. Zen enho kles gwesin srem Zini Kristus Yesus.
² Zen Zen nebe mae hap Zenaka zerguku– neno mae mo karek-kareksa dikim ngan gulsuzimdin hipye. Hwena neno mae en moka hom. Zen hwena kitak de okamanak de zini neno mae mo kareksa dikim ngan gulsuzimdin hip tilki.
³ Nen de Alap mo ol san enlala tatete naban ang ta gwenkam, dekam man tangan dam gwesinin, “Nen mese Alapsa tame lak.”
⁴ Hwena Alap mo ol san de ang gwe-gwen srem nik de anakan gunnu, “Ëe mese Alapsa tame tak,” zen man boton gweꞌara. Kire zinik eiwa de enlalana hom tangan.
⁵ Hwena nen de Alap mo ol san enlala tatete naban ang ta gwenkam, dekam zere onakore kwasang-kwasangna sa neno mae mo enhonak bil gwe-gwer. Zep nen Kristen zini a kire nakon esa nenaka dam lasik gwibir:
⁶ Men zen anakan gunnu, “Ëe mese Kristus hun zeraha-en gwek,” zen dikire zeno kim kwasang naban gwe gwek.
⁷ Ano dang tininak de wenya, ee an ol esesa home ale gulzimꞌin. Hwena men desae orep esane gwe-gwekke, desae etan ebe mae hap anakan ese gulzimꞌin, “Kristen bose omka em kwasang gwibirida gwen.” Zep ola an angkam en home esane gweꞌan.
⁸ Yesus nonol nebe mae hap de kwasang hap zere mo timni erak makan lonezimki– nen dikim hen kirekam nenaka kwasang gwibirida gwen hap. Zep kwasang hap de tawa ta gwibinni ansa bap nen blalen gwe-gwibin. Zen ese en nik zen nebe mae hap lwa gwizimdin. Sap dekam okama kawesinnik awe, neno mae mo lowe henna man nwe-mase gwe-gwenan– san de Alap onakore ngatan de zilbir anenna kiye. Dekam kawesinni man jek-jak gwe-gwenan.
⁹ Zep zi de anakan gunkum, “Ëe ngatannake gweꞌan,” hwena zen de Kristen bose zemka husus gwibirida gwenna, zen ki nama kawesinnik gweꞌara.
¹⁰ Diki men zen Kristen bose zemka kwasang neibirida gwenan, zen zen ngatannak lowehe gweꞌan. Kire zi mo enhonak kawesinni hom. Zep zen molya ahasa ora srem san dep titi da gwibik. Zena hen molya desan sek gwek.
¹¹ Hwena men zen Kristen bose zemka husus neibirida gwenan, zen nama kawesinnik lowehe gweꞌan, hen kawesinni iwe ebute halasen gweꞌan. Zen hom anakan tame nuꞌin, “Ëe angkam ora srem sane sek gweꞌan.” Sap kawesinni in mes zeno mae mo nwena tahalebir-zimk.
¹² Kitak de eKristen gwen wenya, em in zen ano walaskam de gubirida gwen wenyaye. An zebe ebe mae hap ale gulzimꞌin, sap Bian Alap mes eno mae mo karek-karekna Yesus mo syala kon tap gulsuzimki.
¹³ Em in zene nonol Yesussu laibliblak, em in zebe Kristen zi mo bi wal makan lowe heꞌan. In zebe ebe mae hap ale gulzimꞌin, sap em mese tame lak– men Zen Alap han nonol lonesen nakon e gwekaye. Hen em ahakon in zene angkam laibliblaꞌan, em wal sei-siwirkim de gubirida gwen wenya. In zebe hen ebe mae hap ale gulzimꞌin, sap em mese etawa gwek– dowal mo kigisa de kirekam zauk gublu kini gwen naye.
¹⁴ Zep tingare ano walaskam de gubirida gwen wenya, ee mae habe ebe mae hap ale gulzimꞌin: Sap em kitak mese Bian Alapsa tame lak. Bi walkam de gubirida gwen wenya, ee mae habe ebe mae hap ale gulzimꞌin: Sap em mese Yesussu tame lak– men Zen Alap han nonol lonesen nakon e gwekaye. Wal sei-siwirkim de gubirida gwen wenya, ee mae habe hen ebe mae hap ale gulzimꞌin: Sap em mese Alap onakore sosonna ulink. Em ema Alap mo ola urensik gweꞌan. In zebe dowal mo kigisa yauk gublu kini gweꞌan.
¹⁵ Zep auhu-kamana bahem etan enna lwa gwibin, hen okamanak de kire-kirena bahem enna lwabirida gwen. Men zen auhu-kamana ansa enna nola gwibirin, zen hom Biansa enna nola gweblanan.
¹⁶ Sap kitak men desae okamanak enna ola gwibirin, an zen: nere mae mo tim nikore hole-hlena, nwekam de hlaunkum de hole-hlena, hen bolte-bolte enlalana. Zen kitak Bian onakore naka hom. Zen nere mae mo auhu-kama tim nikon wet so gwenan.
¹⁷ Auhu-kamana an sa jek-jak gwer. Hen auhu-kama hole-hlena, zen hen sa jek-jak gwer. Hwena men zen Alap mo dwam gwibinni syal nei gwibirin, zen hendep denaban sa lowehe gwer.
¹⁸ Ano walas, nen angkam aumwa hap denake lowe heꞌan. Zep men kirekam aumwa hap de yaklanak dep dena emsa tawa da gwibik, zen kirekam angkam lwaꞌan. Zen anakan emsa tawa da gwibik, “Kristus mo jal zini sa hata zala.” Zep jal zini insa de ngeirblizan hap de zini angkam mes yaing gwezal. Zep man tangan dam gwesiꞌin, “Nen angkam aumwa hap denake lowe heꞌan.”
¹⁹ Kristus mo jal zisi de ngeirblizan zini in nonola sap nebon mae botonkam biti gwe-gwezak, hwena ki zep etan wet so gwe-gwek. Eiwakam de biti gwenanam, ki nama maka nebon mae lowe heꞌan. Hwena in mae hap ki lwak: Nen dikim anakan tame tabin hip, “Zen eiwakam hom biti gwek.”
²⁰ Hwena nen kire zisi ema tame la gwibirin. Sap nebe mae hap Alap mes zere mo Enhona hle ta sonezimki. Zen in zebe eiwa de tawa tabinni dam ulsuk gwenan.
²¹ Ëe kime ebe mae hap de ale gulzimdin hip enlala gweꞌak, ee home emsa anakan enlala gwibiridak, “Zen hom eiwa dena tame nuꞌin.” Hwena ee ama emsa enlala gwibiridak, “Zen man eiwa de tawa tabin niban botonkam denaban kles noso gweꞌan.”
²² A kire nakon esa Kristus mo jal zini insa de ngeirblizan zini insa dam lasik gwibir: Yesussu men zen anakan zersinni, “Zen nesa de ngaya tabin hip de Zisi hom”– zen zen. Kirekam de gunnu, zen man anakan de gun nuban apde neꞌan, “Bi Zem in hom Tane zemka zer soneka.” Zep kire zini zen Eirzi-Biasa man teisyasiꞌira.
²³ Hen Yesussu de anakan zersinni, “Zen Alap mo Tanesa hom,” dekam man hen dam gwesinin, “Zini in hen Bian Alapsa hom tame taꞌara.” Diki men zen anakan gunnu, “Yesus Zen eiwa Alap mo Tane,” ki zen mes eiwa Eirzi-Biasa tame soka.
²⁴ Zen in zep, Kristus hup de ola men desa nonola kon emsa tawa da gwibik, emki desa dawem enkam enhonak gwirensik gwen. Zen diki dekam esa Eirzi-Bia han iaha-en gwer.
²⁵ Hen nen de kirekam ziaha-en gwenkam, dekam mese hendep de lowehe gwen hap dena ulink– men kirekam Yesus Zena nesa gu-gubirida gwekaye.
²⁶ An kitak mese ep ale gulzimnin, sap zini man emsa ora srem san dep titi da gwibirin.
²⁷ Hwena Kristus mensa zere mo Enhona nebe mae hap hle ta sonezimki, Zen nama eno mae mo enhonak lwa gweꞌara. Em in zebe aha zisi zen de emsa ol esekam tawa ta gwibin hip leibirida srem gwe-gweꞌan. Sap Alap mo Enhona Zen eiwa denaka nesa tawa ta gwibirida– kitak mensa Yesus hun dikim zeraha-en gwen hap dena dwam ei gwibirinye. Zen bejen boton gwen. Zep Yesus en han de zeraha-en gwennak em tatem ezauk gwen– Alap mo Enhona men kirekam nesa titi ta gwibiridake.
²⁸ Zen in zep, ano walas, zere han de zeraha-en gwen ennak em lowehe gwen. Ki Zen de etan lwahal zannak de zertowenkam, aha-ere enlalakam esa ertower. Ki nen molye zeno nwenak saher hap ehu-huk gwehek.
²⁹ Sap nen tawana, “Alap Zen lalak en nik gwe gwenda.” Zen in zep tangan dam gwesik gwenan: Men zen dam-dam enkam lowehe gwenan, zen Alap mo wei-wik gun walas.