Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nipadongko’mi anjo Patti Parjanjianga lalang ri kema le’baka napasadia Daud untu’ anjo Pattia. Nampa assaremo koro’bang ke’nanga mae ri Allata’ala, iamintu koro’bang nitunu siagang koro’bang untu’ passiamakkang.
2 Le’baki napassareang Daud anjo sikamma koro’banga, nabarakkakimi ra’yaka lalang arenNa Batara,
3 nampa nabage-bagei ngaseng kanre ke’nanga. Sikontu tau niaka anjoreng, bura’ne yareka baine, massing anggapai sikere’ dageng nitunu, roti, siagang kanrejawa kismis.
4 Angngangka’mi Daud siapa are tu Lewi untu’ ampimpingi pa’gaukang passambayanganga mae ri Batara, Allata’alana Israel, ri dallekanna anjo Patti Parjanjianga, siagang kelong, na pammuji-muji.
5 Asaf nipile a’jari pamimping lomoro’ se’re, nampa Zakharia wakkele’na. Yeiel, Semiramot, Yehiel, Matica, Eliab, Benaya, Obed-Edom siagang Yeiel nisare ngaseng tugasa’ untu’ akkarena kacapi. Asaf nisare tugasa’ akkarena simbala’,
6 siagang rua imang, iamintu Benaya siagang Yahaziel nisare tugasa’ untu’ appasa’ra tarompe’ ri dallekanna anjo Patti Parjanjianga.
7 Iaminjo bungasa’na Daud ansarei tugasa’ Asaf siagang aganna ngaseng untu’ akkelong pammuji-muji mae ri Batara.
8 Sukkurukko mae ri Batara birittakangi kalompoanNa caritakangi apa Nagaukanga ri tangnga-tangngana bansa-bansaya.
9 Akkelongko pammuji mae ri Batara birittakangi sikamma bate pare’ malompoNa.
10 Iami Batara tenaya ruanna; ma’rannu-rannuki’, nasaba’ ikattemi taunNa; sikontu anynyombaya ri Ia ma’reja-rejako.
11 Appala’mako kagassingang battu ri Ia, manynyombako ri Ia satunggu-tungguna.
12 Ikau turunganna Yakub, atanNa Allata’ala! ikau turunganna Israel, Umma’ nipileNa! U’rangi sikontu gau’ mappakalannasa’Na, teako takkaluppa ri apa le’baka Napattantu.
13 (16:12)
14 Karaenga Iami Allata’alata, apa le’baka Napattantu nigaukangi malla’bang lino.
15 Tuli mangngu’rangi ri janjinNa, janjinNa Narupai satunggu-tungguna.
16 Appareki parjanjiang siagang Abraham nampa pole siagang Ishak,
17 nampa Napakajarre’ siagang Yakub a’jari parjanjiang satunggu-tungguna mae ri umma’ Israel.
18 Nakana, "Butta Kanaan laKupassareangi mae ri kau a’jari pusaka mae ri kau."
19 Riolo a’jari tubattui umma’Na Batara anjoreng tena siapa jaina ke’nanga.
20 A’lampai ke’nanga battu se’rea bansa mae ri bansa maraeng a’lette’ battu ri se’reang pa’rasangang mae ri pa’rasangang maraengannaya.
21 Mingka tena nipa’biangi ri Batara nijallakkang ri bansa maraeng ke’nanga; lanri ke’nanga Nanipakainga’ sikamma karaenga angkana,
22 "Teako ganggui sikamma tunipileKu, teako a’gau’ ja’dalaki mae ri na’bi-na’biKu."
23 Makkelongko ri Batara, ikau sikontu linoa, pasiaraki allo-allo kabara’ karannuanga angkanaya le’ba’ maki’ Napasalama’.
24 Caritai kala’biranNa ri sikontu bansa-bansaya, gau’-gau’ malompoNa ri umma’ rupataua.
25 Nasaba’ malompoNa Batara siagang sanna’ nipujiNa; Ia musti la’bi nikamallakkang kala sikontu rewataya.
26 Rewata-rewata bansa maraenga poro barhalaji bawang mingka Batara Iami mappa’jari langi’ malompoa.
27 Ia nitammulili ri kalompoang siagang kala’birang, balla’Na marassi koasa siagang karannuang.
28 Puji Batara, ikau rupa taua! Puji kalompoang siagang kagassinganNa.
29 Puji areng mala’biri’Na, erangi koro’banga antama’ ri Balla’Na Sombai Batara siagang pakeang sambayang!
30 Annekkerekko ri dallekanNa, sikontu linoa! Makkassaki buttaya tama’lenggaya.
31 Ma’rannu-rannuko ikau langika siagang buttaya! Birittakangi ri bansa-bansaya angkana Bataraji Karaeng!
32 A’gamarrungko tamparanga siagang sikontu bonena! Ma’rannu-rannuko ikau paranga siagang sikontu lamunganna!
33 Poko’-poko’ ri romang lama’gora rannu nasaba’ battumi Batara untu’ ammarenta ri lino.
34 Sukkurukko ri Batara, nasaba’ baji’Na; niaki pangngamaseanNa satunggu-tungguna.
35 Akkana mako, "O Allata’ala, Mappasalamaka ikambe, pasalamaki ikambe battu koasana bansa-bansaya na Kipa’rappungang ammotere’ ikambe sollanna akkulle appala’ sukkuru’ ikambe siagang mammuji ri areng matangkasatTa!"
36 Puji Batara, Allata’alana Israel, anne kamma na satunggu-tungguna! Nampa akkanamo umma’ Israel, "Aming". Le’baki anjo mammuji-mujimi ke’nanga mae ri Batara.
37 Le’baki anjo nasaremi Daud tugasa’ Asaf siagang tu Lewia maraenganga untu’ tuli angngurusuki apa-apa niaka pasisambunganna siagang passambayangang nigaukanga ri tampa’ napammantangia anjo Patti ParjanjianNa Batara. Allo-allona musti tugasaki ke’nanga anjoreng,
38 na nibantu ri Obed-Edom ana’na Yedutun, siagang 68 tau maraengannaya battu ri bijanna. Obed-Edom siagang Hosa iami pangawala’na sikamma pakke’bu’ lompoa.
39 Mingka Zadok siagang imang-imang maraengannaya nisarei tugasa’ untu’ angngurusuki gau’ passambayanganga ri tampa’ passambayanganga ri Gibeon.
40 Bari’basa’ karuengi ke’nanga musti assare koro’bang nitunu irate ri tampa’ pakkoro’bangnganga situru’ hukkung-hukkung Napassareanga Batara mae ri tu Israel.
41 Imang Zadok siagang anjo imang-imang maraenga nibantui ri Heman siagang Yedutun kammayatompa sikamma tau maraengannaya, ia le’baka nipile untu’ akkelong pammuji ri Batara lanri pangngamaseanNa satunggu-tunggua.
42 Heman siagang Yedutun tugasa’ tongi untu’ tarompeka, simbala’, siagang pakkakasa’ musi’ maraengannaya ia nipakea anrurungangi anjo kelong-kelong pammujia. Anggota-anggotana anjo bija-bijanna Yedutun nisarei tugasa’ untu’ anjagai sikamma pakke’bu’ lompoa.
43 Nampa ammotere’ ngasemmo taua massing ri balla’na. Kammayatompa Daud ammotere’ tommi mange antoaki kaluargana.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA