Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ On ma halak na roh marayak si Daud hu Ziklag, sanggah na maningon marponop ope ia i lobei ni si Saul, anak ni si Kis. Masuk do sidea hu bilangan ni puanglima, na mangurupisi i parporangan,

² halak siparpanah, na pandei mangumbalang marsiamun pakon marsambilou ampa mamanahkon panah. Humbani halak Benjamin sanina ni si Saul:

³ Si Ahieser, kopala ai, pakon si Joas, anak ni si Seemas halak Gibea: ambahni ai si Jesiel pakon si Pelet, anak ni si Asmawet; si Beraka pakon si Jehu halak Anatot;

⁴ si Jismaya, halak Gibeon, sada puanglima i tongah-tongah ni sitolupuluh halak ai, lanjar ia do pambobai ni sitolupuluh halak ai; ambah ni ai si Jeremia, si Jahasiel, si Johanan, si Josabad halak Gedera,

⁵ Si Elusai, si Jerimot, si Bealya, si Semarya, si Sepatya, halak Harip,

⁶ si Elkana, si Jissia, si Asarel, si Joeser pakon si Jasobeam halak Korah;

⁷ si Joela pakon si Sebatya, anak ni si Jerobeam hun Gedor.

⁸ Age humbani halak Gad adong do na mamulig marayak si Daud hu dolog batu i halimisan, halak na borani, halak siparporang na tarlatih, na pandei manjolom gantar pakon tanja, siparbohi songon bohi ni singa, anjaha lingkat songon balua i atas ni dolog.

⁹ Si Ezer na parlobei, si Obaja paidua, si Eliab paitolu,

¹⁰ si Masmana paiompat, si Jeremia pailima,

¹¹ si Attai paionom, si Eliel paipitu,

¹² si Johanan paiualuh, si Elisabet paisiah,

¹³ si Jeremia paisapuluh, si Mahbanai paisapuluh-sada.

¹⁴ Haganupan ai humbani ginompar ni si Gad, kopala-kopala ni bala; sietekan sanggup manlawan saratus halak anjaha sibanggalan manlawan saribu halak.

¹⁵ Sidea ma na mandipari Jordan bani bulan sada, sanggah sampur ganup topini, anjaha ipardakdak ganup na marianan i pamah ai, maporus dompak hapoltakan pakon hasundutan.

¹⁶ Roh do homa humbani halak Benjamin pakon halak Juda marayak si Daud hu benteng dolog batu ai.

¹⁷ Luar do si Daud manjumpahkon sidea, nini ma mambalosi sidea, “Anggo ibagas damei do nasiam na roh in laho mangurupi ahu, ra do ahu marsada ni uhur pakon nasiam; tapi anggo roh do nasiam, laho mantahihon ahu bani munsuhku, age pe seng dong na salah ihorjahon tanganku, Naibata ni ompungta ma na mangidah anjaha na mamapai nasiam.”

¹⁸ Jadi sogop ma Tonduy ni Naibata hubani si Amasai, pambobai ni si tolu puluh halak ai, nini ma: juakjuakmu do hanami, alo Daud, anjaha hasomannami do ham, ale anak ni si Isai! Damei, damei ma bamu, damei ma homa bani na mangurupi ham! Ai iurupi Naibatamu do ham. Jadi ijalo si Daud ma sidea, gabe ibahen ma sidea pambobai ni balani.

¹⁹ Humbani Manasse pe adong do deba na lintun hubani si Daud, sanggah roh ia pakon halak Palistim laho marporang dompak si Saul. Tapi seng saud ia mangurupi sidea, ai dob manriah kopala ni halak Palistim, isuruh sidea ma ia mulak, ai nini sidea do: Ulunta do holi na marmara anggo lintun ia hubani si Saul, tuanni ai.

²⁰ Sanggah na laho mulak ia hu Ziklag, lintun ma hubani halak Manasse: Si Adna, si Josabad, si Jadiel, si Mikael, si Josabad, si Elihu pakon si Siletai, ai ma pambobai ni halak Manasse mar sasaribu.

²¹ Sidea do na mangurupi si Daud mangimbang hulanan ni halak sipanamun, ai puanglima do sidea haganupan anjaha pambobai ni bala.

²² Ai ari-ari do ijai adong na roh hubani si Daud laho mangurupisi, pala gabe sada bala na banggal, songon bala ni Naibata.

²³ On do bilangan ni halak siparporang, na gopas marsinjata, na roh marayak si Daud hu Hebron, laho mangalihkon harajaon ni si Saul hubani si Daud romban hubani hata ni Jahowa.

²⁴ Halak Juda siusung gantar pakon tanja onom ribu ualuh ratus halak, na gopas marsinjata hu parporangan.

²⁵ Humbani halak Simeon, halak na pag marporang, pitu ribu saratus halak.

²⁶ Humbani halak Levi ompat ribu onom ratus halak.

²⁷ Si Joyada, pambobai ni ginompar ni si Aron, tolu ribu pitu ratus halak do hasomanni.

²⁸ Si Sadok, sada halak na maposo anjaha na borani, rap pakon sindohorni, dua puluh dua halak kopala-kopala.

²⁹ Humbani halak Benyamin, sanina ni si Saul, tolu ribu halak do; ai ronsi nuan buei ope humbani sidea na mangirikkon ginompar ni si Saul.

³⁰ Humbani halak Efraim dua puluh ribu ualuh ratus halak, parporang na borani, halak na tarbarita bani ginompar ni ompung ni sidea.

³¹ Humbani satongah marga Manasse sapuluh ualuh ribu halak, pala tarsurat goran ni sidea, ase roh sidea laho pabangkithon si Daud gabe raja.

³² Humbani ginompar ni si Isasar, na pandei pasal ari, na mambotoh barang aha maningon sibahenon ni Israel, dua ratus halak pambobai, anjaha ganup sanina ni sidea unduk do bani hata ni sidea.

³³ Humbani Sebulon, na bingkat hu parporangan, na gopas bei marsinjatahon bagei ni sinjata porang, lima puluh ribu halak, na roh marodor humbani bulat ni uhurni.

³⁴ Humbani Naftali saribu halak pambobai, anjaha hasoman ni sidea, na marsinjatahon gantar pakon tanja, tolu puluh pitu ribu halak.

³⁵ Humbani ginompar ni si Dan, dua puluh ualuh ribu onom ratus halak, sirsir bingkat hu parporangan.

³⁶ Humbani si Asser ompat puluh ribu halak siparporang, na sirsir marporang.

³⁷ Humbani halak Ruben pakon Gad ampa satongah marga Manasse hun dipar ni bah Jordan saratus dua puluh ribu halak do, na iparsinjatai marhitei bagei-bagei ni sinjata porang.

³⁸ Ganup halak siparporang ai, ipabaris mangihutkon ruhut parporangan roh humbani gok ni uhurni hu Hebron, laho pabangkithon si Daud gabe raja manggomgomi ganup halak Israel; na legan ai pe sauhur do laho pabangkithon si Daud gabe raja.

³⁹ Ijai ma sidea rap pakon si Daud tolu ari dokahni, mangan minum, ai domma ipasirsir sanina ni sidea ai hinan bani sidea.

⁴⁰ Age halak na dohor bani sidea das hu Isasar, Sebulon pakon Naftali, roh do mamboan sipanganon i atas ni halode, unta, pakon lombu, ai ma: Sipanganon humbani nitak, kuei humbani buah ni jambu marsampur buah ni anggur, anggur pakon minak, lombu pakon biri-biri buei tumang, ai malas do uhur ni Israel.

1 Tawarikh

Video 1 Tawarikh 12

Ikuti Kami:

KONTAK | PARTISIPASI | DONASI