Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Le’baki anjo nasuromi Karaeng Salomo sikontu pamimping sukua siagang pa’rappungang bijaya battu ri bansa Israel battu mae ri ia ri Yerusalem, untu’ ampaletteki Patti ParjanjianNa Batara battu ri Sion, Kota Daud, mange ri Balla’Na Batara.
2 Jari battu ngasemmi ke’nanga ri Allo Lompo Pa’ballakang Leko’-leloka, lalang ri bulang Etanim.
3 A’rappunna ngasemmo anjo pamimpinga, naangka’mi imang-imanga anjo Patti Parjanjianga,
4 nampa naerang ke’nanga mange ri Balla’Na Batara. KemaNa Batara siagang sikontu pakkakasa’na nipalette’ tongi mange ri Balla’Na Batara, ri sikamma imanga siagang tu Lewi.
5 A’rappungammi Karaeng Salomo siagang sikontu ra’yaka ri Israel ri dallekanna Patti ParjanjianNa Batara, nampa assare ke’nanga koro’bang gimbala’ siagang sapi mae ri Batara, teai sipato’ jaina sa’genna takkullea nirekeng.
6 Le’baki anjo naerammi sikamma imanga anjo Patti Parjanjianga antama’ ri Balla’Na Batara nampa naboli’ irawanganna patung-patung malaeka’ akka’nyika lalang ri Kamara’ Kaminang Matangkasaka.
7 Takka’rangi ka’nyi’na anjo patung-patung malaeka’ akka’nyika antongkoki anjo pattia siagang kayu-kayu pa’bulekanna.
8 Anjo kayu pa’bulekanga sanna’ la’buna, sa’genna niciniki battu ri dallekanna Kamara’ Kaminang Matangkasaka sikamma cappa’na. (Sa’genna kamma-kamma anne tuli nia’na anjoreng anjo kayu-kayua.)
9 Tena sikali apa-apa bonena lalang anjo Patti Parjanjianga pantaranganna ruaya batu. Anjo batu-batua napantamaki anjoreng Musa ri Moncong Sinai, ri wattunna appare’ parjanjiang Batara siagang bansa Israel, ri wattunna lalang pa’jappang ke’nanga battu ri Mesir mange ri pa’rasangang Kanaan.
10 Ri wattunna assulu’ sikamma imanga battu ri anjo Balla’Na Batara, ti’ring rassimi saliu’ anjo ballaka.
11 Anjo saliuka accillaki napakamma kalompoang kahaderanNa Batara, sa’genna takkulleamo ammotere’ antama’ sikamma imanga untu’ anjamai jama-jamanna ke’nanga.
12 Jari appala’ doammi Salomo, angkana, "IKattemi amboliki mataalloa ri langi’, o Batara. Mingka erokangngangKi’ ammantang lalang ri sassanna saliuka.
13 Kamma-kamma anne kupambangungangKi’ balla’ gammara’, untu’ a’jari pammantanganTa satunggu-tungguna."
14 Le’baki appala’ doang, assailemi Karaeng Salomo mae ri sikontu ra’yaka, ia niaka ammenteng anjoreng, nampa napappalakkang barakka’ ke’nanga battu ri Allata’ala.
15 Nakana, "Riolo le’ba’ maKi’ a’janji Batara, mae ri manggeku Daud angkanaya, ‘Baku’ Kueranna ummakKu assulu’ battu ri Mesir, ri sikontu pa’rasangang Israel tena manna se’re kota Kupile a’jari tampa’ untu’ musti nibangungi balla’ untu’ a’jari tampa’ passambayangang mae ri Nakke. Mingka ikau Daud, Kupileko untu’ ammarenta ri ummakKu.’ Nipujimi Karaeng Allata’alana Israel, Ia le’baka anrupai anjo janjinNa!"
16 (8:15)
17 Nampa pole nakana Salomo, "Manggeku Daud le’ba’mi narancanakang untu’ ambangung balla’ tampa’ passambayangngang mae ri Karaeng Allata’alana Israel.
18 Mingka Nakana Batara ri ia, ‘Bajiki anjo pattujunnu.
19 Mingka, teai ikau, passangalinna ana’nuji lambangungi anjo ballaka untu’ iNakke!’
20 Kamma-kamma anne Narupaimi janjinNa Batara. A’jari karaemma’ ansambeangi manggeku, siagang le’ba’ tomma’ ambangung balla’ untu’ tampa’ passambayangngang mae ri Batara, Allata’alana Israel.
21 Lalang ri anjo Balla’Na Batara kupasadiami tampa’ untu’ Patti Parjanjiang niaka bonena batu parjanjianNa Batara siagang boe-boeta, ri wattu Naeranna ke’nanga assulu’ battu ri Mesir."
22 Le’baki anjo, ri dallekanna ra’ya’ niaka hadere’, ammentemmi Salomo a’dalle’ mae ri tampa’ pakkoro’bangnganga, nampa naangka’ rua-rua limanna,
23 siagang appala’ doang angkana, "O Batara, Allata’alana Israel! Ri langi’ yareka ri buttaya, tena sangkammanTa! Kirupai janjinTa siagang Kipappicinikangi pangngamaseanTa mae ri ummatTa tamamminraya siagang mannurukia situlusu’ atinna mae ri Katte.
24 Le’ba’mi Kirupai janjinTa mae ri manggeku Daud. Anjo apa Kipa’janjianga Kigaukammi anne alloa.
25 Le’ba’ tongKi’ a’janji mae ri manggeku angkanaya punna mannuruki tojeng-tojeng turunganna mae ri Katte kamma kalenna, tuli lania’ turunganna la’jari karaeng ri Israel. Kamma-kamma anne, o Karaeng Allata’alana Israel, kupalaki poro Kirupai ngaseng tommi anjo apa le’baka Kipa’janjiang mae ri manggeku Daud, anjo atanTa.
26 (8:25)
27 Mingka, o Allata’ala, maka attojeng-tojengKi’ larella ammantang ri anne buttaya? Manna sikontu langika taganna’ luara’na untu’ iKatte, la’biangampa naanne balla’ kubangunga!
28 O Batara, Allata’alaku, inakke anne atanTa’! Mingka Kipilangngeri laloi pappala’ doangku anne alloa.
29 Poro allo bangngi Kila’langngi anne ballaka, le’baka Kipile a’jari tampa’ passambayangang mae ri Katte. Poro battu ri pammantanganTa ri suruga Kipilangngeri siagang Kipammopporanga’ siagang ummatTa, punna battu ikambe ri anne ballaka untu’ appala’ doang ri Katte.
30 (8:29)
31 Punna nia’ sitau ditudu nia’ kasalanna mae ri tau maraenga, nampa nierang mae ri tampa’ pakkorobangngang niaka lalang ri anne balla’ pasambayanganga untu’ assumpa angkana tena nasala,
32 o Batara, poro Kipilangngeri ri suruga siagang Kitappuki parkarana anne ata-atanTa ngaseng. Hukkungi tau salaya situru’ panggaukanna, siagang Kilappassangi tau tenaya nasala.
33 Punna nibeta ummatTa Israel ri musu-musunna lanri dorakana ke’nanga, nampa ammotere’ ke’nanga mae ri Katte siagang napakala’birikKi’ salaku Batara, nampa battu mae anrinni ri balla’ passambayanganga, kammayatompa appala’ doang appala’ popporo’ ri Katte,
34 poro Kipilangngeri laloi ke’nanga ri suruga. Poro Kipammopporangi dosana anne ummatTa, siagang Kierangi ammotere’ mange ri pa’rasangang le’baka Kipassareang ri boe-boena ke’nanga.
35 Punna doraka ummatTa nampa Kihukkung ummatTa iamintu tena naKipaturung bosia, nampa toba’ ke’nanga battu ri dosana siagang napakala’birikKi’ salaku Batara, nampa andallekang ri Katte ri anne balla’ passambayanganga kammayatompa appala’ doang mae ri Katte,
36 poro Kipilangngeri ke’nanga battu ri suruga. Siagang pammopporangi dosana ummatTa Israel kammayatompa karaenna ke’nanga. Ajaraki ke’nanga anggaukangi apa tojenga. Le’baki anjo, o Batara, paturummi bosia ri anne pa’rasanganTa, pa’rasangang Kipassareanga mae ri ummatTa untu’ nakammai sa’genna satunggu-tungguna.
37 Punna natuju anne pa’rasanganga bala yareka garring, yareka panraki lamung-lamunga lanri anging bambanga, olo’, yareka anango, yareka punna nibundu’ ummatTa ri musua, yareka nitaba ri garring,
38 poro Kipilangngeri pappala’ doanna ke’nanga. Punna battu ri ummatTa Israel nia’ si’na appala’ doang ri Katte nanapatara limanna mae ri anne balla’ passambayanganga,
39 poro Kipilangngeri lalang ri suruga tampa’ pammantanganTa siagang Kipammopporangi na Kitulung ke’nanga. Poro iKatteji bawang angngassengi bone atinna rupataua. Lanri kammana anjo, Kigaukammi mae ri taua massing-massing situru’ panggaukang-panggaukanna,
40 sollanna mannuruki ummatTa mae ri Katte lalang ammantanna ri anne pa’rasangang Kipassareanga mae ri boe-boena ikambe.
41 Punna nia’ tu maraeng ri pa’rasangang bellaya allangngereki kalompoanTa siagang gau’-gau’ appakalannasa’, ia le’baka Kigaukang untu’ ummatTa, nampa battu mae anrinni ri balla’ passambayanganga anne untu’ ampakala’birikKi’ siagang appala’ doang ri Katte,
42 (8:41)
43 poro battu ri pammantanganTa ri suruga Kipilangngeri pappala’ doanna siagang Kiturukiangi pappala’na. Lanri kammana anjo nasikontu bansaya ri lino angngassengKi’ siagang mannuruki ri Katte sangkamma ummatTa Israel. Lanaassengi ke’nanga angkanaya anne balla’ kubangunga iami tampa’ untu’ assambayang mae ri Katte.
44 Punna Kiparentakangi ummatTa untu’ a’lampa mange a’bundu’ angngewai musua, nampa manna pole kemae ke’nanga, nandallekang mae ri kota nipilea anne siagang appala’ doang a’dalle’ mae anrinni ri anne balla’ le’baka kubangung untu’ iKatte,
45 poro battu ri suruga Kipilangngeri pappala’ doanna ke’nanga anjo, siagang Kisarei ke’nanga pammetang.
46 Punna doraka ummatTa mae ri Katte — sikontutojenna tena manna sitau tadoraka — nampa Kibalang parekang ke’nanga nibeta ri musua lanri larroTa, siagang nierang a’jari tunitahang mange ri se’reang pa’rasangang bellaya yareka ambania,
47 poro Kipilangngeri pappala’ doanna ke’nanga. Punna anjoreng ri pa’rasanganga nabokoi dosa-dosana ke’nanga, nappala’ doang mae ri Katte namangaku angkana dorakami siagang a’gau’ ja’dala’mi ke’nanga, Kipilangngerimi pappala’ doanna ke’nanga, o Batara.
48 Punna anjoreng ri pa’rasanganga attojeng-tojeng situlusu’ pa’mai’na ke’nanga ambokoi dosa-dosana, nampa appala’ doang mae ri Katte a’dalle’ mae anrinni ri anne pa’rasangang Kipassareanga mae ri boe-boena ikambe, a’dalle’ mae anrinni ri kota nipileTa siagang anne balla’ passambayangang le’baka kubangung untu’ iKatte,
49 poro battu ri pammantanganTa ri suruga Kipilangngeri pappala’ doanna ke’nanga siagang Kikamaseangi ke’nanga.
50 Kipammopporangi sikontu dosana siagang kadorakanna ke’nanga mae ri Katte, siagang Kipa’jari anjo musu-musunna ke’nanga a’gau’ baji’ mae ri ke’nanga.
51 Iami ke’nanga umma’ kalenTa, ia Kieranga assulu’ battu ri Mesir, pa’rasangang le’baka napammantangi ke’nanga nisessa.
52 Tapporo iKatte o Karaeng Allata’ala, tuli Kiparhatikangi ummatTa Israel siagang karaenna. Siagang poro Kipilangngeri pappala’ doanna ke’nanga kere-kere wattu nakkio’ appala’ tulung mae ri Katte.
53 IKatte o Karaeng Allata’ala, le’ba’mi Kipile ke’nanga battu ri alla’na bansaya untu’ a’jari umma’ kalenTa, sangkamma le’baka Kipau mae ri ke’nanga tete ri Musa atanTa, ri wattu Kirurunganna boe-boena ikambe assulu’ battu ri Mesir."
54 Kammaminjo Salomo appala’ doang nakkulantu’ ri dallekanna tampa’ pakkoro’bangnganga siagang napatara limanna nai’. Le’baki anjo ammentemmi,
55 siagang akkio’ lompomi nappappalakkang barakka’Na Allata’ala untu’ sikontu tau a’rappunganga anjoreng, nakana,
56 "Nipujimi Batara ia assareai kaamangngang umma’Na sangkamma le’baka Napa’janjiang tete ri Musa atanNa. Sikontu apa-apa baji’ le’baka Napa’janjiang le’ba’mi Narupai.
57 Poro Narurungangki’ Karaeng Allata’alata, sangkamma NarurunganNa boe-boeta. Poro tena lalo naNabokoiki’.
58 Poro Napa’jariki’ tau tamamminra ri Ia sollanta tuli attallasa’ situru’ ero’Na siagang mannuruki ri sikontu hukkunNa siagang parentaNa ia le’baka Napassareang mae ri boe-boeta.
59 Poro Batara, Allata’alata, tuli Nau’rangi pappala’ doanta le’baka nipabattu mae ri Ia. Poro tuli Napappicinikangi kalammoranNa mae ri umma’ Israel siagang karaenna, na Nasare ke’nanga apa naparalluanga ke’nanga allo-allo.
60 Lanri kammana, sikontu bansaya ri lino lanaassemmi angkanaya Iaji bawang Batara, Allata’ala, tena maraenganna.
61 Paralluko ikau, umma’Na, tuli tamamminraya mae ri Batara, Allata’alata siagang mannuruki ri hukkung-hukkunNa siagang parenta-parentaNa, sangkamma nugaukanga ngaseng anne alloa."
62 Le’baki anjo, Karaeng Salomo siagang sikontu tau niaka a’rappungang anjoreng, assaremi koro’bang mae ri Batara.
63 Untu’ koro’bang pappasiamakkang assaremi Salomo 22.000 sapi siagang 120.000 gimbala’. Kammaminjo karaenga siagang sikontu ra’yaka appare’mi pa’gaukang untu’ angresmikangi Balla’Na Batara.
64 Ia memang anjo alloa naresmikang tommi Salomo bageang ri tangngana paranglakkeng niaka ri dallekanna anjo Balla’Na Batara. Nampa ri anjo paranglakkenga assaremi koro’bang nitunu, koro’bang gandung, siagang jannana olo’-oloka untu’ koro’bang pappasiamakkang. Yangasenna anjo napassareangi anjoreng lanri ca’di dudui tampa’ pakkoro’bangngang tambagaya untu’ yangasenna anjo passarea.
65 Ri Balla’Na Batara anjo, Salomo siagang sikontu umma’ Israel appare’mi passua’-suarrang untu’ ampakalompoi Allo Lompona Pa’ballakang Leko’-lekoka, lalang tuju allo sallona. Teai sipato’ jaina anjo tau a’rappunganga anjoreng. Battui ke’nanga ri daera agang mangea ri Hamat bellana ri bageang wara’, sa’genna mange ri pa’baeng-baenna Mesir bageang timboro’.
66 Ri allo makasagantujuna, nasuromi Salomo taua ammotere’. Yangasenna ke’nanga mammujimi ri ia, nampa ammotere’ mange ri balla’na ke’nanga siagang rannu pa’mai’, lanri yangasenna anjo barakka’ Napassareanga Batara mae ri atanNa Daud siagang mae ri umma’Na bansa Israel.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA