Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri se’reang wattu napagioki tantarana tu Filistin untu’ maju mange a’bundu’. Naatoro’mi barisi’na ke’nanga ri kota Sokho, ri daera Yehuda, nampa appare’ kema ri alla’na Sokho siagang Azeka, ri ampi’na Efes-Damim.
2 Saul siagang tu Israel a’rappungang tommi siagang appareki kema ri Lappara’ Ela. Sadiami ke’nanga untu’ andallekangi tu Filistin punna a’bakka maju.
3 Kammaminjo, barisi’na tu Filistin ammentengi ri se’reang bonto na barisi’na tu Israel ri bonto maraengannaya, na ri alla’na anjo tampaka nia’ se’re lappara’.
4 Na nia’mo se’re tau pore assiba’ji iamintu niarenga Goliat, tu battu ri kota Gat, assuluki battu ri kemana tu Filistin untu’ ampa’ngarai tu Israel. Tinggina nia’ kira-kira tallu metere’,
5 siagang ammakei topi tambaga siagang baju pa’bundukang tambaga ia battala’na kira-kira limampulo antuju kilo.
6 Bangkenna nilapisiki pa’lapisi’ bangkeng tambagaya nipare’, siagang ri salangganna nia’ nasompo poke tambaga.
7 Panna’galang pokena teai sipato’ la’ba’na, siagang mata pokena nia’ kira-kira tuju kilo battala’na. Nia’ sitau tantara a’jappa ri dallekanna angngerangi pannangkisi’na.
8 Ammantammi Goliat nampa a’gora mae ri tantara Israel angkana, "Apa nupare’ antureng? Ero’ ngasengko antu a’bundu? Inakke tu Filistin, e kau ngaseng atanna Saul! Pileimi sitau battu ri kau, ia barania naung untu’ a’bundu’ siagang inakke.
9 Punna lalang ri anjo bundu’ attandinga nakunibuno, rellami ikambe a’jari atannu. Mingka punna inakke ammeta na kubunoi, ikau ngasemmi la’jari ata mae ri kambe.
10 Kamma-kamma memang anne, kupa’ngarai tantarana Israel. Pileimi sitau eroka angngewa’ attanding!"
11 Nalangngere’na Saul siagang sikamma taunna anjo pa’ngaraya, ta’bangkami ke’nanga siagang a’jari malla’ sikalimi.
12 Daud iamintu ana’na Isai tu Efrata, battu ri Betlehem ri Yehuda. Isai nia’ sagantuju ana’na bura’ne. Na ri wattu pamarentahanna Saul, toa sikalimi Isai.
13 Tallua ana’ bura’ne toana Isai a’lampami a’bundu’ ampinawangi Saul. Ia kaminang toaya niarengi Elia, makaruaya niarengi Abinadab, siagang makatallua niarengi Syama.
14 Daud ana’ bungko. Ri wattu anjo tallua daenna lalang pa’bundukang amminawang ri Saul,
15 biasai Daud a’lampa ambokoi Saul siagang ammotere’ mange ri Betlehem untu’ angkalawaki gimbala’na manggena.
16 Nia’ patampulo allo, bari’basa’ karuengi Goliat a’reppese’ mange ri barisi’na Israel untu’ ampa’ngarai ke’nanga.
17 Ri se’reang allo nakanamo Isai ri Daud, "Allei anne sampuloa kilo biralle tunu siagang sampulo batu roti, nampa nuerang mange ri sikamma daennu niaka ri kemana tantaraya.
18 Angngerang tongko sampulo batunna keju untu’ komandang pasukanga. Pakkuta’nangngangi antekamma kabara’na sikamma daennu. Siagang angngerangko butti untu’ inakke ma’nassana angkanaya sibuntulu’ jako ke’nanga na salama’ja ke’nanga.
19 Niaki ke’nanga ri Lappara’ Ela siagang Karaeng Saul, kammayatompa sikamma tu Israel a’bunduka angngewai tu Filistin."
20 Ammukona bari’basa’, ambangummi Daud nampa apparuru. Gimbala’na nasuro jagai ri se’reang pakalawaki, nampa naalle apa-apa lanaeranga na’lampa situru’ naparentakanga manggena. Battui mange ri kemana tu Israel sitabanna ero’ a’lampa tu Israel mange a’bundu’ ri tampa’ pa’bundukanga, a’gora-gora ampakalompoi sumanga’na ke’nanga.
21 Assidallekammi tantara Filistin siagang tantara Israel para sadia untu’ a’bundu.
22 Nampa napassareang naboli’ anjo apa-apa naeranga mae ri pajaga parsadiaanna tantaraya, nampa lari mange ri tampa’ pa’bundukanga untu’ angngagangi sibuntulu’ daenna ngaseng.
23 Mingka lalang a’bicarana siagang ke’nanga, majumi Goliat mae ri dallekang nampa napa’ngara tu Israel, sangkamma biasaya nagaukang. Nalangngere’ tommi anjo kana-kana pa’ngarana.
24 Nacini’na tu Israel anjo Goliat, lari memammi silalonna tu Israel napakamma malla’.
25 Massing para nakanamo ke’nanga, "Pilangngerimi kana-kana pa’ngarana! Le’ba’mi a’janji Saul karaenta angkana, inai-inai akkulle ambunoi Goliat, lanasarei hadia lompo. Lanapa’bunting tongi karaenga siagang ana’ tulolonna. Nampa kaluargana manggena anjo taua tena nalanipitabai sima."
26 Nakanamo Daud, "Barani tojengi anjo tu Filistin kapereka ampa’ngarai tantaraNa Allata’ala attallasaka!" Nampa akkuta’nang mae ri kalase’renna tantaraya angkana, "Apa lanisareangi tau akkullea ambunoi anjo tu Filistin siagang antongkokai siri’na tu Israel?"
27 Nipauammi ri ra’yaka apa le’baka napa’janjiang karaenga.
28 Eliab daenna Daud toaya nalangngereki Daud a’bicara siagang anjo taua. Sanna’mi larrona mae ri Daud na nakana, "Angngapa nubattu mae anrinni? Inaimi nusuro angngurusuki sikamma gimbalaka anjo pirang kayua ri paranga? Kuassengi, angkana ero’ nikanako barani. Battuko mae kaero’nuji bawang anciniki pa’bundukanga!"
29 Appialimi Daud angkana, "Apa kasalangku? Nakke poro akkuta’nanja’ bawang!"
30 Nampa a’lampa siagang napakkuta’nangngang pole anjo passalaka mae ri tantara maraenganga. Na kamma tonjinjo pappiali nagappaya.
31 Mingka nia’ siapa are tau allangngerekai anjo bicaranna Daud napabattui mae ri Saul. Jari nasuro kio’mi Daud untu’ andallekang.
32 Nakanamo Daud ri Saul, "Karaeng, tena niparallu malla’ ri anjo tu Filistin! Sadiai atanta untu’ angngewai."
33 Appialimi Saul angkana, "Teako! Antekamma olona ikau lattanding siagang ia? Ikau rungka dudu ijako, nampa tenapa nubiasa a’bundu’ battu ri rungkanu."
34 Mingka appialimi Daud angkana, "Karaeng, biasai atanta akkalawaki gimbala’na manggena atanta. Punna nia’ singa yareka beruang battu ambakkai gimbala’,
35 naondangi atanta anjo olo’-olo’ kammaya nampa nalappassangngi, sa’genna napasalama’mo atanta anjo gimbalaka. Siagang punna singa siagang beruang angngewai atanta, nata’gala’mi atanta kallonna, nampa natunrung atanta sa’genna mate.
36 Le’ba’mi atanta ammuno singa siagang beruang. Na anjo tu Filistin kapereka lasangkamma tommi sarenna anjo sikamma olo’-olo’ kubunoa, nasaba’ barani anghinai tantaraNa Allata’ala attallasaka.
37 Napasalama’mi Batara atanta battu ri singa siagang beruang. Iatommi lampasalamaki atanta battu ri anjo tu Filistinga." Nakanamo Saul ri ia, "Baji’mi, poro Natulung laloko Batara."
38 Nasareammi Saul pakeang pa’bundu’na, iamintu se’re baju bassi mae ri Daud nampa napake Daud. Nampa napipakei Saul topi tambaga ri ulunna Daud.
39 Kala’busanna napasikko’mi Daud pa’danna Saul ri anjo baju bassia, nampa nacoba a’jappa. Mingka tanakulleai Daud a’jappa lanri tena nabiasa Daud ammake pakeang pa’bundukang. Nakanamo ri Saul, "Takkulleai atanta a’jappa siagang anne pakeanga. Tena nabiasa atanta ampakei." Nampa napasulu’ ngaseng ammotere’ anjo pakeanga.
40 Nampa naalle takkang pakkalawakinna, nammile lima batu a’bundala’ ri binangaya, nampa napantama’ ri kocikanna. Patte’ naerang a’lampa mange angngewai Goliat.
41 Tena siapa sallona, Goliat nirurunganga ri dallekang ri paerang pannangkisi’na, appakkaramulami a’jappa mange anreppesi Daud.
42 Mingka nacini’na Daud nampa naparhatikang, ammakkala’mi Goliat ancau-caui Daud lanri rungka iji na ga’ga nacini’.
43 Nakanamo Goliat ri Daud, "Lanuapai anjo takkanga? Apa nucini’ kongkonga’ anne?" Nampa nahinamo anjo Daud lalang arenna sikamma rewatana ke’nanga.
44 Nampa pole napa’ngara Daud nakana, "Maju mako, nampa kupassareang kalennu mae ri jangang-janganga siagang olo’-oloka sollanna nakanreko."
45 Mingka appialimi Daud angkana, "Battuko mae angngewa’ siagang pa’dang siagang poke kammayatompa paccoka, mingka inakke battua’ angngewako lalang arenNa Batara Kaminang Koasaya, Allata’alana anjo tantara Israel nuhinaya.
46 Anne memang alloa naNapassareangko Batara mae ri nakke. Lakubetako, siagang lakusamballei kallonnu nampa kualle ulunnu. Kalennu siagang kalenna ngaseng tantara Filistin lakupassareangi ri jangang-janganga siagang olo’-oloka sollanna nakanrei. Nampa sikontu linoa lanaassemmi angkanaya ikambe bansa Israel nia’ Allata’alata nisomba.
47 Siagang sikontu tau niaka anrinni lanaciniki angkanaya tena Naparallu Batara ri pa’dang yareka poke untu’ ampasalamaki umma’Na. Iami ampattantui jappana anne pa’bundukanga, siagang Iami lampassareang ngasengko mae ri limanna ikambe."
48 Appakkaramulami maju Goliat anreppesi Daud, nampa akkaro-karomo Daud lari mange ri barisi’na tu Filistin untu’ andallekangi Goliat.
49 Nakocci’mi kocikanna Daud, angngalle silisere’ batu nampa napapatte’ mange ri Goliat. Anjo batua nalappassangngimi antama’ abanna Goliat, sa’genna reppe’ ka’daro ulunna, nampa tattappasa’ a’dalle’ naung rupanna ri buttaya.
50 Larimi Daud mange ri Goliat, nampa ammenteng ri ampi’na. Naallemi pa’danna Goliat nampa napasulu’ battu ri banoanna, nampa nasamballe na naalle ulunna anjo tu Filistin. Kammaminjo nanabetamo Daud anjo Goliat siagang nabunomi, naporo patte’ji siagang batuji bawang napake ambetai. Nacini’na tu Filistin angkanaya matemi tu porena ke’nanga, larimi ke’nanga.
51 (17:50)
52 A’gora lompomi tu Israel siagang tu Yehuda nampa naondang tu Filistin sa’genna mange ri Gat siagang pakke’bu’ lompona Ekron. Attambummi tu Filistin lokoka ri sikamma aganga mange ri Saaraim.
53 Le’baki anjo ammotere’mi tu Israel battu angngondangi tu Filistin nampa narampasa’ bone kemana ke’nanga.
54 Naallemi Daud ulunna Goliat, nampa naerang mange ri Yerusalem. Mingka sikamma sanjatana Goliat naboli’mi ri kema kalenna.
55 Nacini’na Saul a’lampa Daud mange angngewai Goliat, akkuta’nammi ri Abner panglima tantarana angkana, "Abner, inai ana’ anjo?" Appialimi Abner angkana, "Tanaassengai atanta karaeng."
56 Naparentakammi Saul angkana, "A’lampako nanupakkuta’nangangi."
57 Jari ammotere’na Daud mange ri kemaya, ri le’ba’namo nabuno Goliat, nierammi ri Abner mange andallekang ri Saul. Nabintingiji Daud anjo ulunna Goliat.
58 Akkuta’nammi Saul ri ia angkana, "E turungka, inaiko antu?" Appialimi Daud angkana, "Anne atanta ana’nai Isai battu ri Betlehem."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA