¹ We walya zi wal omka emki blikip gwesibirida gwen– men kirekam hen babu gwen zini zere mae mo zi bina blikip neisibirida gwenanke. Sap zi uk de Alap mo ol san ang gwe srem gwenna, eno gwen dawemsa de kara gul gwen enkam zen maka haleꞌara. Em sap esa titi ta srem gwe-gwera.
² Sap zen de anakan emsa kara gul gweꞌanka, “Zeno gwenna lalak enna, hen Alapsa man blikip gwesik gweblanan,” zen dekam maka haleꞌara.
³ Zep we walya, ere mae mo tim enna bahem weir gulsuk gwen– nol alasa de sam gulsunkum, emas maekam de enaka weir gulsunkum, hen pakean dawem maesa de alala ta gwenkamye.
⁴ Diki enhosa em hen wer tasik gwen– enlala sae-saekam hen enlala betekkam de gwe gwenkam. Sap Alap mo nwenak, zen zen– hendep de nwe-awes naye.
⁵ Sap orep de we walya, Alapsa de yaing gwebla kinin wenya, zen kirekam enho zemka wer dasik gwek. Zen zep zi wal zemka dawemkam blikip neisibirida gwek.
⁶ Orep Sara Bak zen kirekam gwe gwek. Zen zi zem Abraham Bak mo ol san ang gwe-gwek, hen desa “ano teipsin”kim gu gweblak. Em de zeno kim lowehe gwenkam, airin sremkam de dawem ensa syal gwe-gwibinkim, em hen dekam esa enwe-mase gwe-gwer– san de Sara mo wenam.
⁷ Zini em hen kirekam we wal omka enlala blala ban olelowehe gwek. We omka dawemkam em mas gwe-gwibin, sap zeno timni soson tangan naka hom. Hen emki blikip gwesibirida gwen, sap zen hen sa Kristus mo kwasang-kwasang nakon engaya gwer. Zep zen hen Alap mo hanan tabinni– in ki hen em. Karekkam de golegwe gwenkam, ki hwena Alap molya eno mae mo ol gu sonenna dokwak gul gweka.
⁸ Aumwa hap ee ama emsa gubiridaꞌan: Aha-ere enlalakam em lowehe gwen. Ebon mae onakon de ahanik enlala nik dowe hananna, emki hen zeno enlala dowe hanansa eisbin. Kristen bose omka em kwasang gwibirida gwen– ere mo iye tangansa de kwasang gwibirida gwen makan. Ensa em enaka lwabirida gwen. Deban enlala betekkam lowehe gwek.
⁹ Emsa de aha zi karek ta gwibinkim, em hwena bahem karekna gol gwizimdin. Emsa de lamang ta gwibinkim, em hwena bahem lamang ta gwibin. Em hwena dawemsa em gol gwizimdin. Sap Alap Zen kiresa de goltowe gwen nakon de dawemsa golzimdin hip nesa kwang guludaka– lamkam dikim hwena zere mo walasna nebe mae hap dawemsa golzimdin hip, men desa nep hamal gulzimkike.
¹⁰ Sap Alap mo olak man lwak, “Zini men zen hendep de gwen hap edwam gwe-gweꞌan, hen Alap mo taha terenak de lowehe gwen hap, zen dikire mahal zemka noleinik gwe-gwek. Hen boton ola bap zen mip nakon wet so gwizimdin.
¹¹ Hen kareksa de gol gwenna zen baes tan, hwena dawem ensa zen syal gwe-gwibin. Zen diki tingare zi niban dikim aha-ere enlalakam golelowehe gwen hap de orasa zen te gweblan.
¹² Sap Bian Zen enlala dam-dam zisi nwekam kara ta gwibirida, hen zeno mae mo ol gu sonenna man sal gwenda. Hwena men zen karekna nol gwenan, zeno mae mo ol gu sonenna hom dokwak gul gwenda.”
¹³ Hwena em de dawem ensa de syal gwe-gwibin hip esyal-syal gwe-gwenkam, dekam nara molya emsa karek tabirki.
¹⁴ Hwena emsa de karek gwen sremnak karek ta gwibinni, emki eheꞌho gwe-gwen, sap Alap sa kire hap de dawemna lamkam ebe mae hap golzimdi. Dekam emki Alap mo ola ansa enlala gwe-gwibin– men zen anakan lwakke, “Auhu-kama enlala zini mensa nairi gwibirin, em bahem desa airibin, hen bahem engalap gwe-gwen.”
¹⁵ Hwena dekam ere mae mo enhonak Bian Yesus mo bosesa em anakan teip gulsuk gweblan, “Sap sa asa karek da gwer, sap ano gwenna Zen Kristus Yesus kitak gwirensiꞌira.” Hen enlalasa emki hohle ta guk gwen– dekam de Yesus hup denaka ding gul gwen hapye. Sap sa emsa anakan dakensibirida gwer, “Em ba habe Yesussu yaing gwebla kini gweꞌara?” Em hwena dekam enlala sae-sae naban hen blikip gwesibiridan naban em ding gul gwizimdin.
¹⁶ Eno mae mo enhona dekam bap zen kles gwesin. Sap nesa de lamang ta gwibin zini in de anakan emsa kara tabinkim, “Zeno mae mo gwenna lalak enna,” zen dekam sa anakan esaher gwe-gwer, “Ëe ba habe Kristussu de ang gwe-gweblan wenya ansa lamang la gwibik?”
¹⁷ Sap dawem ensa de syal gwe-gwibinnik de emsa karek tabinni, zen airis tangan. Alap mes ki emsa kire hap dam tasibirki. Hwena ekarek gwennak de emsa karek tabinni, zen dawem naka hom.
¹⁸ Sap Kristus Zena hen kareksa de gon sremnak karekna goltoweka– Zen kim neno mae mo kareksa de wei yun hup tilkiye. Zen molya etan zi mo kareksa de wei yun hup Zenaka sosok taka. Hwena Zen tingare karek gol gwen zini neno mae mo weinak dep tilki– nesa dikim Alap osan dep golelwanda halzan hap. Zep karek gon sremnak de emsa karek tabinni dekam emki hen Yesussu anakan enlala gwe-gweblan, “Desa hen kirekam karek gon sremnak karek dak.” Dekam zeno auhu-kama timni man karek nulblik, hwena Alap mes zere mo Enhokam ngaya taka.
¹⁹ Zeno angna dekam man sap juwen zi mo lang san ati gwe ineka– dekam de zewe de bwinak de wenya kip Alap onakore ol dawemsa tonbiridan hap.
²⁰ Zen men zen orep Alap mo ol san ang ta srem gwekke, zeno mae mo angna– Nuh Bak men kim bul yala insa syal gwe- gwibirkike. Dekam Alap man sap zen dikim ehalen hap eissibirida gweka. Hwena zen hom ehalek. Hendep buluk iwe zen da-en sesek gwesek, zen en zep engaya gwek– beyana delapan enkam, ho namwana in kim bulu insa golwale gwekye.
²¹ Zep nen angkam ho namwana in han hokam de baptis tabin nibane apde oso gwenan. Zi de baptis gwenkam, zen timnik de kunsa dikim ngan gulsun hup hom. Baptis gwen mo enlalana, zen dekam de Alapsa enho hohle tan nakon gu-gublun hap, “Ëe ama Bian Yesussu ang gweblaꞌan.” Zen san de Yesus mo buluk de sewe senna kiye– men kirekam orep de zini Nuh Bak mo buluk sesek gwe sekke. Zen nen dekone engaya gweꞌan– men kirekam hen Yesus Zena tin nikon ngaya gwekake.
²² Zen dekam zep ngatan zi mo lang san dep sewe seka, hendep angkam Alap zere mo dam taha nakon teipsinkim nikinꞌira. Alap zere mo dam taha nakore zini hen tingare ahakore teipsin-teipsin wenya, zen kitak Zebon onakon otdenak lowe heꞌan.