Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bani panorang ai ipatumpu halak Palistim ma balani laho marporang dompak halak Israel. Jadi nini si Akis ma dompak si Daud, “Botoh ma, ham do hasomanku bingkat laho marporang, ham rap pakon hasomanmu.”
2 Nini si Daud ma mambalosi si Akis, “Dear, ase ibotoh ham naha gogoh ni juakjuakmu on.” Jadi nini si Akis ma dompak si Daud, “Antong ham ma pangawalhu sadokah manggoluh ahu.”
3 Tapi domma matei anggo si Samuel, domma itangisi ganup halak Israel ia, anjaha itanom i Rama, i hutani. Domma ipalaho si Saul paniaran pakon partondung hun tanohni ai.
4 Domma martumpu halak Palistim, anjaha marsaran sidea i Sunem; si Saul pe domma ipatumpu ganup halak Israel, anjaha marsaran i Gilboa.
5 Jadi dob iidah si Saul bala ni halak Palistim ai mabiar ma ia, gobir tumang uhurni.
6 Isungkun si Saul ma Jahowa, tapi seng ibalosi Jahowa ia, barang marhitei nipi barang marhitei urim, barang marhitei nabi pe.
7 Dob ai nini si Saul ma dompak juakjuakni, “Pindahi nasiam ma bangku paniaran naboru, ase laho ahu hu bani laho manungkunsi.” Nini juakjuakni ai ma mambalosi, “Tonggor ma, andai i Endor adong do sada halak paniaran naboru.”
8 Dob ai ilagei ma rupani, ipakei ma hiou na legan; laho ma ia rap pakon hasomanni dua halak, mangindahisi; das ma sidea borngin-borngin hu bani naboru ai. Jadi nini ma, “Patugah ma na sasintongni bangku marhitei na siar bamu, anjaha pahuta ham ma bangku halak na sihol patugahonku bamu.”
9 Nini naboru ai ma hu bani, “Tonggor ma, ibotoh ham do na binahen ni si Saul, ai ma sonaha paniapkonni bani halak paniaran pakon partondung hun nagori on. Mase ma sihol sidingonmu ahu, ase matei ahu?”
10 Mintor marbija ma si Saul marhitei goran ni Jahowa, nini ma, “Songon sintongni manggoluh Jahowa, seng marsalah ham ibagas pahara on!”
11 Dob ai nini naboru ai ma, “Ise ma pahutaonku bamu?” Nini ma, “Pahuta ma si Samuel bangku!”
12 Dob ibogei naboru ai goran Samuel ai, gogoh ma ia mandoruh anjaha nini naboru ai ma hu bani si Saul, “Mase ma paoto-otoonmu ahu? Si Saul do hape ham.”
13 Nini raja ai ma hu bani, “Ulang ham mabiar! Aha dong iidah ham?” Nini naboru ai ma dompak si Saul, “Huidah sada tonduy tangkog hun tanoh.”
14 Nini si Saul ma hu bani, “Sonaha rupani?” Nini naboru ai ma, “Adong sada halak na matua tangkog hu atas, marbaju-baju mantel do ia.” Jadi ibotoh si Saul ma, si Samuel do ai. Mintor marsombah ma ia, bohini das hu tanoh.
15 Nini si Samuel ma dompak si Saul, “Mase ma isunsahi ham ahu, marhitei na ipahuta ham ahu?” Nini si Saul ma mambalosi, “Sosak tumang do ahu; iporang halak Palistim do ahu, anjaha itadingkon Naibata do ahu, seng be ibalosi ahu barang marhitei nabi atap nipi pe, halani ai do ase hudilo ham, ase ipabotohkon ham bangku atap aha do sibahenonku.”
16 Dob ai nini si Samuel ma, “Tapi mase ma ahu sungkunonmu, anggo Jahowa pe domma sirang hun bamu anjaha gabe imbangmu?
17 Domma ibahen Jahowa bamu songon na dob hinatahon-Ni marhitei ahu; domma ibuat Jahowa hun bamu harajaon ai, anjaha iberehon hu bani halak na legan, hu bani si Daud.
18 Halani na so itangihon ham hata ni Jahowa, anjaha seng idaskon ham hu bani halak Amalek pargajag ni uhur-Ni, ai ma halani ase sonin pambahenan ni Jahowa bamu sadari on.
19 Ambahni ai ondoskonon ni Jahowa ma halak Israel pakon ham hu tangan ni halak Palistim; patar ma parayakonmu ahu pakon anakmu. Bala ni halak Israel pe ondoskonon ni Jahowa ma hubagas tangan ni halak Palistim.”
20 Jadi mintor tompas ma si Saul langkop hu tanoh, mabiar tumang ia halani hata ni si Samuel ai; anjaha seng margogoh ia, halani seng mangan ia layur sadari saborngin.
21 Mintor roh ma naboru ai hu bani si Saul, anjaha iidah ma rusak tumang ia; nini ma hu bani, “Tonggor ma, ibalosi jabolonmu naboru on do ham; huasamkon do hosahku, anjaha hubalosi do hatamu na hinatahonmu bangku.
22 Halani ai tangihon ham ma hata ni jabolonmu naboru on; hupasirsir ma otik ruti bamu; pangan ham ma, ase adong gogohmu laho mannunuti dalanmu.”
23 Tapi manjua do ia, nini ma, “Seng sir uhurhu mangan!” Tapi halani sai ielek-elek juakjuakni pakon naboru ai ia, gabe ibalosi ma sidea. Jongjong ma ia dob ai hundul ma ia hu podom-podoman.
24 Adong do bani naboru ai sada anak ni lombu na pinamombur i rumahni, podas ma isayat ai; ibuat ma nitak, iagu ma ai anjaha imasak ma ruti na so niigaran hunjai.
25 Dob ai iidangkon ma ai hulobei ni si Saul pakon juakjuakni ai; jadi mangan ma sidea. Dob ai bingkat ma sidea mardalan bani na saborngin ai.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA