Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai ihatahon si Saul ma hu bani si Jonatan anakni ai pakon hu bani juakjuakni, ase ibunuh sidea si Daud; tapi rosuh tumang do uhur ni si Jonatan anak ni si Saul ai mangidah si Daud.
2 Jadi ipatugah si Jonatan ma ai hu bani si Daud, nini ma, “Ipindahi uhur ni bapangku si Saul, ase sihol mamunuh ho; halani ai jaga ma ho bani dirimu patar girah sogod, marponop ma ho, ulang taridah.
3 Tapi anggo ahu luar ma ahu anjaha jongjong i lambung ni bapa i ladang parponopanmai, anjaha barang aha na hu idah ijai, hupatugah pe ai bam.”
4 Dob ai itarsingatkon si Jonatan ma gabei ni si Daud na madear ai hu bani si Saul bapani ai, nini ma hu bani, “Ulang ma mardousa raja in halani si Daud, ai seng adong dousani bamu, tapi jenges sahalian do pambahenanni bamu.
5 Iasamkon do hosahni laho mamunuh halak Palistim ondi, anjaha hatuahon bolon do ibahen Jahowa hu bani ganup halak Israel. Iidah ham do ai, anjaha marmalas ni uhur ham; mase ma sihol mardousa ham bani daroh, na so marpipot marhitei na mamunuh si Daud, seng marhala?”
6 Jadi itangihon si Saul ma sora ni si Jonatan ai, marbija ma ia, “Songon sintongni manggoluh Jahowa, seng bulih bunuhon ia.”
7 Jadi idilo si Jonatan ma si Daud, anjaha ipatugah ma hu bani ganup hata ondi. Dob ai iarahkon si Jonatan ma si Daud hu bani si Saul, anjaha i lobei ni ma ia songon na sain dokah.
8 Tapi masa ma use parporangan; bingkat ma si Daud laho mamorang halak Palistim, gabe talu tumang ma sidea ibahen, lanjar maporus ma sidea ibahen.
9 Dob ai roh ma use tonduy na jahat hun bani Jahowa hu bani si Saul, sanggah hundul ia i rumahni pajolom-jolom tanja ibagas tanganni; marhusapi do anggo si Daud.
10 Isuba si Saul ma mamantom si Daud hu bani dingding marhitei tanjani; tapi idiharhon si Daud do, gabe pantik ma tanja ai hu dingding. Maporus ma si Daud, gabe maluah ma ia.
11 Bornginni ai isuruh si Saul ma suruhanni hu rumah ni si Daud laho marjaga, ase boi bunuhon ia patarni ai. Tapi roh ma si Mikal, parinangonni ai patugahkon hu bani, “Anggo seng ipaluah ham hosahmu borngin on, maningon bunuhon ma ham patar.”
12 Dob ai itantan si Mikal ma si Daud hun jandela hu toruh; maporus ma ia gabe maluah.
13 Ibuat si Mikal ma gana-gana terapim, anjaha irageihon ma ai hu podomanni; halanguluni bobak ni hambing ibahen, anjaha isabingi ma ai bani hiou.
14 Dob ai isuruh si Saul ma suruhanni mangalop si Daud. Tapi nini si Mikal ma, “Boritan do ia.”
15 Dob ai isuruh si Saul ma use suruhanni manorih si Daud, nini ma, “Boan ma ia hu bangku i atas ni podomanni, ase hubunuh ia.”
16 Jadi dob roh suruhan ai, tonggor ma gana-gana terapim do hape i podomanni, anjaha bobak ni hambing tunggal halang uluni.
17 Nini si Saul ma dompak si Mikal, “Mase ma sonin pangoto-otoimu bangku, anjaha ipalopas ho munsuhku laho, gabe maluah ia?” Jadi nini si Mikal ma dompak si Saul, “Nini hu bangku, ʻLopas ahu laho, mase ma rahanan bunuhonku ho?ʼ”
18 Tapi maporus do anggo si Daud gabe maluah ia, anjaha das ma ia hu bani si Samuel i Rama, anjaha ipatugah ma bani haganup, na binahen ni si Saul hu bani. Jadi laho ma ia pakon si Samuel, gabe marianan ma sidea i Nayot.
19 Jadi adong ma na patugahkon hu bani si Saul, “Tonggor ma, i Nayot na i Rama do si Daud marianan.”
20 Jadi isuruh si Saul ma suruhanni mangalopi si Daud; gabe iidah sidea ma tumpuan ni nabi na manjahai, anjaha si Samuel do kopala ni sidea. Jadi sogop ma Tonduy ni Naibata hu bani suruhan ni si Saul, gabe manjahai ma age sidea.
21 Dob ipatugah na masa ai hu bani si Saul, gabe isuruh ma suruhanni na legan, gabe manjahai ma age sidea; dob ai isuruh si Saul ma suruhanni patoluhalihon, tapi sidea pe manjahai do.
22 Dob ai ia sandiri pe laho ma hu Rama, gabe das ma ia hu parigi bolon na i Seku; sungkun-sungkun ma ia, “Ija do si Samuel pakon si Daud?” Nini halak ma, “Tonggor ma, i Nayot, na i Rama do ia.”
23 Dob ai laho ma ia hujai, hu Nayot, na i Rama, gabe sogop ma age hu bani Tonduy ni Naibata; anjaha sanggah na mardalan ai ia, manjahai ma ia, ronsi das ia hu Nayot na i Rama.
24 Ia pe itanggali ma pakeianni, anjaha manjahai ma ia i lobei ni si Samuel, anjaha tibal ia salang-salang layur sadari sabornginni ai. Halani ai do ase ihatahon halak, “Dihut do homa si Saul i tongah-tongah ni nabi-nabi?”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA