Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Anjo wattua nia’ sitau na’bi ri Yehuda. Nisuroi ri Batara a’lampa mange ri Betel. Battui anjo na’bia mange anjoreng sitabanna ammenteng Yerobeam ri dallekanna tampa’ pakkoro’bangnganga untu’ assare koro’bang.
2 Lanri parentaNa Batara, akkio’mi anjo na’bia mae ri anjo tampa’ pakkoro’bangnganga angkana, "He tampa’ pakkoro’bangngang, he tampa’ pakkoro’bangngang! Kammai anne kananNa Batara, ‘Nia’ sitau ana’ laniareng Yosia lanilassukang lalang ri kaluargana Daud. Irateannu, he kau tampa’ pakkoro’bangnganga, lanabuno sikontu imang-imang niaka tugasa’ ri tampa’-tampa’ passambayangang mae ri rewataya, siagang pole tau le’baka assare koro’bang irateannu. Na irateannu tommi lanitunu buku-bukunna rupataua.’"
3 Nakanamo pole anjo na’bia, "Anne tampa’ pakkoro’bangnganga larumbangi, siagang au niaka rateanna latattumpai. Iaminjo buttina angkanaya ma’nassa Nasuroa’ Batara."
4 Nalangngere’na Yerobeam anjo kana-kana kammaya, najo’jo’mi anjo na’bia nampa ammarrang angkana, "Jakkalaki anjo taua!" Mingka a’jari matemi silalonna limanna Yerobeam, sa’genna takkullea nabeso’ ammotere’.
5 Ti’ring rumbammi silalonna anjo tampa’ pakkoro’bangnganga siagang tattumpami auna naung ri buttaya, sangkamma le’baka napau anjo na’bia lanri parentaNa Batara.
6 Nampa nakanamo Karaeng Yerobeam ri anjo na’bia, "Tulunga’ nuppala’ doang mae ri Karaeng Allata’alanu untu’ inakke. Palaki pangngamaseanNa sollanna Napakabaji’ limangku!" Appala’ doammi anjo na’bia ri Batara, nampa baji’mo limanna karaenga.
7 Nampa nakanamo karaenga ri na’bia, "Umba nakimange angnganre ri ballakku. Erokka’ assareki’ hadia."
8 Appialimi anjo na’bia angkana, "Manna pole nasarea’ karaenga tawaruanna kakalumanynyangnganna karaenga, tena nakulamminawang untu’ mange angnganre yareka angnginung siagang karaenga.
9 Anggappa’ parenta battu ri Batara sollanna tena kungnganre yareka angnginung, siagang tena kulammotere’ angngolo ri oloang kuoloa ri wattungku battu mae."
10 Kammaminjo na’lampamo anjo na’bia angngolo ri oloang maraeng.
11 Anjo wattua nia’ sitau na’bi toa ammantang ri Betel. Nipauangi ri ana’-ana’na passala’na anjo na’bi battua ri Yehuda. Nacaritai ke’nanga apa nagaukanga ri Betel anjo alloa, siagang apa napaua mae ri Yerobeam.
12 Akkuta’nammi anjo na’bi toaya angkana, "Kemae angngolo anjo na’bi battua ri Yehuda wattunna ammotere’?" Jari nijo’jokammi ri ke’nanga anjo oloanga ri ia.
13 Nampa nasuro ke’nanga ampatabai pa’lapa’ keledaina. Le’baki anjo nai’mi ri keledaina nampa a’lampa
14 angngondangi anjo na’bi battua ri Yehuda. Nagappami anjo na’bia sitabang ammempo rawanganna se’rea poko’ kayu lompo. Akkuta’nammi anjo na’bi toaya angkana, "Apa ikatte anjo na’bi battua ri Yehuda?" Appialimi anjo taua angkana, "Kammatojengi."
15 Nakanamo anjo na’bi toaya, "Umba kimange angnganre ri ballakku."
16 Mingka appialimi anjo na’bi battua ri Yehuda angkana, "Pammopporanga’! Tena nakukkulle antarimai undanganta untu’ amminawang mange ri ballatta Bapa’. Tena todong kulangnganre yareka angnginung anrinni siagang ikatte.
17 Le’baka’ Naparentakang Batara sollanna tena kungnganre yareka angnginung siagang tena kummotere’ ri oloang sangkammaya oloang kuoloa ri wattungku battu."
18 Jari a’balle-ballemi anjo na’bi toa battua ri Betel angkana ri ia, "Inakke na’bi tonja’ sangkamma ikatte. Lanri parentaNa todong Batara na Nasuro malaeka’Na ampauanga’ sollanna kubuntuliki’ siagang kutoanaki’ ri ballakku."
19 Jari amminawammi anjo na’bi battua ri Yehuda mae ri balla’na anjo na’bi toaya nampa angnganre siagang ia.
20 Lalang ammempona ke’nanga angnganre, a’bicarami Batara ri anjo na’bi toaya,
21 sa’genna napakainga’mo anjo na’bi battua ri Yehuda angkana, "Nakana Batara angkanaya tena numannuruki ri Ia. Tena nanugaukangi apa Naparentakanga mae ri kau.
22 Ammotere’ mako siagang angnganre angnginung, na nule’ba’mo nipisangkai untu’ anggaukangi anjo kammaya. Lanri kammana lanibunoko, nampa talanitarawanga maya’nu ri jera’na kaluarganu."
23 Le’baki ke’nanga angnganre, napatabammi anjo na’bi toaya pa’lapa’ keledaina anjo na’bi battua ri Yehuda,
24 nampa a’lampamo anjo na’bi battua ri Yehuda. Ri tangngana aganga nibakkaimi ri sikayu singa, namatemo nikokko’. Ammonrammi maya’na ri aganga, siagang ammenteng keledaina ri ampi’na. Nampa ammenteng tommo anjo singaya anjoreng.
25 Sikamma tau ammaloa nacini’mi anjo mayaka siagang anjo singaya anjoreng. Nampa a’lampamo ke’nanga ri Betel siagang nacarita ke’nanga anjo apa nacinika ke’nanga.
26 Ri wattu nalangngere’na anjo na’bi toaya anjo kabaraka, nakanamo, "Mattantu ia anjo na’bi tenaya namannuruki ri parentaNa Batara! Iaminjo saba’na naNakiring Batara anjo singaya untu’ angkokkoki siagang ambunoi sangkamma anjo Napaua Karaeng Allata’ala la’bi riolo."
27 Nampa nakanamo anjo na’bi toaya ri ana’-ana’na, "Patabanga’ pa’lapa’na keledaiku." Le’baki anjo nai’mi ri keledaina,
28 nampa a’lampa. Nagappami anjo maya’na na’bi battua ri Yehuda nia’ ija ri aganga kammayatompa keledaina siagang singaya ri ampi’na. Anjo keledaia tena nanikokkoki ri anjo singaya, siagang tena todong nanakanre anjo mayaka.
29 Naangka’mi anjo mayaka nampa napadongko’ ri keledaina, nampa naerang ammotere’ mange ri Betel untu’ nikarruki na nitarawang.
30 Kalenna anjo na’bi toaya antarawangi anjo mayaka ri jera’na kaluargana, nampa ia siagang ana’-ana’na angkarruki anjo mayaka. Nakana ke’nanga, "Kamaseannu sari’battang, kamaseannu!"
31 Nampa nakana anjo na’bi toaya ri ana’-ana’na, "Punna matea’, tarawanga’ anrinni, ri sa’rinna anne na’bia.
32 Anjo apa le’baka napau lanri parentaNa Batara ri anjo tampa’ pakkoro’bangnganga ri Betel siagang ri sikontu tampa’ passambayanganga ri kota-kota Samaria, mattantu lakajariangi."
33 Karaeng Yerobeam tuli tena naero’ ambokoi panggaukang ja’dala’na. Untu’ angngurusuki anjo tampa’-tampa’ sambayang le’baka napaenteng, tulusu’ imang-imang battu ri kaluarga biasaya napile. Inai-nai ero’, iami naangka’ a’jari imang.
34 Passabakkang iaminjo panggaukang ja’dala’na nacilakamo siagang ancuru’ taba sikali turunganna.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA