Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ca’na panggaliyanna Daud, "Maske baramma’a e settong bakto tanto Saul mateyana sengko’. Daddi, tadha’ jalan laen monggu ka sengko’, kajabana buru ka nagara Filistin. Kalaban cara se kantha jareya Saul ta’ kera nyare’e sengko’ pole e Isra’il, ban sengko’ tanto aman."

² Saellana jareya Daud ban pangerengnga se nem atos oreng bannya’na duli meyos ka Akhis pottrana Ma’okh, rato e kottha Gat.

³ Daud pas neptep e Gat ban para pangerengnga, kabbi padha apolong ban ana’ binena bang-sebang. Daud abakta rajina se dhadhuwa’, iya areya Ahino’am babine’ dhari Yizre’el, ban Abigail, randhana Nabal babine’ Karmel rowa.

⁴ E bakto Saul meyarsa ja’ Daud la buru ka Gat, pas ta’ nyerser pole.

⁵ Daud laju adhabu ka Akhis, "Manabi junandalem neser ka abdidalem, ngereng abdidalem parenge settong kottha kene’ se ngadhalem se badhi ekennengngana abdidalem, sopaja abdidalem ta’ terros ngampong kennengngan ka junandalem e ibu kottha ka’dhinto."

⁶ Akhis laju marengngagi kottha Ziklag ka Daud, daddi Ziklag laju ekaandhi’ to-rato Yehuda sampe’ sateya reya.

⁷ Daud alenggi e nagara Filistin abidda sataon pa’ bulan.

⁸ Saabidda jareya Daud ban para pangerengnga seggut nyerrang oreng Gesur, oreng Girzi, ban oreng Amalek; sa-bangsa jareya la abit se neng e dhaera jareya. Daud nyerrang sampe’ gan Syur, terros ka Messer.

⁹ Sakabbinna oreng lalake’ ban babine’ epate’e; dumba, sape, hemar, onta, la’-mala’ bi-kalambina erampas keya. Saellana jareya laju abali ngadhep ka Akhis.

¹⁰ Mon Akhis atanya, "Ba’na entar nyerrang dha’emma e are teya?" Daud tanto mator ja’ salerana meyos ka bagiyan lao’na Yehuda otaba ka dhaera oreng Yerahme’el otabana ka dhaera kennengnganna oreng Keni.

¹¹ Tadha’ oreng settonga e sakabbinna dhaera se eserrang jareya se ta’ epate’e, maksodda sopaja tadha’a oreng dhari ra-dhaera jareya se bisa’a entar ka Gat sarta pas areppottagi pa-apa se elakone Daud ban para pangerengnga. Daddi kantha jareya se elampa’agi Daud saabidda alenggi e nagara Filistin.

¹² Tape Akhis parcaja ka Daud pas adhabu e dhalem panggaliyanna, "Oreng reya ekabaji’i parana bi’ bangsana dibi’, sampe’ daddi tang kabula saomorra."

1 Samuel

Video 1 Samuel 27

Ikuti Kami:

KONTAK | PARTISIPASI | DONASI