Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Jadi marporang ma halak Palistim pakon halak Israel; maporus ma halak Israel hun lobei-lobei ni halak Palistim, anjaha radag ma sidea i atas ni Dolog Gilboa.
2 Iasak halak Palistim ma si Saul pakon anakni ai, anjaha ibunuh sidea ma si Jonatan, si Abinadab pakon si Malkisua, anak ni si Saul ai.
3 Jobu tumang do parporangan ai inggot ni si Saul, anjaha domma torang ia taridah bani halak siparpanah; jadi luha parah ma ia ibahen parpanah ai.
4 Jadi nini si Saul ma dompak na mamboan sinjatani, “Sintak ma podangmu, tobak ma ahu, ase ulang roh halak na so marsunat ai manobak anjaha pahirihon ahu.” Tapi seng ra na mamboan sinjatani ai, halani mabiar tumang do ia. Dob ai ibuat si Saul ma podangni ai, anjaha ijombahon ma dirini hu bani podang ai.
5 Dob iidah siboan sinjatani ai na dob matei si Saul ai, ia pe idabuhkon ma dirini hu bani podangni ai, jadi matei ma ia pakonsi.
6 Sonai ma parmatei ni si Saul pakon anakni na tolu ai pakon juakjuakni siboan sinjatani ai ampa haganup hasomanni bani na sadari ai.
7 Jadi dob iidah halak Israel, na marianan i dipar ni habungan ai pakon na i dipar ni Jordan, na dob maporus halak Israel, anjaha na dob matei si Saul pakon anakni ai, itadingkon sidea ma huta ni sidea laho maporus. Dob ai roh ma halak Palistim marianan ijai.
8 Patarni ai, sanggah na roh halak Palistim ai mangayob ugas-ugas ni na matei ai, jumpah sidea ma si Saul pakon anakni na tolu ai ragei i atas ni Dolog Gilboa.
9 Ibuat sidea ma uluni, anjaha itanggali ma sinjatani, dob ai isuruh sidea ma halak hu sab Tanoh Palistim, laho mambaritahon hamonangan ai hu Rumah ni Naibata ni sidea pakon hu bani bangsani haganup.
10 Itibalhon sidea ma sinjatani ibagas rumah ni Astarot; tapi anggo bangkeini igantungkon sidea ma bani tembok ni huta Betsan.
11 Tapi dob ibogei parhuta Jabes na i Gilead barita pasal na binahen ni halak Palistim ai hu bani si Saul,
12 mintor bingkat ma ganup halak na garang, mardalan ma sidea layur sabornginni ai, anjaha ipaturun sidea ma bangkei ni si Saul pakon bangkei ni anakni ai hun tembok ni huta Betsan; dob ai mulak ma sidea hu Jabes anjaha irasog ma ijai.
13 Dob ai ibuat sidea ma holi-holini, itanom ma ai i toruh ni jabi-jabi na i Jabes, anjaha marpuasa ma sidea pitu ari dokahni.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA