¹ Suratna an ere mo tanena Timotius hup, Kristus Yesus mo dam tasin zini Paulus onakon: Dawem! Asa mes dam lasiki: Alap— men zen nesa ngaya tabirkike, Kristus hun— nen men Zebone eyaing gwe kini gweꞌanke. Em in eiwa ano walas. Em Yesussue taibliblaka, zebe gweka– san de ano tane tanganna kiye. Nere mae mo Bian Alap ne Bian Kristus Yesus ne sa dawemna hen kwasang-kwasang zemka mamkam ebe hap ol gweblala. Hen em zere nik mo taha terenak esa gwe gwera.
² (1:1)
³ Ëe kime Makedonia san song gwek, ee dekam mese emsa gu-gubluhak, “Em Efesusk em gwen.” Ëe mae habe zewe de gwen hap emsa gubluk: Zewe de zini mensae anakan dam tasibikke, “Zen totore olkam tawa da gwibirin,” desa dikim em anakan jalse gwibirida gwen hap, “Kirekam bahem tawa ta gwibin.
⁴ Yahudi ere mae mo auyan-aza mo bosem-sesa de klis gul gwennak bahem ehir-hir gwe-gwen– hen auyan-aza uk mo ol kokung gul zahe gwennakye.” Sap auyan-aza mo ol kokung gul gwenna in san de ang tankam, waba hap sa ekeisa-keisa gwe tine gwer, hen dekam engaya gwen hap de orana sa hli dal. Sap nen diki Yesussu de taibliblan enkame engaya gwen hap de orana in san ang ta gwenan.
⁵ Ëe mae habe kirekam emsa gubluꞌan: Zen dekakim zi bose zeban zenaka kwasang neibirida gwek. Sap zi de enlala lalakkam gwenna, hen enho kles gwesin sremkam, hen dawemkam de Biansa taibliblankam, kire zini sa zi bose zemka kwasang gwibirida gwera.
⁶ Hwena ahakon mes tangan ebutehak, zen zep totore ol en san ang ta gwenan.
⁷ Zen kire wenyik anakan ebolamda gwe-gwenan, “Ëe asa Musa mo titi tabin ola inkam tawa ta gwibir,” hwena men zen zere mae mo ek tihi nakon wet so gwenan, zena hom desa tame nul gwenan. Hen zena tawa naka hom– mensa ol drakkam anakan don gwibirin, “Ëe an eiwa de tangan nakae emsa tonbiridaꞌan.”
⁸ Nen tawana Musa hap insa Alap titi tabin ola gol gweblaka, zen hen airis– nen de anakan tame gunkumye: “Alap Zen zi jal-jalsa dikim oto tasibin hip nep golzimki.”
⁹ Sap Zen insa ola golzimki, zen zi dawemsa dikim oto tasibin hip hom. Zen diki anakare kareksa de gol gwen zisi dikim oto tasibin hip: jalse gwibiridan olsa de esal gwen srem zi, nol drak-drak zi, kareksa de gulin hananda gwen zi, auhu-kama ennak de enlalakam de gwe gwen zi, Alapsa de sere gweblan zi, Alapsa de betek gweblan srem zi, bi zemka de tan zi, hen an zemka de gwin zi, hen zi tamera gwen zi.
¹⁰ Hen ahakore zi karek-karekna zen anakare wenya: kahalo soson wenya, zi bosyan han de inisin makan egwe gwen wenya, boton tam zi, zisi de te-ala hap golegu gwen zi, hen botonkam de zi bose zemka klak ta gwibin zi, hen tingare ahakore zini men zen Kristen zini neno mae mo tawa tabin sin ang ta srem gwe-gwenanke.
¹¹ Sap neno mae mo tawa tabinni in, zen engaya gwen hap de ol dawem san tal gwesiꞌin– mensa soson tangan Zini Alap Zena abe hap golblakake, ee de desa golzim halada gwen hap. Ol dawemna in sam-sam tanganna.
¹² Ëe ama nere mo Teipsinni Yesus hup dawemsa gol gweblaꞌan– men Zen sosonna ap gol gweblandake, zere mo ngasa dikim syal gwe-gweblan hap. Zen mes asa taibliblaka, zep asa dam tasiki. Zen in zebe dawemna gol gweblaꞌan.
¹³ Ëe sap hen orep Yesussu de lamang ta gwenna. Men zen nonol Yesussu daibliblak, ee ama desa karek ta gwibik hen lamang ta gwibik. Sap eiwa kirekam, hwena Yesus man asa kwasang gweblaka. Zen man anakan asa tame taka, “Zini an nama hom tol Asa taibliblaꞌara, zep zere mo syala hom anakan dam gulsuꞌura, ‘Ëe an kareksae gol gweꞌan.’”
¹⁴ Zep Zen man tangan mamkam asa kwasang gweblaka– Zen kim Zenaka de taibliblan hap dena abe hap golblakaye, hen zi bosyansa dikim kwasang gwibirida gwen hap dena.
¹⁵ Ola an eiwa de tanganna. Zep nen taiblibin: “Kristus Zen karek-karek gulin halasen gwen zisi dikim ngaya tabin hip auhu-kamanak hata zaka.” Ëe an hwena orep jal-jal tangan zini zen– karek gol gwen zi mo teipsin niye.
¹⁶ In zep hendep Kristus karek-karek gol gwen zi mo teipsinni asa mam tangankam kwasang gweblaka– mae hap: Asa de tingare zi hip zertreizimdin hip, zen dikim anakan tame gun hup, “Eiwa, Kristus mo kwasang-kwasangna klis gunkum hom,” hen dekam de taibliblankam hendep denaban engaya gwen hap.
¹⁷ Dikire Teipsin Zini Alapsa hendep denaban blikip neisik gweblak hen bosena teip nulsublunda gwek! Sap Zen Zen sa hendep denaban irik gili. Zen molya tilki. Auhu-kamanak de nwekam molya hla da gwek. Ahana hom. In eiwa tangan!
¹⁸ Tane tol Timotius, ee ama emsa gubluꞌan: Emki enlala gwen– ebe hap de ola mensa Alap mo Enhona hamal hap zinik ing ta sonezimkike. Zen zep hwena Alap onakore ola insa emsa aha-en aha-enkam don gweblaꞌak. Zen in zep, desa bahem eititi gwibin– ekakim dowal mo kigi naban de zereijannak tatem zauk gwe.
¹⁹ Yesussu de taibliblannak em enho kles gwesin sremkam tatem zauk gwen. Sap ahakon mes enho kles gwesin sremkam de lowehen hap baes tak. Zen in zep zere mae mo taibliblan nakon mes tangan hendep altink.
²⁰ Himeneus ne Aleksander ne zen kirena. Desa mese anakan guzimk, “Em jemat nakon wet oson. Amki dowal mo kigisa ang ebla.” Ëe mae habe kirekam guzimk: Dekam wehe ahaleꞌanka. Sap zen mes kareksa de ulin hala serankam Kristus mo bosena karek ul gweka.