Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kenca Daud nggo metua kal, anakna Salomo ibahanna jadi raja Israel.
2 Ipepulung Daud kerina peminpin Israel ras kerina imam bage pe kalak Lewi.
3 Isensusna kerina dilaki suku Lewi umur telu puluh tahun ku das. Beliganna kerina lit 38.000 kalak.
4 Iaturken raja 24.000 kalak ngaturken Rumah Pertoton, 6.000 kalak ncikep surat-surat penting ras si nimbang perkara.
5 4.000 kalak jadi pengawal, 4.000 kalak muji TUHAN alu make alat-alat musik si nggo isikapken raja guna keperlun si e.
6 Ibagi Daud suku Lewi jadi telu terpuk, sue ras terpuk-terpukna eme: Gerson, Kohat, ras Merari.
7 Gerson mupus dua anak dilaki eme: Ladan, ras Simei.
8 Ladan lit telu anakna dilaki eme: Jahiel, Setam ras Joel,
9 si jadi kepala kesusuren terpuk Ladan. (Simei lit telu anakna dilaki eme: Elomet Hasiel ras Haran.)
10 Simei mupus empat anak dilaki. Menaken sintua nari ku si nguda eme: Jahat, Sina, Jeus ras Beria. Jeus ras Beria la lit tersena kesusurenna, emaka sada terpuk saja ngenca kalak enda ikira.
11 (1Taw 23:10)
12 Kohat mupus empat anak dilaki: Amram, Eshan, Hebron ras Ussiel.
13 Anakna sintua Amram gelarna. Amram e bapa Harun ras Musa. (Harun ras kesusurenna itetapken seh asa lalap jadi si ngaturken barang-barang si badia, nutung si merim-merim i bas ingan persembahen man TUHAN, erdahin guna TUHAN, ras masu-masu jelma si nterem i bas gelar TUHAN.
14 Tapi Musa kemahen Dibata e, anak-anakna bengket ku suku Lewi.)
15 Musa lit dua anakna dilaki eme: Gersom ras Elieser.
16 Si jadi peminpin i bas anak-anak Gersom eme Sebuel.
17 Elieser sekalak ngenca anakna dilaki eme: Rehabia, tapi Rehabia nterem kesusurenna.
18 Isar eme anak Kohat si peduaken dilaki. Isar mupus anak dilaki eme Selomit. Selomit jadi peminpin terpuk.
19 Anak Kohat si peteluken dilaki eme Hebron. Hebron mupus empat anak dilaki eme: Jeria, Amaria, Jehasiel ras Jekameam.
20 Usiel eme anak Kohat si peempatken dilaki. Usiel mupus dua anak dilaki eme Miha ras Jisia.
21 Merari mupus dua anak dilaki eme: Mahli ras Musi. Mahli pe dua anak dilaki eme: Eleasar ras Kis,
22 tapi Eleasar mate, la lit anakna dilaki, diberu ngenca lit. Anakna si diberu e erjabu ras anak-anak Kis.
23 Musi eme anak Merari si peduaken dilaki. Musi mupus telu anak dilaki eme: Mahli, Eder ras Jeremot.
24 Enda me kesusuren Lewi rikutken terpuk ras keluargana. Tep-tep kalak Lewi nggo isuratken rikutken gelarna. Tep-tep sinursur menaken umur dua puluh tahun ntah lebih, itetapken erdahin i bas Rumah Pertoton TUHAN.
25 Nina Daud, "TUHAN Dibata Israel nggo mereken man BangsaNa dame ras keamanen, janah Ia jine tetap ringan i Jerusalem rasa lalap.
26 Emaka lanai perlu kalak Lewi maba Kemah Perjumpan TUHAN ras barang-barang si ipake i bas persembahen."
27 I bas perentah Daud si perpudina maka kerina kalak Lewi isuratken erdahin kenca umurna dua puluh tahun ku das,
28 jenari tetap erdahin bagi si tersena enda: nampati kesusuren Harun i bas persembahen i bas Rumah Pertoton, pekena-kena kesain ras bilik-bilik Rumah Pertoton, njagai gelah badia tiap barang-barang si badia;
29 nikapken persembahen pangan man Dibata, nikapken tepung si ipergunaken guna persembahen-persembahen, nikapken cimpa si la tama ragi, persembahen si ipanggang, ras nikapken tepung si iaduk ras minak saitun dingen sukat-sukat ras timbangen;
30 janah ertoto ras muji TUHAN tiap erpagi-pagi ras karaben
31 janah sanga persembahen man TUHAN itutung i bas wari Sabat, i bas wari Raya Bulan Mbaru ras wari-wari raya si deban. Ibahan peraturen si netapken teremna kalak Lewi guna ndahiken dahin enda i bas kerina paksa-paksa.
32 Kalak enda itetapken pekena-kena Kemah Perjumpan TUHAN ras Rumah Pertoton nampati senina-seninana kesusuren Harun i bas rumah persembahen.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA