Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ia anak ni si Ruben, bunga tubuh ni si Israel -- (ai ia do namin anak bunga tubuh, tapi halani na binutakanni podoman ni bapani, gabe minsah ma hak hasintuaonni ai hubani anak ni si Josep, anak ni si Israel), seng masuk hubagas buku tarombo sidea songon anak sikahanan;

² age pe sangapan si Juda i tongah-tongah ni saninani, anjaha humbani marharorohan sada raja, tapi anggo hak hasintuaon hubani si Josep do dabuhni.

³ Ia anak ni si Ruben, bunga tubuh ni si Israel, ai ma: Si Hanok, si Pallu, si Hesron pakon si Karmi.

⁴ Anak ni si Joel: Si Semaya, anak ni ai si Gog, anak ni ai si Simei.

⁵ anak ni ai si Mika, anak ni ai si Reayah, anak ni ai si Baal,

⁶ anak ni ai si Beera, na binoan ni si Tiglat-Pilneser, raja hun Assur hu habuangan; ia do sada kopala ni marga Ruben.

⁷ Saninani mar sasaompung, mangihutkon buku tarombo: Kopalani, si Jekiel pakon si Sakaria,

⁸ pakon si Bela anak ni si Asas, anak ni si Sema, anak ni si Joel, na marianan i Aroer das hu Nebo pakon Baalmeon.

⁹ Marianan do homa ia hampit hapoltakan das hubani pispis ni halimisan, na hampit dipar ni bah Eufrat, ai buei tumang do pinahan ni sidea i tanoh Gilead.

¹⁰ Anjaha bani panorang ni si Saul marporang do sidea dompak halak Hagari, gabe rasei sidea ibahen; anjaha isoluk sidea ma lampo-lampo ni sidea i sab nagori hampit hapoltakan ni Gilead.

¹¹ Patontang pakon sidea marianan do halak Gad i tanoh Basan das hu Salka.

¹² Si Joel do kopalani, si Sapam paidua, dob ai si Janai pakon si Sapat i Basan.

¹³ Ia sanina ni sidea mangihutkon ginompar ni ompung ni sidea bei, ai ma: Si Mikael, si Mesullam, si Seba, si Jorae, si Jakan, si Sia pakon si Heber, pitu halak.

¹⁴ On do anak ni si Abihail, anak ni si Huri, anak ni si Jaroah, anak ni si Gilead, anak ni si Mikael, anak ni si Jesisai, anak ni si Jahdo, anak ni si Bus.

¹⁵ Si Ahi, anak ni si Abdiel, anak ni si Guni do kopala ni ginompar ni ompung ni sidea.

¹⁶ Marianan do sidea i Gilead, i Basan pakon i dusun-dusunni pakon i tanoh sampalan ni Saron das hu pispisni.

¹⁷ Ganupan ai ipamasuk hu bagas buku tarombo bani panorang ni si Jotam, raja ni Juda pakon bani panorang ni si Jerobeam, raja ni Israel.

¹⁸ Ia ginompar ni si Ruben, si Gad pakon satongah marga Manasse adong do bani sidea halak siimbang munsuh, na manghadang tanja pakon podang, pakon sisintak panah ampa halak na somal marmunsuh, ompat puluh ompat ribu pitu ratus onom puluh halak, na sirsir marporang.

¹⁹ Iporang sidea do halak Hagari, Jetur, Napis, pakon Nodab,

²⁰ anjaha sanggah dapotan pangurupion sidea mangimbang sidea, gabe ondos ma hu bagas tangan ni sidea halak Hagari ai pakon haganup na rap pakon sidea, ai dilo-dilo do sidea hubani Naibata i parporangan ai, anjaha itangihon do elek-elek ni sidea ai, halani marhatengeran do sidea Bani.

²¹ Anjaha iboan sidea ma pinahan ni sidea, lima puluh ribu unta, dua ratus lima puluh ribu biri-biri, dua ribu halode, ambahni ai saratus ribu jolma na manggoluh.

²² Ai buei tumang do na rasei, ai humbani Naibata do parporangan ai. Anjaha isoluk sidea ma ianan ni sidea ai das ronsi panorang habuangan.

²³ Ginompar ni satongah marga Manasse marianan do i tanoh ai, singgan ni Basan das hu Baal-Hermon, das hu Seir pakon dolog Hermon ai buei tumang do sidea.

²⁴ Anjaha on do kopala ni ginompar ni ompung ni sidea: Si Eper, si Jesei, si Eliel, si Asriel, si Jeremia, si Hodawya ampa si Jahdiel, puanglima na gogoh, halak na tarbarita, anjaha kopala ni ginompar ni ompung ni sidea.

²⁵ Tapi mardousa ma sidea dompak Naibata ni ompung ni sidea, anjaha marbangkis sidea mangirikkon naibata ni bangsa, pangisi ni tanoh ai, na niagou ni Naibata i lobei ni sidea.

²⁶ Jadi ipuhoi Naibata ni halak Israel ma tonduy ni si Pul, raja ni Assur pakon tonduy ni si Tiglat-Pilneser, raja ni Assur, gabe ibuangkon ma halak Ruben, Gad pakon satongah marga Manasse, anjaha iboan ma sidea hu Hala, Habor, Hara pakon hu bah Gosan, ronsi sadari on.

1 Tawarikh

Video 1 Tawarikh 5

Ikuti Kami:

KONTAK | PARTISIPASI | DONASI