Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E bakto jareya tantarana oreng Filistin epakalowar kabbi epanyerranga Isra’il; daddi tantara Isra’il kalowar ka medan paperrangan; oreng Isra’il jareya akemah e seddi’na Eben-Haezer, dineng tantara Filistin akemah e Afek.
2 Tantara Filistin molae nyerrang, ban saellana bangsa se dhadhuwa’ jareya aperrang ce’ daddina, tantara Isra’il kala; se mate e medan perrang jareya ra-kera pa’ ebu oreng.
3 E bakto karena tantara se gi’ odhi’ abali ka parkemahan, para pamimpinna Isra’il ngoca’, "Arapa sateya reya bi’ PANGERAN oreng Isra’il me’ epanneng kala oreng Filistin? Mara Petthe Parjanjiyan rowa kala’ bai dhari Silo, giba dha’ enna’, sopaja bi’ PANGERAN bangsa Isra’il reya etolonge sarta eparenge salamet dhari moso."
4 Para pamimpinna oreng Isra’il jareya padha nyoro oreng ka Silo epangone’e Petthe Parjanjiyanna PANGERAN se daddi tahtana PANGERAN Se Mahakobasa. Pottrana Eli se kadhuwa, iya areya Hofni ban Pinehas, noro’ bunte’ Petthe Parjanjiyan jareya.
5 Saellana Petthe Parjanjiyan jareya napa’ ka parkemahan, reng-oreng Isra’il padha asorak ce’ kajana, sampe’ bume agundhek.
6 Oreng Filistin ngedhing keya soragga oreng Isra’il jareya, pas padha ngoca’, "Arapa oreng Ibrani me’ rak-soragan?" Tape e bakto reng-oreng Filistin jareya tao ja’ Petthe Parjanjiyanna PANGERAN la napa’ ka parkemahanna oreng Ibrani,
7 kabbi pas padha tako’, sarta ngoca’ kantha reya, "Badha diba dhateng ka parkemahanna oreng Ibrani! Calaka’! Sengko’ ban ba’na ta’ tao ngalame se kantha reya.
8 Calaka’ onggu! Sapa se bisa’a nolonge ba’na ban sengko’ ngadhebbi ba-diba se kowat jareya? Guta’ ba-diba jareya keya se mate’e oreng Messer e sagara beddhi lamba’ rowa ta’ iya?
9 Mara ba’na paraja ate, reng-oreng Filistin! Mara aperrang pakantha lalake’ se ongguwan, sabab mon ta’ kantha jareya sengko’ ban ba’na kabbi tanto daddi dunorra oreng Ibrani jareya, akantha oreng Ibrani se daddi dunorra sengko’ ban ba’na gi’ lamba’ rowa. Daddi mara padha aperrang pabangal!"
10 Saellana jareya oreng Filistin aperrang kalaban gu-onggu sarta makala tantara Isra’il. Oreng Isra’il padha buru ka kemahna bang-sebang. Kakala’anna oreng Isra’il talebat sarana: tantara Isra’il se mate e dhalem perrang jareya badha tello polo ebu oreng.
11 Petthe Parjanjiyanna Allah erebbu’ moso dhari tanangnga oreng Isra’il, ban pottrana Eli se kadhuwa, iya areya Hofni ban Pinehas, padha mate e dhalem paperrangan jareya.
12 Badha oreng dhari suku Benyamin buru ka’-berka’ dhari medan paperrangan ka Silo, sarta dhapa’ ka jadhiya e are jareya keya. Menangka tandha ja’ atena sossa, kalambina ebit-sebbit ban cethagga epobuwi tana.
13 Eli teppa’na alenggi guk-magguk e korse e penggirra lorong, kobater mekkere kasalameddanna Petthe Parjanjiyan. E bakto oreng se ka’-berka’ gella’ manapa’ kabar ja’ Isra’il kala, pandhudhu’ e jadhiya kabbi padha nanges ce’ kajana.
14 Eli meyarsa tangessa oreng se bannya’ jareya, pas atanya, "Badha apa me’ ce’ rammena?" Oreng se ngeba berta gella’ nyander ka Eli sambi ka’-berka’; sanapa’na ka seddi’anna pas manapa’ kabar se ta’ nyaman jareya.
15 E bakto jareya yuswana Eli la sangang polo ballu’ taon ban socana la rabeng.
16 Ca’na oreng gella’ ka Eli, "Abdina buru dhari medan paperrangan, terros berka’, buru napa’ samangken ka ka’dhinto." Eli atanya, "Baramma kabarra, na’?"
17 Oreng se ngeba berta gella’ ngoca’, "Isra’il buru, tako’ ka oreng Filistin. Isra’il kala ce’ sarana. Bannya’ oreng se adinggal dunnya, jugan pottrana panjennengngan, Hofni sareng Pinehas. Sarengngan pole Petthe Parjanjiyan egiba buru moso!"
18 E bakto oreng jareya ngabarragi parkara Petthe Parjanjiyan gella’, Eli pas labu dhari korsena, agentang e seddi’anna labang saketheng. Yuswana la ce’ towana, badanna ce’ lempona; e bakto labu jareya guluna potong, terros seda. Eli mimpin Isra’il pa’ polo taon abidda.
19 E bakto jareya, mantona Eli, iya areya binena Pinehas, teppa’na ngandhung raja, ban la para’ baktona se rembi’a. E bakto ngedhing kabar ja’ Petthe Parjanjiyan egiba buru moso, sarta ja’ mattowa ban lakena la mate, laju sake’ tabu’ rembi’a, ban ta’ abit saellana jareya pas rembi’.
20 E bakto para’ mateya, babine’an se nolonge ngoca’, "Sampeyan pasabbar ban pakowat! Pottrana sampeyan lalake’!" Tape binena Pinehas jareya ta’ nyaot ban ta’ marduli ka reng-oreng jareya.
21 Ana’na enyamae Ikabod, sambi ngoca’ kantha reya, "Kahadiranna Pangeran Se Molja ampon elang dhari Isra’il" — se emaksod iya areya ngoca’agiya ja’ Petthe Parjanjiyan la erampas moso ban mattowa tor lakena la mate.
22 Daddi binena Pinehas ngoca’, "Kahadiranna Pangeran Se Molja ampon elang dhari Isra’il, sabab Petthe Parjanjiyanna Allah ampon erampas moso."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA