Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nina Raja Daud man kerina perpulungen e, "Anakku Salomo kalak si nggo ipilih Dibata. Tapi ia nguda denga, la lit pengalamenna. Sabap si man bahanen e la istana manusia tapi Rumah Pertoton man TUHAN Dibata.
2 Asa gegehku nggo kulitken persedian guna Rumah Pertoton e. Eme: emas, pirak, tembaga, besi, kayu, batu permata syokam, mutiara, batu mosaik dingen melala batu marmar.
3 I datas ras i babo si e kerina, erkiteken keleng ateku man Rumah Pertoton Dibata, tambah si nggo kusikapken e kerina, kubereken pe erta ngku, eme emas ras pirak.
4 Kubereken tole emas si mejilena lebih seratus ton ras pirak menam 240 ton guna hiasen dingding Rumah Pertoton e
5 dingen man kerina si ibahan tukang-tukang. Genduari ise nari meriah ukurna mereken persembahen man TUHAN?"
6 Emaka meriah ukur kepala terpuk, pegawai suku, komendan meliter, ras pengurus erta kerajan mereken
7 pemere enda guna dahin Rumah Pertoton e. Iberekenna 170 ton emas, 310 ton pirak, 620 ton tembaga, 3.400 ton besi.
8 Ise si lit i bas ia batu-batu permata iberekenna e jadi erta Rumah Pertoton si iurus Jehiel kalak Lewi i bas terpuk Gerson nari.
9 Bangsa emere man TUHAN alu ukur meriah dingen seh riahna iakapna mere e. Raja Daud pe lanai kin alang-alang riahna iakapna.
10 I adep-adepen kerina perpulungen e ipuji Daud TUHAN nina, "TUHAN Dibata nu nini kami Jakup, terpujilah Kam asa lalap seh rasa lalap.
11 Kam kap si mbelin, Kam kap si terberita, Kam kap si mulia, Kam kap si mehulina dingen Kam kap si Mada Kuasa. Kerina langit ras doni Kam si madasa, Kam kap raja, pemerentah i babo kerinana.
12 Kerina erta-erta ras kebayaken rehen i bas Kam nari nge; Kam merentah kerinana alu kuasa ras GegehNdu. Janah Kam ngasup erbahan kalak jadi si mbelin dingen erkuasa.
13 Genduari O Dibata kami, ikataken kami bujur man BaNdu dingen ipuji kami GelarNdu si Mulia!
14 Sabap bangsangku ras aku tuhu-tuhu la ngasup mere man BaNdu, sabap kerina ialoken kami i bas Kam nari nge, janah kami ngulihkenca ngenca man BaNdu kai si nggo IberekenNdu man kami.
15 IetehNdu maka ibentasi kami geluh kami, bagi kalak perlajang ras pertandang bali ras nini-nini kami. Wari-wari kami lepas bagi awih, dingen la lit pengarapen kami.
16 O TUHAN Dibata kami, nggo ipepulung kami erta enda kerina guna mbangun Rumah Pertoton guna kemulian GelarNdu si badia, tapi kerina e reh i bas Kam nari dingen Kam nge empuna kerina.
17 Kueteh maka Kam si nguji pusuh peraten dingen meriah IakapNdu ras bangsa si ertutus ate. I bas pusuh peraten si bersih ras bujur, meriah ukurku merekenca enda kerina man BaNdu, janah kuidah uga BangsaNdu si nggo pulung i jenda alu meriah ukur maba persembahen-persembahen man BaNdu.
18 O TUHAN Dibata nu nini kami Abraham, Isak ras Jakup, jagailah kinipatuhen kalak enda rasa lalap maka tetap ukur BangsaNdu dingen jagailah ia lalap maka setia man BaNdu.
19 Bereken min man anakku Salomo enda kebulaten ukur ngikutken kerina si nggo IperentahkenNdu dingen mbangun Rumah Pertoton si nggo kubahan persedian-persedianna enda."
20 Kenca bage isuruh Daud bangsa e nina, "Pujilah TUHAN Dibatandu!" Emaka kerina perpulungen e muji TUHAN, Dibata nu nini-ninina dingen erjimpuh ras mereken kemulian man TUHAN bage pe man raja.
21 Pepagina igeleh kalak enda asuh-asuhen selaku persembahen si iendeskenna man TUHAN jenari ibereken man bangsa guna ipan. Tambahenna ipersembahken kalak enda seribu lembu, seribu bajar, seribu biri-biri si nguda denga; kerina e itutung kalak enda i babo batar-batar. Lau anggur pe ipersembahken kalak enda ka.
22 Emaka i bas wari e meriah kal ukur kalak enda, man ras minem i adep-adepen TUHAN. Kenca bage, pedua kaliken imomokenna Salomo raja. I bas gelar TUHAN, itangkuhken Salomo jadi raja dingen Sadok jadi imam.
23 Alu bage Salomo nggantiken bapana Daud i bas kursi kinirajan si nggo itetapken TUHAN. Ia jadi raja si erkuasa janah kerina bangsa Israel ngikutken ia.
24 Kerina pegawai-pegawai ras tentera bage pe kerina anak-anak Daud si deban erpadan patuh man Salomo selaku raja.
25 TUHAN erbahanca maka kerina bangsa erkemalangen man Salomo dingen IbahanNa maka Salomo me si muliana asangken raja si deban si nggo merentah Israel.
26 Daud anak Isai merentah Israel
27 empat puluh tahun dekahna. Ia merentah i Hebron pitu tahun dingen telu pulu telu tahun i Jerusalem.
28 Ia mate kenca cawir metua, bayak ras ihamati, jenari anakna Salomo nggantiken ia jadi raja.
29 Sejarah Raja Daud bena-benana seh ku kedungenna isuratken i bas cataten telu nabi eme: Nabi Samuel, Natan ras Gat.
30 Cataten e nuriken uga ia merentah, uga gegehna, dingen kerina si jadi man bana, man Israel ras kerajan sekelewetna.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA