Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Salomo erbahan hubungen ras raja Mesir alu ngempoi anakna. Ibabana anak raja Mesir ndai ringan i Kota Daud seh nggo dung ipajekkenna istanana, Rumah Pertoton, ras tembok i sekelewet Jerusalem.
2 Rumah Pertoton man TUHAN langa denga ipajekken, janah erkite-kiteken si e bangsa Israel tetap denga erbahan persembahenna i bas erbage batar-batar si pedauh-dauh.
3 Salomo erkeleng ate man TUHAN janah iikutkenna kerina pedah bapana Daud, tapi igelehna ka pe asuh-asuhen jenari ibahanna e jadi persembahen i datas erbage batar-batar si pedauh-dauh.
4 Sekali jadi lawes raja ku Gibeon nehken persembahen sabap i je me batar-batar si terberitana kal. I bas paksa-paksa si nggo lepas isehkenna i je piga-piga ratus persembahen tutungen.
5 I bas berngi e teridah TUHAN man bana i bas nipi, janah IsungkunNa raja, "Kai atendu Kubereken man bandu?"
6 Ngaloi Salomo, "Nggo rusur IcidahkenNdu KekelengenNdu si mbelin man bapangku Daud, suruh-SuruhenNdu, janah mehuli ia, patuh, ras bujur man bandu, janah terus nge IcidahkenNdu man bana KekelengenNdu si mbelin dingen tetap, alu mereken sekalak anak dilaki man bana si sendah nggo jadi raja nggantiken ia.
7 O TUHAN Dibata, nggo IbereNdu aku nggantiken bapangku jadi raja, aminna gia aku nguda denga kal janah la kueteh uga ndalanken dahin raja.
8 Enda aku ringan i tengah-tengah bangsa si nggo IpilihNdu jadi SikerajangenNdu, bangsa si teremna la terkira.
9 Emaka berekenlah man bangku kepentaren ngerajai BangsaNdu alu kebujuren ras kebeluhen mbedaken si bujur ras si jahat. Adi la bage, i ja nge aku ngasup ngaturken BangsaNdu si mbelin enda?"
10 Meriah kal ukur TUHAN erkiteken ipindo Salomo si enda.
11 Emaka nina TUHAN, "Erkite-kiteken ipindondu kepentaren ngerajai bangsa enda alu bujur, labo ipindondu umur gedang ntah kebayaken ntah pe kematen musuh-musuhndu,
12 tentu Kubereken kai si ipindondu. Kubereken kepentaren ras pengertin man bandu lebih asa si lit i bas kalak si nggo leben ntah si pudin asa kam.
13 Kubereken pe man bandu kai si langa ipindondu: gedang-gedang geluhndu bayak dingen ermulia kam, lebih asa kebayaken ras kemulian raja-raja si deban.
14 Janah adi ikutkenndu katangKu, ipakendu Undang-undangKu ras pedahKu, bagi si ibahan bapandu Daud, Kubahan maka gedang umurndu."
15 Kenca bage medak Salomo, ietehna maka Dibata nggo ngerana man bana i bas nipina. Jenari lawes ia ku Jerusalem, tedis ia i lebe-lebe Peti Perpadanen TUHAN janah ibahanna persembahen tutungen ras persembahen pengalemi dosa. Kenca si e ibahanna pesta man-man guna kerina pegawaina.
16 I bas sada wari reh me dua kalak diberu si pendahinna erlua-lua ngadap ku lebe-lebe Raja Salomo.
17 Sekalak i bas ia nari ngataken, "O Raja, aku ras diberu enda ringan i bas sada rumah, janah kupupus sekalak anak dilaki i rumah asum ia i je.
18 Dua wari kenca anakku tubuh ia pe mupus sekalak anak dilaki. Kami ngenca duana i bas rumah ndai, la lit ise pe si deban.
19 Kenca bage, i bas sada berngi tertindihisa anakna ndai seh mate.
20 Keke ia ibuatna anakku sanga aku tunduh denga, jenari ibabana ku inganna medem. Kenca bage itamakenna anak si nggo mate ndai i bas inganku medem.
21 Pepagina kenca aku keke janah asum kubere minem ateku anakku, kuidah nggo mate ia. Kupepayo kal anak e jenari kuidah maka ia labo anakku."
22 Tapi nina diberu si sada nari, "La tuhu! Anak si nggeluh e aku empuna, si mate ndai nge anakndu!" Ngaloi diberu si pemena ndai, "Lang! Anak si mate ndai nge sikerajangenndu, janah si nggeluh e anakku!" Bage me si jabap-jabapen ia i lebe-lebe raja.
23 Kenca bage nina Raja Salomo, "Sekalak-sekalak kam ngataken maka anak si nggeluh e sikerajangenndu, janah anak si mate e sikerajangen si sekalak nari."
24 Isuruh raja ngelegi pedang, janah kenca nggo ibaba,
25 nina, "Belah duaken anak si nggeluh e jenari bereken man diberu e tersembelah."
26 Emaka nande anak si nggeluh ndai, tuhu-tuhu pusuhna dem kekelengen nandangi anakna, ikatakenna man raja nina, "Mekuah min atendu Raja, ula bunuh anak e! Berekenlah man bana!" Tapi nina diberu si sada nari ndai, "Sada pe kami la pedah daten, terusken belah-duakenlah."
27 Kenca bage nina Raja Salomo, "Ula bunuh anak e! Bereken man diberu si pemena, ia kap nandena si tuhu-tuhu."
28 Kenca ibegi bangsa Israel kerna keputusen si ibahan Raja Salomo, kerina ia erkemalangen man bana, sabap mulai i jenari nggo iteh bangsa emaka Dibata nggo mereken kepentaren man Raja Salomo mutusken perkara-perkara alu bujur.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA