Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Mate Samuel, jenari pulung kerina bangsa Israel nangisisa. Kenca bage ikuburken kalak enda ia i rumahna i Rama.Kenca si enda, lawes Daud ku taneh mesawang Paran.
2 I jah lit sekalak dilaki i bas terpuk Kalep nari, Nabal gelarna. Kutana i Maon, janah lit tanehna deherken kota Karmel. Ia kalak bayak tuhu-tuhu, biri-birina lit 3.000, kambingna lit 1.000. Ndeharana si Abigail mejile janah cerdik, tapi Nabal kalak mediker, macik lagu langkahna. Paksa e sangana igunting Nabal mbulu biri-birina i Karmel,
3 (1Sam 25:2)
4 janah Daud, sangana i bas taneh si mesawang megi kerna si e.
5 Emaka isuruhna sepuluh kalak anak perana maba tenah ku Karmel, gelah ijumpaina Nabal, peseh kata mejuah-juah i bas Daud nari.
6 Ipedahkenna man anak perana ndai gelah ikatakenna man Nabal, "O teman, Daud ngataken mejuah-juah man bandu, bage pe kerina si lit i bas kam ras keluargandu la kurang kai pe.
7 Nggo ibegina maka kam sangana nggunting mbulu biri-birindu, janah ipebetehkenna atena man bandu maka kalak si ermakan asuh-asuhenndu nggo ras kami janah la ibahan kami si jahat man bana. Kerina si lit i bas ia sada pe la lit itangko kidekah ia i Karmel.
8 Sungkunilah ia kerina, tentu iturikenna man bandu. Kami enda nggo reh sanga wari pesta, janah ipindo Daud man bandu gelah meriah min ukurndu ngaloken kami. Mekuah min atendu maka iberekenndu kai si terbereken man kami suruh-suruhenndu ras man anakndu Daud."
9 Teman-teman Daud nehken berita enda man Nabal i bas gelar Daud. Kenca bage itimaina i je.
10 Janah kedungenna ngaloi Nabal nina, "Daud? Ise kin ia? La nggo pernah kubegi kerna ia! Genduari enda dem kal taneh enda alu budak-budak si lompat i bas tuanna nari!
11 La aku nggit muat roti ras lauku, ras asuh-asuhen si nggo kugeleh man si nggunting biri-biringku, jenari merekenca man kalak si la kuteh i ja nari rehna!"
12 Mulih teman-teman Daud ndai, nuriken kai si nggo ikataken Nabal.
13 "Bentingken pedangndu!" nina Daud mereken perentah; emaka minter bage ibahanna kerina. Daud pe ibentingkenna ka pedangna jenari berkat ia ras kira-kira 400 kalak temanna, janah itadingkenna 200 kalak njagai barang.
14 Sekalak i bas suruh-suruhen Nabal ngataken man Abigail ndehara Nabal, "Nggo ibegikenndu maka Daud nuruh piga-piga kalak persuruhen i bas taneh si mesawang nari ngataken mejuah-juah man tuan kami, tapi megombang ia man kalak ndai
15 situhuna mehuli kal nge ia man kami; la pernah kami igangguna, janah kidekah kami ras ia i bas mbalmbal enda, la lit sada pe barang kami bene.
16 Ikawalina kami suari ras berngi kidekah kami ras ia mpermakani biri-biri.
17 Ngarap aku gelah iukurkenndu kerna si enda janah putuskenlah kai si man bahanen. Enda banci maba cilaka si mbelin man tuan kami ras kerina keluargana. Tuan kami jahat perukurenna maka la ia nggit megiken cakap ise pe!"
18 Pedas-pedas ipepulung Abigail 200 ngkibul roti, dua guci kuling-kuling dem isin lau anggur, lima biri-biri si ipanggang, sepulupitu kilo buah gandum si isauk, 100 tandan buah anggur ras 200 kue buah ara si nggo ikerahken, jenari itamakenna kerina ku das kalde.
19 Kenca bage ikatakenna man suruh-suruhen ndai, "Leben kam berkat janah aku ngikut arah pudi." Tapi la ia ngata man perbulangenna.
20 Sanga Abigail ngersak kaldena mentasi sada eluk dalan i teruh uruk, rempet ia jumpa ras Daud ras teman-temanna si reh kempak ia.
21 Tupung e Daud sangana rukur, "Sia-sia kap kukawali sikerajangen kalak ah i bas taneh si mesawang enda? La kap lit kebenen barangna, tapi ibalasna kiniulinku alu si jahat.
22 Dibatalah si munuh aku adi la kin kubunuh kerina kalak ah ndai keri ope denga erpagi-pagi!"
23 Kenca Abigail ngidah Daud pedas-pedas ia nusur i das kaldena nari, jenari minter ia erjimpuh ku taneh
24 i tapak-tapak Daud, janah nina man Daud, "Mekuah atendu min Bapa, begikenlah aku! Aku sajalah si mersan kesalahen e.
25 La pedah iperdiatekenndu Nabal kalak si la terpake e! Ia payo kal bagi gelarna si motu. Aku sangana mbarenda la i je asum suruh-suruhenndu reh, Bapa.
26 TUHAN kap si ngolangi kam maka la ibunuhndu imbang-imbangndu. Janah genduari ersumpah aku alu gelar TUHAN si nggeluh maka musuh-musuhndu ras kerina si atena erbahan si jahat man bandu la banci la iukum bagi Nabal.
27 Ngarap aku Bapa, gelah ialokenndu luah si nggo kubaba man bandu, janah berekenlah man teman-temanndu.
28 Mekuah min atendu Bapa, sasapkenlah kesalahen si nggo kubahan. Tentu ibahan TUHAN kam pagi jadi raja, ras kesusurenndu pe, erkite-kiteken kam nehken perang TUHAN, janah la kam nggit erbahan si jahat kidekah kam nggeluh.
29 Adi lit kalak si ngayaki kam atena janah ndarami dalan munuh kam, TUHAN Dibatandu si ngkawali kam bagi sekalak si njagai sada barang si meherga. Janah adi kerna musuh-musuhndu, ugapa pe IbenterkenNa ia ndauh-ndauh, desken sekalak dilaki si menterken batu alu kalimbawangna.
30 Janah kenca nggo pagi isehken TUHAN kerina si mehuli si IpadankenNa man bandu janah nggo IangkatNa kam jadi raja Israel,
31 lanai pagi perlu kam suhsah ras erkadiola Bapa, erkite-kiteken munuh alu la ersabap ntah pe erbalas rikutken ukurndu jine. Janah kenca pagi isehken TUHAN pasu-PasuNa man bandu, Bapa ngarap aku gelah ula ilupakenndu aku."
32 Nina Daud man bana, "Terpujilah TUHAN, Dibata Israel, si nggo nuruh kam sendah njumpai aku!
33 Bujur man Dibata kerna kepantasenndu rukur ras kerna kai si nggo ibahanndu sendah i bas ngolangi aku erbahan kejahaten munuh ras erbalas rikutken ukurku jine.
34 TUHAN si erbahanca maka la kusehken si jahat man bandu. Tapi ersumpah aku i bas gelar Dibata Israel si nggeluh maka adi la pedas-pedas kam njumpai aku, kerina teman-teman Nabal nggo min ndai mate ope denga erpagi-pagi!"
35 Kenca bage ialoken Daud kai si ibaba Abigail man bana, janah nina Daud man bana, "Mulihlah kam ku rumahndu janah ula aru atendu. Sue ras pemindonndu man bangku bage nge kubahan."
36 Mulihken Abigail, jumpa ia ras Nabal si sangana erpesta i rumah bagi pesta sekalak raja. Ia sangana mabuk ras ersenang-senang, emaka kai pe la iturikenna man bana seh pepagina erpagi-pagi.
37 Kenca bage, kenca jore ukurna, ituriken Abigail man bana kerina. Rempet kumat penakit jantungna jenari sitik pe lanai ia ngasup kemuit.
38 Kira-kira sepuluh wari kenca si e ipalu TUHAN me Nabal jenari mate ia.
39 Kenca ibegi Daud maka Nabal nggo mate nina, "Terpujilah TUHAN! Nggo erbalas Ia man Nabal erkite-kiteken igombangina aku janah nggo IjagaiNa aku, suruh-SuruhenNa gelah ula aku erbahan salah. TUHAN nggo ngukum Nabal erkite-kiteken kejahatenna." Jenari isuruh Daud gelah Abigail isungkuni man ndeharana.
40 Lawes suruh-suruhenna ndahisa ku Karmel janah nina man Abigail, "Isuruh Daud kami ngelegi kam jadi ndeharana."
41 Mungkuk Abigail seh ku taneh, jenari nina, "Aku kap suruh-suruhenna, nggo aku ersikap murihi kerina nahe suruh-suruhenna pe."
42 Pedas-pedas ia ersikap jenari iersakna kaldena. Itemani lima kalak pelayan si diberu, lawes ia ras suruh-suruhen Daud jenari jadi ndehara Daud ia.
43 Ope denga si e Daud nggo ngempoi Ahinoam i Jesreel nari, janah genduari Abigail pe nggo jadi ndeharana.
44 Sanga si e, Saul mereken anakna Mihal, ndehara Daud, man Palti anak Lais, si gelgel e ia anak kuta Galim.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA