Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ On ma halak Israel mangihutkon bilangan ni sidea, kopala ni mar sasaompung, kopala ni sisaribu pakon sisaratus halak, sonai homa sagala gamot-gamot na marugas bani raja ai ibagas sagala horja bani ganup bagian, na margantih-gantih sasabulan ibagas na satahun; anjaha ganup bagian dua puluh ompat ribu halak do bueini.

² Kopala ni parbagian na parlobei bani bulan sada, ai ma si Jasobeam, anak ni si Sabdiel; dua puluh ompat ribu halak do bueini na masuk hu parbagianan ai.

³ Humbani ginompar ni si Perez do ia, kopala ni haganup pambobai ni bala do ia bani bulan sada.

⁴ Ia kopala ni parbagianan bani bulan dua ai ma si Dodai, halak Ahohi, anjaha masuk hubani parbagiananni do kopala Miklot; dua puluh ompat ribu halak do masuk bani parbagiananni ai.

⁵ Kopala na patoluhon bani bulan tolu, ai ma si Benaya, anak ni malim Joyada; dua puluh ompat ribu halak do masuk bani parbagiananni ai.

⁶ Si Benaya, ai ma sahalak humbani puanglima na tolu puluh halak ai, lanjar ia do kopala ni na tolu puluh halak ai; anjaha masuk hubani parbagiananni ai do anakni, si Amisabad.

⁷ Na paompatkon, bani bulan ompat, ai ma si Asahel, anggi ni si Joab, anjaha si Sebaya, anakni ai do manggantihsi; dua puluh ompat ribu halak do masuk hubani parbagiananni ai.

⁸ Na palimahon bani bulan lima, ai ma kopala Samhud, halak Jisrahi; dua puluh ompat ribu halak do masuk hubani parbagiananni ai.

⁹ Na paonomhon bani bulan onom, ai ma si Ira, anak ni si Ikkes, halak Tekoa; dua puluh ompat ribu halak do masuk hubani parbagiananni ai.

¹⁰ Na papituhon, bani bulan pitu, ai ma si Heles, halak Peloni, humbani ginompar ni si Efraim; dua puluh ompat ribu halak do masuk hu parbagiananni ai.

¹¹ Na paualuhkon, bani bulan ualuh, ai ma si Sibbekai, halak Husati, humbani halak Serahit, dua puluh ompat ribu halak do masuk hubani parbagiananni ai.

¹² Na pasiahkon bani bulan siah, ai ma si Abieser, hun Anatot, humbani ginompar ni si Benyamin; dua puluh ompat ribu halak do masuk hubani parbagiananni ai.

¹³ Na pasapuluhkon bani bulan sapuluh, ai ma si Mahar ai na hun Netofa, humbani halak Serahit, dua puluh ompat ribu halak do masuk hubani parbagiananni ai.

¹⁴ Na pasapuluhsadahon bani bulan sapuluh-sada, ai ma si Benaya, halak Piratoni, humbani ginompar ni si Efraim; dua puluh ompat ribu halak do masuk hubani parbagiananni ai.

¹⁵ Na pasapuluhduahon bani bulan na pasapuluh-duahon, ai ma si Heldai, halak Netofati, humbani ginompar ni si Otniel; dua puluh ompat ribu halak do masuk hubani parbagiananni ai.

¹⁶ Ia kopala ni marga ni Israel sada-sada ai ma: Bani marga Ruben, si Elieser, anak ni si Sikri; bani marga Simeon, si Sepatya, anak ni si Maaka;

¹⁷ bani marga Levi, si Hasabya, anak ni si Kemuel; bani ginompar ni si Aron, si Sadok;

¹⁸ bani marga Juda, si Elihu, sada humbani sanina ni si Daud; bani marga Isasar, si Omri, anak ni si Mikael;

¹⁹ bani marga Sebulon, si Jismaya, anak ni si Obaja; bani marga Naftali, si Jerimot, anak ni si Asriel;

²⁰ bani ginompar ni Efraim si Hosea, anak ni si Asasya; bani na satongah marga Manasse, si Joel, anak ni si Pedaya;

²¹ bani satongah marga Manasse na i Gilead, si Jiddo, anak ni si Sakaria; bani marga Benyamin, si Jehasiel, anak ni si Abner;

²² bani marga Dan, si Asareel, anak ni si Jeroham. Ai ma kopala ni marga ni Israel.

²³ Tapi lang dihut ibilangi si Daud halak na marumur i toruh ni dua puluh tahun, halani na dob iparbagah Jahowa, pabueionni do halak Israel, songon bintang na i langit.

²⁴ Domma namin ipungkah si Joab, anak ni si Seruya, mamilangi, tapi seng dob ope ibahen; ai sogop do papa bani halak Israel marhalanihon ai, halani ai do ase seng isuratkon bilangan ai hu bagas buku barita ari-ari ni Raja Daud.

²⁵ Ia haondosan ni ganup ugas-ugas ni raja ai, ai ma si Asmawet, anak ni si Adiel; anjaha haondosan ni ugas-ugas na i talun, na i kota, na i huta pakon na i benteng, ai ma si Jonatan, anak ni si Usia;

²⁶ haondosan ni halak siparhorja i juma, na manlahoi tanoh ai, ai ma si Esri, anak ni si Helub;

²⁷ haondosan ni pohon anggur, ai ma si Simei, halak Rama; haondosan ni anggur na sinimpan i pohon anggur, ai ma si Sabdi halak Sipmi;

²⁸ haondosan ni hayu jetun pakon hayu ara na i habungan, ai ma si Baal-Hanan, halak Geder ai, anjaha haondosan ni minak, ai ma si Joas;

²⁹ haondosan ni lombu na manampal i Saron, ai ma si Sitrai, halak Saron; haondosan ni lombu na i habungan, ai ma si Sapat, anak ni si Adellai;

³⁰ haondosan ni unta, ai ma si Obil, halak Ismael; haondosan ni halode boru-boru, ai ma si Jehdeya, halak Meronot;

³¹ haondosan ni biri-biri ampa hambing, ai ma si Jasis, halak Hagari. Ai ma ganup gamot haondosan ni ugas-ugas ni Raja Daud.

³² Ia si Jonatan, mangkela ni si Daud, ai ma panuturini, sada dalahi na pantas maruhur anjaha na pentar; ia si Jehiel, anak ni si Hakmoni, ai ma hasoman ni anak ni raja ai.

³³ Si Ahitopel pe panuturi ni raja ai do, anjaha si Husai, halak Arki ai, ai ma huan-huan ni raja ai.

³⁴ Na manggantih si Ahitopel, ai ma si Joyada, anak ni si Benaya, pakon si Abyatar. Si Joab, ai ma kopala ni bala ni raja ai.

1 Tawarikh

Video 1 Tawarikh 27

Ikuti Kami:

KONTAK | PARTISIPASI | DONASI