Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ituriken Raja Ahap man ndeharana Isebel kerina si nggo ilakoken Elia, ras kuga ia nggo munuh kerina nabi-nabi Baal.

² Itenahken Isebel berita man Elia nina, "I bas paksa si genduari e ka pagi, adi la kam mate kubunuh bagi pemunuhndu nabi-nabi e, ibunuh dibata gia aku."

³ Mbiar Elia, emaka lompat ia ras suruh-suruhenna lako ngkelini kesahna. Kenca seh i Berseba i daerah Juda, itadingkenna suruh-suruhenna i je,

⁴ janah Elia lawes sisada ku taneh si melenget sada wari perdalanen dauhna. Dungna seh ia ku sada batang kayu, emaka kundul ia cicio i je. Madin iakapna ia mate i je emaka ertoto ia, "Nggo me TUHAN, buatlah kesahku; madin me aku mate!"

⁵ Medem ia i teruh batang kayu e, dungna tertunduh. Rempet lit sekalak malekat ngkuit Elia nina, "Kekeken Elia, manken!"

⁶ Ipernehenna ku sekelewetna, idahna sengkibul roti ras sada guci lau deherken takalna. Man ras minem ia, jenari ipedemkenna ka mulihken.

⁷ Reh ka mulihken malekat TUHAN ndai, iingetina Elia pedua kaliken nina, "Kekeken Elia, manken! Adi lang, la kari kam ngasup erdalan ndauh."

⁸ Keke Elia, emaka man ras minem ia. Pangan e mereken gegeh cukup man bana lako erdalan empat puluh wari empat puluh berngi ku Deleng Sinai, deleng si badia e.

⁹ I das deleng e ibengketina sada gua, janah i je me ia erberngi. Rempet reh kata TUHAN man bana nina, "Erkai kam i jenda, Elia?"

¹⁰ Ngaloi Elia, "TUHAN Dibata si Mada Kuasa, man BaNdu, man BaNdu saja ngenca aku tetap ersembah. Tapi bangsa Israel nggo ngelanggar perpadanenna ras Kam; iruntuhkenna batar-BatarNdu. Aku nari ngenca tading, janah aku pe ibunuhna atena."

¹¹ "Ndaratken, tedislah kam i lebe-lebengKu i das tampuk deleng enda," nina TUHAN man bana. Kenca bage mentas TUHAN, IbahanNa rembus angin kaba-kaba seh maka erbelah ibahanna uruk-uruk, janah batu iripukkenna. Tapi TUHAN la lit i bas angin e. Ngadi angin ndai rembus, jenari jadi me linur.

¹² Kenca ngadi linur ndai gurlah api, tapi TUHAN la lit i bas api e. Kenca nimpet api lit sora medate bagi sora erkusik.

¹³ Kenca ibegi Elia sora e, itutupina ayona alu jubahna jenari ndarat ia, janah tedis i bas babah gua e. I je terbegi sora ngerana man bana nina, "Erkai kam i jenda, Elia?"

¹⁴ Ngaloi Elia, "TUHAN Dibata si Mada Kuasa, man BaNdu, man BaNdu saja ngenca aku ersembah. Tapi bangsa Israel nggo ngelanggar perpadanenna ras Kam; iruntuhkenna batar-BatarNdu, janah ibunuhna kerina nabi-NabiNdu. Aku nari ngenca tading, janah aku pe ibunuhna atena."

¹⁵ Nina TUHAN, "Mulihkenlah kam ku taneh si mesawang deherken Damaskus. Kenca kam seh i jah minaki Hasael jadi raja Siria,

¹⁶ Jehu anak Nimsi jadi raja Israel, janah Elisa anak Sapat -- anak kuta Abil Mehola nggantiken kam jadi nabi.

¹⁷ Ise si pulah i bas pedang Hasael nari, Jehu pagi munuhsa, janah ise si pulah i bas pedang Jehu nari Elisa pagi munuhsa.

¹⁸ Tapi Kuserapken pagi pitu ribu kalak Israel si la ibunuh, eme kerina kalak si lenga nembah erjimpuh man Baal ntah pe man gana-ganana."

¹⁹ Emaka berkat me Elia, idapetina Elisa sangana nenggala. Lit sepulu dua pasang lembu sangana nenggala i je, janah Elisa i bas pasangen si arah pudina. Asum Elia mentasi Elisa, icabinken Elia jubahna man Elisa.

²⁰ Emaka itadingken Elisa lembuna, kiam ia ngayaki Elia nina, "Mulih aku lebe ngataken mejuah-juah man bapangku ras nandengku, jenari banci kuikutken kam." Ngaloi Elia, "To mulihken! Kuambati kin kam?"

²¹ Mulihken Elisa, ibuatna lembu penenggalana ndai duana, igelehna. Alu make tenggalana e jadi rantingna, itanggerkenna daging lembu e, jenari iberekenna ipan kalak ndai kerina. Kenca bage berkat ia ngikutken Elia jadi suruh-suruhenna.

1 Raja-raja

Video 1 Raja-raja 19

Ikuti Kami:

KONTAK | PARTISIPASI | DONASI