Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ambangung tommi Salomo balla’ kakaraengang untu’ kalenna. Anjo balla’ kakaraenganga sampulo antallu taung wattu nipake untu’ ambangungi.
2 Ri anjo balla’ kakaraenganna Salomo, appare’ tommi kamara’ niarenga "Kamara’ Romang Libanon". Ukkuranna iamintu: la’buna 44 metere’, sangkara’na 22 metere’, siagang tinggina 13,5 metere’. Anjo kamaraka ammakei tallung barrisi’ benteng battu ri kayu camara Libanon; massing-massing barrisi’na nia’ sampulo allima benteng siagang irateanna nibonei pannahang-pannahang battu ri kayu camara Libanon. Palaponna iamintu battu ri kayu camara Libanon tonji siagang natongkoki anjo kayu-kayu pannahanga.
3 (7:2)
4 Ri rinring kairina siagang ri kananna anjo kamaraka nia’ jandela-jandela: tallung jijiri’ ri rinring se’reanga assidallekang siagang tallung jijiri’ ri rinring maraenganga. Lesna sikamma pakke’buka siagang jandelaya modele’na appa’ pasagi la’buna.
5 (7:4)
6 Ambangung tommi Salomo "Kamara’ Pilara’". La’buna anjo kamaraka 22 metere’ siagang sangkara’na 13,5 metere’. Ri dallekanna anjo kamara’ lompoa, nia’ baruga ammake pilara’ siagang tuka’.
7 Kamara’ lompo maraeng iamintu "Kamara’ Empoang Karaeng" yareka niarenga todong Kamara’ Pangadelang. Batu ri dapara’na anne kamara’ lompoa sa’genna ri kayu-kayu pannahanna nilapisi siagang kayu camara Libanon. Anrinnimi ri kamara’ lompoa Salomo antappuki parkara-parkara pangadelanga.
8 Ia pammantanganna Salomo nipare’ kamma tongi bangunang maraeng siagang niaki ri paranglakkeng ri bokona Kamara’ Lompo Pangadelanga. Untu’ bainenna, iamintu ana’ bainena karaeng Mesir ambangung tommi balla’ kammaya anjo tanja’na.
9 Yangasenna tembo’na sangnging batu ka’jala’ ballinna nipare’, situruka ukkuranna siagang batu le’baka nipa’a’ battu lalang siagang battu pantara’, battu ri pundasina sa’genna nai’, kammayatompa battu ri tembo’ bageang pantara’ sa’genna tembo’ paranglakkeng lompoa.
10 Yangasenna anjo bangunanga, kammayami paranglakkeng lompoa, battu ri pundasina sa’genna pattongko’na, sangnging batu-batu lompoa siagang tinggia anggaranna nipare’. Anjo batu-batua nia’ 3,5 metere’ la’buna, nia’ todong 4 metere’.
11 Irateanganna nipasangngi batu-batu maraeng ia tinggia anggaranna siagang nipolonga situru’ ukkuranna, nampa nitongko’ siagang kayu camara Libanon.
12 Tembo’ parang lakkenna balla’ kakaraenganga siagang tembo’ parang lakkenna Balla’Na Batara kammayatompa kamara’ lompo ri bageang dallekanna Balla’Na Batara, massing-massingi battu ri silapisi’ kayu camara Libanon siagang irateang tallung lapisi’ batu.
13 Ri kota Tirus nia’ sitau bura’ne niareng Huram. Ia sanna’ sikali cara’de’na siagang jai pangalamanna lalang appareka a’rupa-rupa barang tambaga. Tumate manggena iami tu Tirus na cara’de’ appare’ barang-barang tambaga. Amma’na tubattu ri suku Naftali. Le’ba’mi nasuro Salomo a’lampa taua mange ambuntuli Huram untu’ battu nanakapalai anjo sikontu jama-jamang appareka barang tambaga. Jari battumi Huram na najamamo apa nasuro jamaya Salomo.
14 (7:13)
15 Appare’mi Huram rua benteng tambaga massing-massing 8 metere’ tinggina, akkalu’na 5,3 metere’, siagang kapala’na tambagaya 7,4 sentimetere’. Anjo bentenga kosongi lalanganna.
16 Untu’ anjo bentenga appare’mi rua ulu benteng battu ri tambaga, massing-massing tinggina 2,2 metere’,
17 modele’na sangkammai bunga bakung, tinggina 1,8 metere’. Massing-massing anjo ulu bentenga nibelo-beloi siagang ruang jijiri’ rappo delima battu ri tambaga. Yangasenna nia’ 200 batunna rappo delima massing-massing ulu benteng. Nampa appare’ Huram rua rante tambaga nianyang, nampa naboli’ irateanna anjo massing-massing bentenga. Nia’ tuju rante tambaga nianyang irate ri massing-massing benteng, siagang irateanna anjo rante nianyanga nia’ todong pa’lapa’ a’bundala’. Irateanna minne pa’lapa’ a’bundalaka,
18 (7:17)
19 (7:17)
20 (7:17)
21 nipasang anjo sikamma ulu benteng sangkammaya bunga bakung mae ri sikammaya anjo bentenga. Sikamma anjo bentenga anjorengi ri dallekanna pakke’bu’ antamaya ri Balla’Na Batara nitannang — se’re bageang timborang, se’re bageang warakkang. Ia bageang timboranga niarengi Yakhin, na ia bageang warakkanga niarengi Boas. Kammaminjo napa’le’ba’ napare’ Huram sikamma anjo bentenga.
22 (7:21)
23 Nampa appare’ Huram se’re bongki tambaga a’bundala’, ia ukkuranna iamintu: lantanna 2,2 metere’, la’buna garisi’ tangngana 4,4 metere’, siagang kalu’na 13,2 metere’.
24 Akkuliling biring pantaranna nibelo-beloi ruang jijiri’ rappo boyo’, ia nicoroka siagang anjo bongkia.
25 Anjo bongkia nipadongkoki irate ri dongko’na sampuloa anrua sapi tambaga a’dalle’ wara’ tallu, a’dalle’ timboro’ tallu, a’dalle kalau’ tallu, na’dalle’ anrai’ tallu.
26 Kapala’na anjo bongkia iamintu 75 milimetere’. Birinna sangkammai biring cangkiri’ appakko’ assulu’ sangkamma bunga bakung ta’bakkaraka. Anjo bongkia akkullei angngalle kira-kira 40.000 litere’.
27 Appare’ tommi Huram sampulo kareta tambaga, massing-massing la’buna 1,8 metere’, sangkara’na 1,8 metere’, tinggina 1,3 metere’.
28 Anjo karetaya battu ri papang-papang appaka pasagi, na nipasang lalang les.
29 Anjo papang-papanga nibelo-beloi siagang ukirang singa, sapi, siagang malaeka’ akka’nyi’. Ri anjo les-lesna — irateanganna siagang irawanganna gambara’ singaya siagang sapia — nia’ ta’gentung ukirang bunga-bunga.
30 Massing-massing anjo karetaya ammakei appa’ roda tambaga nampa papputarranna tambaga todong. Ri appa’ panyingkulu’na anjo karetaya nia’ benteng pannahang katoang tambaga nibelo-beloia siagang ukirang bunga-bunga pantaranganna.
31 Bageang rateanna anjo appaka benteng pannahang, nipasisambungi siagang se’re les a’bundala’ untu’ antahangi katoanna. Anjo benteng-benteng pannahanga assuluki ra’ga 44 sentimetere’ irateanna anjo papang pasagia, siagang 22 sentimetere’ irawanganna. Ri bawana anjo leska nia’ ukirang.
32 Tinggina roda-rodana 66 sentimetere’; rawangannai papang-papanga ammantang. Tangnga-tangngana papputarang rodaya a’jari se’reji bageang.
33 Anjo roda-rodana santanjaki siagang roda kareta pa’bundukang; kalu’na rodaya, taralina, tangnga-tangngana papputarranna rodaya siagang tarali-taralina rodaya, yangasenna sangnging tambaga nipare’.
34 Nia’ appa’ benteng pannahang ri massing-massing panyingkulu’ bageang rawana anjo karetaya. Anjo benteng-bentenga anjari se’rei siagang karetana.
35 Ri tammulilina bageang ratena anjo karetaya, nia’ les kira-kira 22 sentimetere’ la’ba’na. Benteng pannahanna siagang papang-papanna, yangasenna anjari se’rei siagang karetana.
36 Benteng-benteng pannahanga siagang anjo papang-papanga nibelo-beloi siagang gambara’ malaeka’ akka’nyi’, singa, siagang poko’ palem ri kere-kereanga nia’ tampa’ kosong untu’ anjo gambaraka, kammayatompa bunga-bunga ri tammulilina.
37 Kammaminjo carana nipare’ anjo kareta-karetaya. Yangasenna sangkamma-kammai modele’na siagang ukkuranna.
38 Appare’ tongi Huram sampulo katoang lompo, tasse’rei untu’ massing-massing kareta. Massing-massing katoanga anjo 1,8 metere’ garisi’ tangngana, siagang akkullei angngalle 800 litere’ je’ne’.
39 Naboliki Huram lima kareta ri timboranna Balla’Na Batara, siagang lima ri bageang warakkanna. Bongki tambagaya naboliki rayangngang timborang, ri panyingkuluka.
40 Appare’ tongi Huram pamaja’-pamaja’, sikopang-sikopang, siagang mangko’-mangko’. Le’baki anjo, le’ba’ ngasemmi anjo apa nasuro jamaya Karaeng Salomo untu’ Balla’Na Batara. Iaminne sikamma pakkakasa’ le’baka napare’: Rua benteng lompo, Rua ulu benteng sangkammaya mangko’ niaka rateanna anjo ruaya benteng, Rante nianyang ri massing-massing ulu bentenga, Patambilangngang delima tambaga ia nisusunga lalang ruang barrisi’ ri tammulilina anjo rante nianyang ri massing ulu bentenga, Sampulo kareta, Sampulo katoang lompo, Bongki tambaga, Sampulo anrua sapi tambaga ansompoai anjo bongkia, Pamaja’-pamaja’, sikopang-sikopang, siagang mangko’-mangko’. Yangasenna anjo pakkakasa’ untu’ Balla’Na Batara, napareka Huram untu’ Karaeng Salomo, tambaga ngaseng nipare’, na nikeso’ sa’genna accilla’.
41 (7:40)
42 (7:40)
43 (7:40)
44 (7:40)
45 (7:40)
46 Yangasenna anjo barang-baranga nasuro pareki karaenga anjoreng ri tampa’ papparekanna ri Lappara’ Yordan, niaka ri alla’na Sukot siagang Sartan.
47 Tena nasuro timbangi Salomo anjo tambagaya, lanri jai duduna. Jari, taniassengai angkana siapa battala’na anjo barang-baranga.
48 Assuro pare’ tommi Salomo pakkakasa’-pakkakasa’ maraengang battu ri bulaeng untu’ Balla’Na Batara. Iaminne anjo pakkakasa’-pakkakasa’ nasuro pareka: Tampa’ pakkoro’bangngang, Mejang untu’ roti nipassareanga ri Allata’ala, Sampulo bangkeng kanjoli nibolika ri dallekanna Kamara’ Kaminang Matangkasaka, iamintu lima ri bageang timborang siagang lima ri bageang warakkang, Bunga-bunga, Kanjoli-kanjoli, Passipi’-passipi’, Cangkiri’-cangkiri’, Pakkakasa’ untu’ ammuno kanjoli, Mangko’-mangko’, Piring-piring untu’ dupa, Piring-piring untu’ bara pepe’ Engsele’-engsele’ untu’ pakke’bu’na Kamara’ Kaminang Matangkasaka siagang pakke’bu’-pakke’bu’ pantaranna Balla’Na Batara.
49 (7:48)
50 (7:48)
51 Le’ba’namo Salomo ambangungi Balla’Na Batara, naboli’mi lalang ri gudang-gudanna anjo ballaka iamintu sikontu peraka, bulaenga, siagang barang-barang maraeng ia le’baka napassareang Daud, manggena, ri Batara.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA